ສະມາຊິກສະພາປະຊາຊົນແຂວງ ເຂດເລືອກຕັ້ງເມືອງໄຊເສດຖາ ໄດ້ພົບປະຢ້ຽມຢາມຖາມຂ່າວປະຊາຊົນຜູ້ມີສິດເລືອກຕັ້ງ ຢູ່ບ້ານໃຫ່ຍອຸດົມ ເມືອງໄຊເສດຖາ. ໃນວັນທີ 18 ຕຸລາ 2023 ນີ້. ນໍາໂດຍທ່ານ ອຸດສະຫະ ກົມມະເມືອງ ຮອງເລຂາພັກເມືອງ ຫົວໜ້າໜ່ວຍສະມາຊິກສະພາປະຊາຊົນແຂວງ ເຂດເລືອກຕັ້ງເມືອງໄຊເສດຖາ ພ້ອມຄະນະ ສະມາຊິກສະພາປະຊາຊົນແຂວງ ເຂດເລືອກຕັ້ງເມືອງ ແລະ ພະນັກງານວີຊາການຕິດຕາມ. ມີອົງການຈັດຕັ້ງບ້ານ ຕະຫລອດຮອດປະຊາຊົນຜູ້ມີສິດເລືອກຕັ້ງໃຫ້ການຕ້ອນຮັບ ແລະ ເຂົ້າຮ່ວມທັງໝົດ 120 ຄົນ, ຍິງ 62 ຄົນ.
ໂອກາດນີ້ ທ່ານ ບຸນຍີ ໄຊວົງຊາຍ ຮອງນາຍບ້ານໃຫ່ຍອຸດົມໄດ້ລາຍງານສະພາບລວມໂດຍຫຍໍ້ຂອງບ້ານ ເຊິ່ງຕັ້ງຢູ່ລຽບຕາມລໍານ້ຳເຊຊູ ຫ່າງຈາກເທດສະບານເມືອງໄຊເສດຖາ 18 ກິໂລແມັດ, ມີຄອບຄົວທັງໝົດ 834 ຄອບຄົວ, ມີ 710 ຫຼັງຄາເຮືອນ, ພົນລະເມືອງ 3.249 ຄົນ, ມີແຮງງານສົມບູນ 1.593ຄົນ ຍິງ 306 ຄົນ, ແຮງງານສໍາຮອງ 1.249 ຄົນ, ລວມມີ 3 ຄຸ້ມ: ຄຸ້ມບຸ່ງຫວາຍ, ຄຸ້ມໝາກເຂືອ ແລະ ຄຸ້ມດອນງິ້ວ, ປະຊາຊົນມີມູນເຊື້ອດຸໝັ້ນ ໃນການອອກແຮງງານ ຖືເອົາອາຊີບເຮັດນາປູກເຂົ້າ ເປັນອາຊີບຕົ້ນຕໍ, ການປູກຝັງລ້ຽງສັດ ເປັນອາຊີບສໍາຮອງ, ມີເນື້ອທີ່ປູກເຂົ້ານາປີທັງໝົດ 797,7 ເຮັກຕາ ຄາດຄະເນຜົນໄດ້ຮັບ 1.755 ໂຕນ ສາມາດກຸ້ມກີນ ແລະ ແຮໄວ້, ເນື້ອທີ່ປູກມັນຕົ້ນ 15 ເຮັກຕາ ຄາດຄະເນຜົນຜະລິດ 88.543 ໂຕນ ສະເລ່ຍລາຍຮັບຈາກມັນຕົ້ນ 104.800.000 ກີບ. ພ້ອມນີ້, ໄດ້ເປີດໂອກາດ ໃຫ້ປະຊາຊົນຜູ້ມີສິດເລືອກຕັ້ງປະກອບຄວາມຄິດຄິດຄວາມເຫັນຄໍາສະເໜີຕໍ່ກັບຊີວິດການເປັນຢູ່,ຄວາມຂັດຂ້ອງໝອງໃຈ ແລະ ປະກົດການຫຍໍ້ທໍ້ຕ່າງໆ ເຊິ່ງປະກອບມີຄໍາສະເໜີຫຼາຍບັນຫາເປັນຕົ້ນ: ປັບປຸງເສັ້ນທາງເຂົ້າບ້ານ, ຂະຫຍາຍນໍ້າລີ່ນຄຸ້ມບຸ່ງຫວາຍ, ແກ້ໄຂນໍ້າບະດານທີ່ໃຊ້ລະບົບໂຊລາເຊວຢູ່ຄຸ້ມດອນງີ້ມໃຫ້ໄດ້ຊົມໃຊ້ ແລະ ບັນຫາອື່ນໆ, ສະມາຊິກສະພາປະຊາຊົນແຂວງ ກໍ່ໄດ້ອະທິບາຍບາງບັນຫາ ແລະ ບາງບັນຫາໄດ້ຮັບເອົາເພື່ອຈະນໍາໄປປະສານສົບທົບກັບພາກສ່ວນທີ່ກ່ຽວຂ້ອງຄົ້ນຄວ້າແກ້ໄຂ.
ຈາກນັ້ນ ບັນດາທ່ານ ສະມາຊິກສະພາປະຊາຊົນແຂວງ ໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ອັດຕະປື ຊຸດທີ ເຊິ່ງໄດ້ຍົກໃຫ້ເຫັນເຖິງສະພາບລວມ ບັນດາວຽກງານຂອງລັດຖະບານ ແລະ ວຽກງານອົງການປົກຄອງແຂວງ ທີ່ໄດ້ພິຈາລະນາຮັບຮອງໃນກອງປະຊຸມເປັນຕົ້ນແມ່ນ ແຜນພັດທະນາເສດຖະກິດ-ສັງຄົມ, ດ້ານວັດທະນະທໍາ-ສັງຄົມ, ດ້ານເສດຖະກິດ, ດ້ານຍຸຕິທໍາ ປ້ອງກັນຊາດ-ປ້ອງກັນຄວາມຫງົບ ແລະ ຍົກໃຫ້ເຫັນ ພາລະບົດບາດ, ສິດ ແລະ ໜ້າທີ ການເຄື່ອນໄຫວ ຂອງສະພາປະຊາຊົນແຂວງ . ພ້ອມກັນນັ້ນ, ກໍ່ໄດ້ໂອ້ລົມໃຫ້ປະຊາຊົນຈົ່ງມີຄວາມສາມັກຄີປອງດອງ, ມີປະຊາທິປະໄຕ ແລະ ມີເຊື່ອໝັ້ນຕໍ່ແນວທາງຂອງພັກ, ລະບຽບກົດໝາຍຂອງລັດ, ອະນຸລັກຮັກສາຮີດຄອງປະເພນີອັນດີງາມຂອງຊາດ-ຂອງເຜົ່າ, ຮັກສາມູນເຊື້ອດຸໝັ້ນ ໃນການອອກແຮງງານ ແລະ ສືບຕໍ່ອອກແຮງຄວາມດຸໝັ່ນຂະຫຍັນພຽນໃນການທໍາການຜະລິດ ເປັນຕົ້ນດ້ານການປູກ-ການລ້ຽງໃຫ້ກຸ້ມຢູ່ກຸ້ມກິນ ແລະ ກາຍເປັນສິນຄ້າ ເພື່ອສ້າງເສດຖະກິດຄອບຄົວໃຫ້ດີຂຶ້ນ.
(ວິນັດ)