(ສພຊ) ເພື່ອເປັນການສືບຕໍ່ການຈັດຕັ້ງປະຕິບັດຕາມແຜນການຂອງກໍາມາທິການວຽກງານສະມາຊິກສະພາແຫ່ງຊາດ ໃນການຈັດຕັ້ງປະຕິບັດກິດຈະກໍາ ເປັນຕົ້ນການປຶກສາຫາລື ແລະ ລະດົມແນວຄວາມຄິດເຫັນຕໍ່ບັນດາຮ່າງນິຕິກໍາຂອງ ຄະນະປະຈໍາສະພາແຫ່ງຊາດ ແລະ ເພື່ອເປັນການສ້າງຄວາມເປັນເອກະພາບທາງດ້ານໂຄງຮ່າງ, ເນື້ອໃນໃຫ້ມີຄວາມສົມບູນ ແລະ ຄົບຖ້ວນ ແນໃສ່ເຮັດໃຫ້ນິຕິກໍາດັ່ງກ່າວ ມີຄຸນນະພາບ ແລະ ສາມາດຈັດຕັ້ງປະຕິບັດໄດ້, ໃນລະຫວ່າງວັນທີ 25-27 ຕຸລາ 2023 ກໍາມາທິການວຽກງານສະມາຊິກສະພາແຫ່ງຊາດ ໄດ້ສືບຕໍ່ຈັດກອງປະຊຸມລະດົມຄວາມຄິດຕໍ່ 3 ຮ່າງນິຕິກໍາຂອງຄະນະປະຈໍາສະພາແຫ່ງຊາດ ທີ່ເມືອງທ່າພະບາດ ແຂວງບໍລິຄຳໄຊ ໂດຍການເປັນປະທານຂອງທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ, ມີບັນດາທ່ານຮອງປະທານກຳມາທິການ, ຄະນະກົມ, ປະທານ-ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ, ຄະນະເລຂາທິການສະພາປະຊາຊົນຂັ້ນແຂວງ (ແຂວງພາກກາງ ແລະ ພາກໃຕ້), ບັນດາທ່ານຫົວໜ້າຂະແໜງຄົ້ນຄວ້າ-ສັງລວມ ສະພາປະຊາຊົນຂັ້ນແຂວງ ແລະ ແຂກຖືກເຊີນຈາກສູນກາງ ແລະ ທ້ອງຖິ່ນເຂົ້າຮ່ວມ.

ກອງປະຊຸມໄດ້ຮັບຟັງການຮ່າງປຶ້ມຄູ່ມືການເລືອກຕັ້ງສະມາຊິກສະພາ (ສ້າງໃໝ່) ຈາກທ່ານປະທານກໍາມາທິການວຽກງານສະມາຊິກສະພາແຫ່ງຊາດ; ຮ່າງມະຕິ ຂອງຄະນະປະຈໍາສະພາແຫ່ງຊາດວ່າດ້ວຍການປະກອບຄໍາເຫັນ ແລະ ຊັກຖາມ ຂອງສະມາຊິກສະພາແຫ່ງຊາດ ໃນກອງປະຊຸມສະພາແຫ່ງຊາດ (ສ້າງໃໝ່) ແລະ ຮ່າງມະຕິ ຂອງຄະນະປະຈໍາສະພາແຫ່ງຊາດວ່າດ້ວຍການປະເມີນຜົນການປະຕິບັດໜ້າທີ່ຂອງສະມາຊິກສະພາແຫ່ງຊາດ (ສ້າງໃໝ່) ຈາກທ່ານຮອງປະທານກໍາມາທິການວຽກງານສະມາຊິກສະພາແຫ່ງຊາດ. ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ຜັດປ່ຽນກັນປະກອບຄໍາຄິດຄໍາເຫັນຕາມຄໍາເຈາະຈີ້ມຂອງປະທານກອງປະຊຸມ ເພື່ອປະກອບໃສ່ຮ່າງນິຕິກໍາດັ່ງກ່າວທີ່ນໍາມາສະເໜີໃນກອງປະຊຸມຄັ້ງນີ້.

ກອງປະຊຸມຄັ້ງນີ້ ໄດ້ຮັບການສະໜັບສະໜູນທຶນຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ (Step).

(ພາບ ແລະ ຂ່າວ: ສອນສັກ ວັນວິໄຊ)