ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ ຕາມກົດໝາຍວ່າດ້ວຍສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າໃນທົ່ວແຂວງຄໍາມ່ວນ.
ໃນລະຫວ່າງວັນທີ 25-29 ກັນຍາ 2023 ແລະ ວັນທີ 2-5 ຕຸລາ 2023 ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ຄະນະສະມາຊິກສະພາປະຊາຊົນແຂວງຄໍາມ່ວນ ປະຈໍາເຂດເລືອກຕັ້ງເມືອງ (ໄດ້ສຳເລັດ) ການເຄື່ອນໄຫວພົບປະ ຜູ້ສິດເລືອກຕັ້ງ ( ຢູ່ບັນດາກຸ່ມບ້ານທັງໝົດ 63 ຈຸດ ໃນ10 ຕົວເມືອງຂອງແຂວງ, ເຊິ່ງມີຜູ້ເຂົ້າຮ່ວມທັງໝົດ 6,688 ເທື່ອຄົນ, ຍິງ 2,926 ເທື່ອຄົນ ) ທີຕິດພັນກັບການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II.
ຈຸດປະສົງ: ໃນການລົງເຄື່ອນໄຫວພົບປະຢ້ຽມຢາມ ແລະ ເຮັດວຽກຄັ້ງນີ້ ກໍເພື່ອໃຫ້ພະນັກງານ-ລັດຖະກອນ, ທະຫານ-ຕໍາຫຼວດ, ອຳນາດການປົກຄອງຂັ້ນເມືອງ ແລະ ບ້ານ ຕະຫຼອດຮອດພໍ່ແມ່ປະຊາຊົນ ໄດ້ມີຄວາມຮັບຮູ້ເຊື່ອມຊຶມ ແລະ ເຂົ້າໃຈຕໍ່ແນວທາງນະໂຍບາຍຂອງພັກເວົ້າລວມ, ເວົ້າສະເພາະກໍຄືວຽກງານຂອງສະພາແຫ່ງຊາດ ແລະ ຂອງສະພາປະຊາຊົນຂັ້ນແຂວງ ທັງເປັນການຮັບເອົາ, ຄໍາຮ້ອງທຸກ, ຄໍາຮ້ອງຟ້ອງ ແລະ ຄໍາສະເໜີ, ບັນຫາຂັດຂ້ອງຫມອງໃຈຕ່າງໆຂອງປະຊາຊົນໃນເຂດເລືອກຕັ້ງແຕ່ລະຈຸດເພື່ອຊອກຫາວິທີແກ້ໄຂໃນຕໍ່ໜ້າ, ຄຽງຄູ່ກັບການປັບປຸງຊີວິດການເປັນຢູ່ ຂອງປະຊາຊົນຕໍ່ກັບສະພາບການເໜັງຕີງຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກຍາກອຶ່ນໆ ສົ່ງຜົມກະທົບສ້າງຄວາມເສຍຫາຍ ໃຫ້ແກ່ເສດຖະກິດ ແລະ ການດຳລົງຊີວິດຂອງປະຊາຊົນ ກໍຄືຂອງອົງການຈັດຕັ້ງພັກ-ລັດ ໃນການຮ່ວມກັນແກ້ໄຂບັນຫາທີ່ມີຄວາມຫຍຸ້ງຍາກໃຫ້ບັນລຸຜົນສຳເລັດຕາມຈຸດປະສົງຄາດໝາຍ.
ໂດຍ: ເອື້ອ ມະໂນສິງ