ເພື່ອຕີລາຄາຄືນການຈັດຕັ້ງປະຕິບັດວຽກງານໃນໄລຍະຜ່ານມາ ໃນຕອນເຊົ້າຂອງວັນທີ 26 ຕຸລາ 2023 ສະພາປະຊາຊົນແຂວງຫລວງນໍ້າທາ ໄດ້ເປີດກອງປະຊຸມ ປະເມີນຜົນການຈັດຕັ້ງປະຕິບັດວຽກງານ ພະນັກງານ-ລັດຖະກອນ ປະຈໍາປີ 2023 ຜູ້ທີ່ມີຕໍາແໜງປະເພດ 1 – 3 ຂື້ນທີ່ຫ້ອງປະຊຸມຂອງສະພາປະຊາຊົນແຂວງ ໂດຍການເປັນປະທານ ຂອງທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ມີບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ມີຫົວໜ້າຂະແໜງ, ຮອງຫົວໜ້າຂະແໜງ ເຂົ້າຮ່ວມ 19 ທ່ານ.

ໂອກາດນີ້ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ໄດ້ມີຄຳເຫັນໃຫ້ທິດຊີ້ນຳ ກ່ອນອື່ນທ່ານໃຫ້ຮູ້ເຖີງຄວາມໝາຍ, ຄວາມສຳຄັນຂອງການປະເມີນປະຈຳປີ ຊຶ່ງເປັນຜົນງານໃນ 1 ປີຜ່ານມາ ແລະ ໃນການປະເມີນແມ່ນໃຫ້ປະເມີນກັນດ້ວຍຄວາມຈິງໃຈ, ຕຳນິສົ່ງຂ່າວຊ່ວຍເຫລືອເຊີ່ງກັນ ແລະ ກັນ ເພື່ອປັບປຸງໃຫ້ດີຂຶ້ນ, ໃນການໃຫ້ຄະແນນປະເມີນຕ້ອງເບິ່ງຕາມຄວາມຈິງໃນການຈັດຕັ້ງປະຕິບັດວຽກງານໃນໄລຍະຜ່ານມາຂອງຜູ້ກ່ຽວແທ້ ເພື່ອໃຫ້ມີຄວາມເປັນທຳ.

ພ້ອມດຽວກັນນັ້ນ ພະນັກງານ-ລັດຖະກອນ ຜູ້ທີ່ມີຕຳແໜງປະເພດ 1 – 3 ແຕ່ລະທ່ານໄດ້ຜັດປ່ຽນກັນຂຶ້ນຜ່ານໃບເກັບກ່ຽວຜົນສໍາເລັດໃນການຈັດຕັ້ງປະຕິບັດວຽກງານໃນຮອບ 1 ປີຜ່ານມາ ແລະ ບັນດາທ່ານເຂົ້າຮ່ວມກອງປະຊຸມໄດ້ມີຄຳເຫັນຕຳນິສົ່ງຂ່າວເຊິ່ງກັນ ແລະ ກັນຢ່າງມີຈຸດສຸມ ເພື່ອຕີລາຄາດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ, ​ດ້ານຄວາມຮູ້ຄວາມສາມາດ ແລະ ປະສົບການ ແລະ  ດ້ານຜົນສຳເລັດໃນການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ, ທັງນີ້ກໍເພື່ອຕີລາຄາດ້ານດີ ແລະ ຂໍ້ຄົງຄ້າງ, ວິທີປັບປຸງ ແລະ ແກ້ໄຂ, ການໃຫ້ຄະແນນ ແລະ ຈັດປະເພດຕົນເອງ; ພ້ອມນັ້ນ ຍັງໄດ້ຕີລາຄາ ແລະ ໃຫ້ຄະແນນໝູ່ຄະນະເພື່ອນຮ່ວມງານ.

ໂດຍ ວັນນີ ແຝງບົວວັນ