ໃນວັນທີ 5 ຕຸລາ 2023 ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ, ການຈັດຕັ້ງປະຕິບັດ ລັດຖະທຳມະນູນ, ກົດໝາຍ ໃນຂົງເຂດ ຍຸຕິທຳ ແລະ ປກຊ-ປກສ, ຢູ່ 2 ເມືອງຄື: ເມືອງມະຫາໄຊ ແລະ ເມືອງຍົມມະລາດ ໂດຍໃຫ້ກຽດຕ້ອນຮັບ ແລະ ເຂົ້າຮ່ວມເຮັດວຽກຂອງບັນດາທ່ານ ຄະນະປະຈໍາພັກເມືອງ, ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ, ອົງການກວດກາພັກ-ລັດເມືອງ, ຄະນະກອງບັນຊາການ ປກຊ-ປກສ ເມືອງ, ຫ້ອງການຍຸຕິທຳເມືອງ, ໄອຍະການປະຊາຊົນປະຈໍາເມືອງ, ຫົວໜ້າ-ຮອງຫົວໜ້າຫ້ອງການທີ່ກ່ຽວຂ້ອງເຂົ້າຮ່ວມ.

      ຈຸດປະສົງ ໃນການລົງມາເຄື່ອນໄຫວວຽກງານ ຂອງປະທານ ສະພາປະຊາຊົນແຂວງ ພ້ອມດ້ວຍຄະນະ ຢູ່ 2 ເມືອງ ຄັ້ງນີ້ ກໍເພື່ອຮັບຟັງການລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 1 ປີ ຜ່ານມາ ແລະ ການຈັດຕັ້ງປະຕິບັດວຽກງານຂອງ ປກຊ-ປກສ ເມືອງ, ໄອຍະການປະຊາຊົນປະຈໍາເມືອງ, ຫ້ອງການຍຸຕິທຳເມືອງ, ອົງການກວດກາພັກ-ລັດເມືອງ, ໂດຍສະເພາະກໍແມ່ນການປະຕິບັດໜ້າທີ່ຂອງເຈົ້າໜ້າທີ່ ປກສ ເມືອງໃນການຈັດຕັ້ງປະຕິບັດວະລາແຫ່ງຊາດ, ການແກ້ໄຂຄະດີ, ວຽກງານຫ້ອງການຍຸຕິທຳ ໃນການຈັດຕັ້ງປະຕິບັດຄໍາຕັດສິນຂອງສານ ແລະ ວຽກງານການຈັດຕັ້ງປະຕິອົງການກວດກາພັກ-ລັດເມືອງ ກ່ຽວກັບການແກ້ໄຂຄໍາຮ້ອງ-ຄໍາສະເໜີ, ວຽກງານຕ້ານ ແລະ ສະກັ້ນການສໍ້ລາດບັງຫຼວງ. ພາຍຫຼັງຮັບຟັງການລາຍງານຂອງບັນດາຂະແໜງການທີ່ກ່ຽວຂ້ອງ ປະທານ ກອງປະຊຸມໄດ້ມີຄໍາເຫັນຊີ້ນຳ ແລະ ເຈາະຈີ້ມບາງບັນຫາທີ່ມີຄວາມສົນໃຈຕໍ່ວຽກງານດັ່ງກ່າວ ພ້ອມນັ້ນ, ແຂກຜູ້ເຂົ້າຮ່ວມກອງປະຊຸມກໍໄດ້ມີການແລກປ່ຽນຄໍາຄິດ-ຄໍາເຫັນ ຢ່າງກົງໄປກົງມາ ໃນການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາ ຍົກໃຫ້ເຫັນ ດ້ານດີ ແລະ ຂໍ້ຄົງຄ້າງ ເພື່ອຄົ້ນຄວ້າຊຸກຍູ້ວຽກງານດັ່ງກ່າວໃຫ້ມີປະສິດພາບ ແລະ ປະສິດທິຜົນຂຶ້ນເປັນກ້າວໆ.