ວັນທີ 24 ຕຸລາ 2023ຢູ່ສະໂມສອນເມືອງທົ່ງມີໄຊ ແຂວງໄຊຍະບູລີ ທ່ານ ບຸນລ້ວນ ຊົມສີຫາປັນຍາ ກຳມະການພັກແຂວງ, ສະມາຊິກສະພາແຫ່ງຊາດ ເຂດເລືອກຕັ້ງທີ 7, ຮອງປະທານສະມາຊິກສະພາປະຊາຊົນ ແຂວງໄຊຍະບູລີ ໄດ້ລົງເຄື່ອນໄຫວຊຸກຍູ້ວຽກງານຢູ່ເມືອງທົ່ງມີໄຊ ໂດຍການໃຫ້ກຽດຕ້ອນຮັບຂອງທ່ານ ກາວີ ເກດດົມລິ ກຳມະການພັກແຂວງ ເລຂາພັກເມືອງ ເຈົ້າເມືອງທົ່ງມີໄຊ ມີບັນດາທ່ານຄະນະປະຈໍາ, ກໍາມະການພັກເມືອງ, ສະມາຊິກສະພາປະຊາຊົນແຂວງປະຈໍາເມືອງ, ຫົວໜ້າ-ຮອງຫົວໜ້າຫ້ອງການ, ອົງການ, ກົມກອງ ເຂົ້າຮ່ວມ.ທ່ານເຈົ້າເມືອງຕາງໜ້າອົງການປົກຄອງເມືອງໄດ້ກ່າວຕ້ອນຮັບພ້ອມທັງລາຍງານສະພາບໂດຍສັງເຂບ ເຊິ່ງທ່ານໄດ້ໃຫ້ຮູ້ວ່າ:ເມືອງທົ່ງມີໄຊ ມີເນື້ອທີ່ທັງໝົດ 895 ກິໂລຕາແມັດ, ປະກອບມີ 13 ບ້ານ, ມີ 165 ໜ່ວຍ, ມີ 2.060 ຄອບຄົວ, ມີພົນລະເມືອງ 9.672 ຄົນ, ຍິງ 4.862 ຄົນ, ເຜົ່າລາວ ກວມ 98,69%, ອາຊີບຕົ້ນຕໍຂອງປະຊາຊົນແມ່ນເຮັດນາປູກເຂົ້າຕິດພັນກັບການປູກພືດ ແລະ ລ້ຽງສັດ.ຕະຫຼອດໄລຍະຜ່ານມາເມືອງພວກເຮົາໄດ້ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບກາຍເປັນຂອງທົ່ວປວງຊົນຮອບດ້ານ ເອົາໃຈໃສ່ຊີ້ນຳກຳລັງປະກອບອາວຸດ ເຄື່ອນໄຫວໃນຂອບເຂດຮັບຜິດຊອບ ຢ່າງເປັນລະບົບຕໍ່ເນື່ອງ, ສຸມໃສ່ຊຸກຍູ້ວຽກງານປ້ອງກັນຊາດ-ປ້ອງກັນຄວາມສະຫົງບຢູ່ຮາກຖານໃຫ້ມີຄວາມໜັກແໜ້ນ-ເຂັ້ມແຂງ, ປະກົດການຫຍໍ້ທໍ້ຕ່າງໆທີ່ເກີດຂຶ້ນໄດ້ຮັບການແກ້ໄຂຢ່າງຖືກຕ້ອງ ແລະ ທັນເວລາ ມີຄວາມສະຫງົບໂດຍພື້ນຖານ ວຽກງານອົງການຈັດຕັ້ງມະຫາຊົນ: ໄດ້ເອົາໃຈໃສ່ເຄື່ອນໄຫວຕາມສິດ,ໜ້າທີ່ ແລະ ພາລະບົດບາດຂອງຕົນຢ່າງຕັ້ງໜ້າ, ເປັນຕົ້ນ: ເອົາໃຈໃສ່ຈັດຕັ້ງປະຕິບັດຊຸກຍູ້ຂະບວນການແຂ່ງຂັນ 4 ບຸກ ຂອງຊາວໜຸ່ມ, ຂະບວນການແຂ່ງຂັນ 3 ດີ ຂອງສະຫະພັນແມ່ຍິງ ແລະ ຂະບວນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຂອງກຳມະບານ, ພ້ອມທັງເປີດກອງປະຊຸມໃຫຍ່ຂອງບັນດາຮາກຖານສຳເລັດໃນທົ່ວເມືອງ. ຈັດເກັບລາຍຮັບເຂົ້າງົບປະມານໃຫ້ລະອຽດ, ຖີ່ຖ້ວນຮັບປະກັນບໍ່ໃຫ້ມີການຮົ່ວໄຫຼ ໄລຍະຜ່ານມາໄດ້ຮັບຕົວເລກມອບເໝົາ 2.013,64 ລ້ານກີບ ປະຕິບັດໄດ້ 