(ສພຊ) ໃນຕອນບ່າຍຂອງວັນທີ 5 ຕຸລາ 2023 ທີ່ສະພາແຫ່ງຊາດ ນະຄອນຫຼວງວຽງຈັນ; ສະຫາຍ ພົນໂທ ສຸວອນ ເລືອງບຸນມີ ກໍາມະການສູນກາງພັກ, ຮອງປະທານສະພາແຫ່ງຊາດລາວ, ປະທານຄະນະມິດຕະພາບລັດຖະສະພາລາວ-ຣັດເຊຍ ໄດ້ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ ປາຣໂຟນົບ ເດນິດສ໌ ອັນເດເຢວິສ ສະມາຊິກສະພາດູມາ, ເລຂາອົງຄະນະພັກນະຄອນຫຼວງມຸດສະກູ, ກໍາມະການສູນກາງພັກກອມມູນິດ ແຫ່ງ ສະຫະພັນຣັດເຊຍ ພ້ອມດ້ວຍຄະນະ ເນື່ອງໃນໂອກາດທີ່ມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ.

ສະຫາຍ ພົທ. ສຸວອນ ເລືອງບຸນມີ ໄດ້ຕີລາຄາສູງຂອງການມາເຄື່ອນໄຫວຢ້ຽມຢາມ ແລະ ເຮັດວຽກ ໃນຄັ້ງນີ້ ເຊິ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມ ແລະ ຄູ່ຮ່ວມຍຸດທະສາດ ລະຫວ່າງສອງປະເທດ ລາວ-ຣັດເຊຍ ກໍຄືອົງການນິຕິບັນຍັດຂອງສອງປະເທດ ພວກເຮົາ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທຳຍິ່ງໆຂຶ້ນ; ພ້ອມນັ້ນ, ສະຫາຍຮອງປະທານສະພາແຫ່ງຊາດລາວ ສະແດງຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີງາມ ແລະ ການເປັນຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຣັດເຊຍ ໄດ້ສືບຕໍ່ມີບາດກ້າວຂະຫຍາຍຕົວ ຢ່າງຕໍ່ເນື່ອງ ໃນນັ້ນ, ມີການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆນໍາກັນ ຢ່າງເປັນປົກກະຕິ, ມີການຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ. ພ້ອມນີ້, ສະແດງຄວາມຊົມເຊີຍຕໍ່ຜົນການພົບປະ ຂອງສະຫາຍ ກັບການນໍາພັກ-ລັດຖະບານ ສປປລາວ ກໍຄືສະພາປະຊາຊົນນະຄອນຫຼວງວຽງຈັນ ທີ່ມີຜົນສຳເລັດຢ່າງຈົບງາມ; ຕອນທ້າຍ ສະຫາຍ ຮອງປະທານສະພາແຫ່ງຊາດລາວ ໄດ້ຂໍຕາງໜ້າໃຫ້ແກ່ ລັດຖະບານ, ສະພາແຫ່ງ ຊາດ ແລະ ປະຊາຊົນລາວບັນດາເຜົ່າ ສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງ ຕໍ່ການຊ່ວຍເຫຼືອ ແລະ ສະໜັບສະໜູນ ອັນໃຫຍ່ຫຼວງລໍ້າຄ່າ ແກ່ ສປປລາວ ຂອງອະດີດສະຫະພາບໂຊຫວຽດໃນເມື່ອກ່ອນ ແລະ ສະຫະພັນຣັດເຊຍ ໃນປັດຈຸບັນ ທີ່ປະກອບສ່ວນສໍາຄັນເຂົ້າໃນພາລະກິດປົດປ່ອຍປະເທດຊາດ ກໍຄື ການປົກປັກຮັກ ສາ ແລະ ສ້າງສາປະເທດຊາດໃນປັດຈຸບັນ ອວຍພອນໄຊໃຫ້ ສະຫາຍ ປາຣໂຟນົບ ເດນິດສ໌ ອັນເດເຢວິສ ພ້ອມດ້ວຍຄະນະຜູ້ແທນ ມີຜົນສໍາເລັດ ໃນໜ້າທີ່ວຽກງານອັນມີກຽດສະຫງ່າ, ມີຜົນສຳເລັດ ໃນການຢ້ຽມຢາມ ແລະ ເຮັດວຽກ ຢູ່ ສປປລາວ ໃນຄັ້ງນີ້ ແລະ ສາຍພົວພັນມິດຕະພາບອັນເປັນມູນເຊື້ອທີ່ດີງາມມາແຕ່ດົນນານ ແລະ ຄູ່ຮ່ວມຍຸດທະສາດລາວ-ຣັດເຊຍ ຈົ່ງໝັ້ນຄົງທະນົງແກ່ນຕະຫຼອດໄປ.

ຈາກນັ້ນ, ສະຫາຍ ປາຣໂຟນົບ ເດນິດສ໌ ອັນເດເຢວິສ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບ ຢ່າງອົບອຸ່ນຂອງສະຫາຍ ຮອງປະທານສະພາແຫ່ງຊາດລາວ ພ້ອມທັງລາຍງານໃຫ້ຮູ້ກ່ຽວກັບຈຸດປະສົງຂອງການມາ ຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້, ພ້ອມທັງອວຍພອນສາຍພົວພັນມິດຕະພາບອັນເປັນມູນເຊື້ອທີ່ ດີງາມ ແລະ ຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຣັດເຊຍ ຈົ່ງສືບຕໍ່ໄດ້ຮັບການເສີມຂະຫຍາຍໃຫ້ນັບ ມື້ນັບເຂົ້າສູ່ລວງເລິກ ແລະ ເປັນຮູບປະທຳຍິ່ງໆຂຶ້ນ.