1.806,54ລ້ານກີບ, ເທົ່າກັບ 89,72% ຂອງແຜນການປີ, ລາຍຈ່າຍປະຕິບັດໄດ້ 1.654,46 ລ້ານກີບ, ປະຕິບັດໄດ້ 82,16% ຂອງແຜນການປີ. ກະກຽມຂຶ້ນແຜນໂຄງການລົງທຶນຂອງລັດເພື່ອນໍາສະເໜີຕໍ່ສະພາແຫ່ງຊາດພິຈາລະນາບັນຈຸເຂົ້າແຜນປີ, ການຜະລິດເປັນສິນຄ້າຂອງປະຊາຊົນ:ເອົາໃຈໃສ່ຊຸກຍູ້ສົ່ງເສີມໃຫ້ປະຊາຊົນຜະລິດເປັນສິນຄ້າໃຫ້ຫຼາຍ ໂດຍເລັ່ງໃສ່ການປູກຝັງ ແລະ ລ້ຽງສັດປະເພດຕ່າງໆ ເພື່ອສ້າງລາຍຮັບໃຫ້ແກ່ຄອບຄົວ;ຕິດຕາມ, ຊຸກຍູ້ການເກັບກູ້ມັນຕົ້ນປີ 2022 ເນື້ອທີ່ 1.368,40 ເຮັກຕາ, ສໍາເລັດແລ້ວ 100%, ຜົນຜະລິດ 35.578,4 ໂຕນ, ຊຸກຍູ້ການເກັບກູ້ເຂົ້ານາແຊງ ເນື້ອທີ່ 10,89 ເຮັກຕາ ສໍາເລັດແລ້ວ 100%, ຜົນຜະລິດ 38,11 ໂຕນ, ຈາກນັ້ນໄດ້ເອົາໃຈໃສ່ຊຸກຍູ້ສົ່ງເສີມ ປູກພືດລະດູແລ້ງເນື້ອທີ່ 230 ເຮັກຕາປະຕິບັດໄດ້ 201,49 ເຮັກຕາເກັບກູ້ສຳເລັດແລ້ວ 100%, ໃນນີ້ ສາລີຫວານ, ຜັກກິນໃບ, ໝາກແຕງ,ຜັກບົ່ວ, ຜັກທຽມ, ຜັກກະລໍາປີ ແລະ ອື່ນໆ, ຊຸກຍູ້ການປູກ ແລະ ບົວລະບັດພືດລະດູຝົນ ເຊັ່ນ: ມັນຕົ້ນ ເນື້ອທີ່ 2.856 ເຮັກຕາ, ຖົ່ວແດງ ເນື້ອທີ່ 34,95 ເຮັກຕາ, ຖົ່ວດິນ ເນື້ອທີ່24,99 ເຮັກຕາ, ສາລີແຂງເນື້ອທີ່ 37,85 ເຮັກຕາ, ໝາກເດືອຍ ເນື້ອທີ່ 1,3 ເຮັກຕາ, ຕິດຕາມ ຊຸກຍູ້ການປູກເຂົ້ານາປີໃນເນື້ອທີ່ແຜນການ 2.052 ເຮັກຕາ, ເນື້ອທີ່ປູກຕົວຈິງ 2.031,28 ເຮັກຕາ, ປະຈຸບັນເຫັນວ່າເຂົ້ານາເປັນພະຍາດ ແລະ ແມງໄມ້ຄື: ເພ້ຍຈັກຈັ່ນ ຈໍານວນ 13 ບ້ານ, ມີຈຳນວນ 255 ຄອບຄົວ, ເນື້ອທີ່ຖືກຜົນກະທົບ 114,14 ເຮັກຕາ, ເນື້ອທີ່ຖືກເສຍຫາຍ 56,02 ເຮັກຕາ; ທົ່ວເມືອງມີສັດລ້ຽງທັງໝົດ 169.869 ໂຕ ໃນນີ້: ຄວາຍ 8,500 ໂຕ, ງົວ 7,450 ໂຕ, ໝູ 15.639 ໂຕ, ແບ້ 123 ໂຕ, ສັດປີກ 138.157 ໂຕ, ຊ້າງ 73 ໂຕ ຈາກນັ້ນໄດ້ລົງສັກຢາປ້ອງກັນພະຍາດເຕົ້າໂຮມເລືອດງົວ-ຄວາຍ, ປີ່ນປົວສັດເປັນພະຍາດ ແລະ ສັດເຈັບງົ ວ-ຄວາຍ, ສັດປີກ. ເຄື່ອນຍ້າຍສິນຄ້າອອກຕ່າງເມືອງ ລວມມູນຄ່າ 14,742 ລ້ານກີບ ປັບປຸງຕາໜ່າງເສັ້ນທາງຢູ່ພາຍໃນເມືອງ ເປັນຕົ້ນແມ່ນເສັ້ນທາງ ລະຫວ່າງ ບ້ານຫາເມືອງ

ໄດ້ຮັບການປັບປຸງໃຫ້ດີຂຶ້ນນໍາການຈັດຕັ້ງປະຕິບັດ ຄຸ້ມຄອງ, ການປົກປັກຮັກສາ, ການຟື້ນຟູບູລະນະຊັບພະຍາກອນທຳມະຊາດ ແລະ ສິ່ງແວດລ້ອມ, ຊີວະນາໆພັນ, ປົກປັກຮັກສາແຫຼ່ງນໍ້າ, ປົກປັກຮັກສາຄຸ້ມຄອງປ່າ ແລະ ຟື້ນຟູປ່າໄມ້,ວຽກງານສຶກສາເອົາໃຈໃສ່ຍົກສູງຄຸນນະພາບຂອງວຽກງານການສຶກສາ ດ້ວຍການປັບປຸງຄຸນນະພາບການຮຽນ-ການສອນ ຂອງຄູອາຈານ ແລະ ນັກຮຽນຢ່າງໃກ້ຊິດ ແລະ ຕໍ່ເນື່ອງເພື່ອເຮັດໃຫ້ຄຸນະພາບການສຶກສາ ນັບມື້ນັບດີຂຶ້ນ, ວຽກງານສາທາລະນະສຸກເອົາໃຈໃສ່ປັງປຸງຍົກລະດັບເຄື່ອງມືຮັບໃຊ້ດ້ານວິຊາການ, ປັບປຸງຂອດບໍລິການໃຫ້ສະດວກວ່ອງໄວ ນັບທັງປັບປຸງສະຖານທີ່ບໍລິການຄົນເຈັບໄປຕາມມາດຖານ 5 ດີ 1 ພໍໃຈ ໃຫ້ດີຂຶ້ນເທື່ອລະກ້າວ, ນອກນີ້ ໄດ້ເອົາໃຈໃສ່ປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດ ຕາມລະດູການ ໂດຍສະເພາະແມ່ນພະຍາດໄຂ້ຍຸງລາຍ, ລົງເຄື່ອນໄຫວສັກຢາກັນພະຍາດ ໃຫ້ແກ່ແມ່ຍິງ ແລະ ເດັກນ້ອຍຕາມເກນອາຍຸເປົ້າໝາຍ ແລະ ກໍ່ໄດ້ຖືເອົາການປ້ອງກັນ ເປັນບັນຫາສຳຄັນ,ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ: ເປັນວຽກງານໜື່ງທີ່ເປັນກະບອກສຽງຂອງພັກ ໃນການໂຄສະນາເຜີຍແຜ່, ຊຸກຍູ້ ແລະ ຜັນຂະຫຍາຍແນວທາງຂອງພັກ, ລະບຽບກົດໝາຍຂອງລັດ ໃນໄລຍະຜ່ານມາກໍ່ໄດ້ເຄື່ອນໄຫວເພື່ອຕອບສະໜອງຂໍ້ມູນຂ່າວສານ ໃຫ້ສັງຄົມຮັບຮູ້ຢ່າງທົ່ວເຖິງ, ຕິດຕາມກວດກາຮ້ານບັນເທິງພາຍໃນເມືອງ ໃຫ້ເຄື່ອນໄຫວຖືກຕ້ອງຕາມລະບຽບການ, ແຕ່ລະບ້ານກໍ່ມີການກະຈາຍຂ່າວໃຫ້ພໍ່ແມ່ປະຊາຊົນຮັບຮູ້ຢ່າງທົ່ວເຖິງ.ຈາກນັ້ນຕາງໜ້າໃຫ້ຂົງເຂດເສດຖະກິດ, ແຜນກການ ແລະ ການເງິນ,ຂົງເຂດວັນທະນະທຳ-ສັງຄົມ, ຂົງເຂດຍຸຕິທຳ ແລະ ປ້ອງກັນຊາດກໍ່ ໄດ້ປ່ຽນກັນຂຶ້ນປະກອບຄໍາຄິດຄຳເຫັນຕາມຄຳຖາມເຈາະຈີ້ມຂອງທ່ານປະທານ ໃນຕອນທ້າຍຍັງໄດ້ຮັບຟັງການມີຄໍາເຫັນຊີ້ນໍາວຽກງານດ້ານຕ່າງໆຢູ່ພາຍໃນເມືອງຈາກທ່ານ ບຸນລ້ວນ ຊົມສີຫາປັນຍາ ກຳມະການພັກແຂວງ, ສະມາຊິກສະພາແຫ່ງຊາດ ເຂດເລືອກຕັ້ງທີ 7 ຮອງປະທານສະພາປະຊາຊົນແຂວງ ໄຊຍະບູລີຕື່ມອີກ.

                                                                                                                                      ໂດຍ: ອິນທີ ຂຽວສີຟ້າ