(ສພຊ) ໃນວັນທີ 3 ຕຸລາ 2023, ທ່ານປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລສາວ ໄດ້ເຂົ້າຢ້ຽມຂໍ່ານັບ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມ ໃນໂອກາດທີ່ທ່ານເດີນທາງມາຢ້ຽມຢາມ ສປປລາວ.
ໂອກາດດັ່ງກ່າວ, ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຂອບໃຈ ທີ່ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມ ໃຫ້ການຕ້ອນຮັບ ຄະນະດ້ວຍຄວາມອົບອຸ່ນ ແລະ ຕີລາຄາສູງ ການພົວພັນຮ່ວມມືທີ່ດີ ລະຫວ່າງ ສອງປະເທດ ສປປ ລາວ-ບຣູໄນ ດາຣູຊາລາມ ຄົບຮອບ 30 ປີ ແຫ່ງການສ້າງຕັ້ງ ສາຍພົວພັນການທູດ ນຳກັນໃນປີນີ້, ພິເສດ ໃນການຢ້ຽມຢາມຂອງສົມເດັດ ຄັ້ງນີ້ສອງຝ່າຍ ໄດ້ຍົກລະດັບ ການພົວພັນຮ່ວມມື ເປັນຄູ່ຮ່ວມຍຸດທະສາດ; ທ່ານປະທານ ສະພາແຫ່ງຊາດ ໄດ້ສະແດງຄວາມເຊື່ອໝັ້ນວ່າ ສອງປະເທດຈະສືບຕໍ່ຮ່ວມມືກັນຢ່າງເປັນຮູບປະທໍາ ແລະ ເຂົ້າສູ່ລວງເລິກຫຼາຍຂຶ້ນ ໂດຍສະ ເພາະການຮ່ວມມືໃນສອງຂະແໜງການເຊັ່ນ: ພະລັງງານ ແລະ ກະສິກໍາ ທີ່ສອງປະເທດໄດ້ລົງນາມຮ່ວມກັນໃນໂອກາດ ທີ່ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ໄປຢ້ຽມຢາມ ທາງລັດຖະກິດ ຢູ່ ປະເທດບຣູໄນ ຄັ້ງຜ່ານມາ. ຈາກນັ້ນ, ທ່ານ ປະທານສະພາແຫ່ງຊາດລາວ ຍັງໄດ້ລາຍງານໃຫ້ສົມເດັດ ຊຸນຕານ ຊາບ ກ່ຽວກັບການພົວພັນ ລະຫວ່າງ ສອງອົງການນິຕິບັນຍັດ ຂອງສອງປະເທດ ລາວ ແລະ ບຣູໄນ ເຊິ່ງຜ່ານມາ ແມ່ນໄດ້ມີການພົວພັນທີ່ດີນຳກັນຢ່າງເປັນປົກກະຕິ, ຕໍ່ເນື່ອງ ແລະ ສະໜັບສະໜູນກັນ ແລະກັນ ທັງໃນເວທີສອງຝ່າຍ ແລະ ຫຼາຍຝ່າຍ ແລະ ໄດ້ແຈ້ງສະພາບການ ຂອງອົງການນິຕິບັນຍັດຂອງລາວ ໃຫ້ຊາບໂດຍຫຍໍ້ເປັນຕົ້ນ: ອົງການນິຕິບັນຍັດ ຂອງລາວ ມີຢູ່ສອງຂັ້ນ, ສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ສະພາແຫ່ງຊາດ ແມ່ນ ຊຸດທີ IX ໄດ້ຮັບການເລືອກຕັ້ງໃນປີ 2021 ແລະ ຈະມີອາຍຸການຮອດ ປີ 2025, ມີສະມາຊິກທັງໜົດ 164 ທ່ານ, ຍິງ 36 ທ່ານ ກວມເອົາ 21,95%, ສະພາປະຊາຊົນຂັ້ນແຂວງ ແມ່ນ ຊຸດທີ II ມີສະມາຊິກທັງໝົດ 492 ທ່ານ, ຍິງ 150 ທ່ານ ກວມເອົາ 30,48% ມີອາຍຸການ 5 ປີ ຄືກັບສະພາແຫ່ງຊາດ. ສະພາແຫ່ງຊາດ ຊຸດທີ IX ປະກອບດ້ວຍ 9 ກໍາມາທິການ, 1 ຄະນະເລຂາທິການ, 1 ສະຖາບັນຄົ້ນຄວ້ານິຕິກໍາສະພາແຫ່ງຊາດ, ສະພາແຫ່ງຊາດ ຈັດຕັ້ງປະຕິບັດ 3 ພາລະບົດບາດ ຕົ້ນຕໍຄື: ຮັບຮອງເອົາລັດຖະທຳມະນູນ ແລະ ກົດໝາຍ, ຕົກລົງບັນຫາສຳຄັນພື້ນຖານຂອງປະເທດຊາດ ແລະ ຕິດຕາມກວດກາ ການເຄົາລົບ, ປະຕິບັດລັດຖະທຳມະນູນ, ກົດໝາຍຂອງບັນດາອົງການລັດ. ຈາກນັ້ນ ກໍໄດ້ສະເໜີ ໃຫ້ສົມເດັດ ຊຸນຕານ ກໍຄື ປະເທດບຣູໄນ ສະໜັບສະໜູນ ສປປ ລາວ ໃນການກະກຽມເປັນປະທານອາຊຽນ ແລະ ໄອປາ ໃນປີ 2024 ແລະ ແຈ້ງຕື່ມວ່າ ປີ 2024 ເປັນປີທ່ອງທ່ຽວລາວ ຂໍເຊີນຊວນ ປະຊາຊົນ ບຣູໄນ ມາທ່ອງທ່ຽວ ສປປ ລາວ ຫຼາຍຂຶ້ນ. ໃນນາມອົງການນິຕິບັນຍັດ ທ່ານປະທານສະພາແຫ່ງຊາດ ໄດ້ສະແດງຄວາມຂອບໃຈ ທີ່ປະເທດບຣູໄນ ໃຫ້ການສະໜັບສະໜູນຊ່ວຍເຫຼືອ ສປປ ລາວ ຕະຫຼອດໄລຍະ 30 ປີ ຜ່ານມາ ແລະ ໄດ້ຊ່ວຍຊຸກຍູ້ສົ່ງເສີມ ສປປ ລາວ ໃນເວທີອາຊຽນ ນັບແຕ່ ສປປ ລາວ ເຂົ້າເປັນສະມາຊິກ ອາຊຽນ ໃນປີ 1997 ຮອດປັດຈຸບັນ. ພິເສດ, ບຣູໄນ ເປັນ ໜຶ່ງໃນປະເທດ ສະມາຊິກ ອາຊຽນ ຊ່ວຍສ້າງຄວາມເຂັ້ມແຂງໃຫ້ແກ່ ຊັບພະຍາກອນມະນຸດ ຂອງ ສປປ ລາວ.
ຫຼັງຈາກນັ້ນ, ສົມເດັດ ຊຸນຕານຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມ ໄດ້ສະແດງຄວາມເປັນເອກະພາບຕໍ່ຄໍາຄິດຄໍາເຫັນ ຂອງທ່ານປະທານສະພາແຫ່ງຊາດລາວ, ເຫັນດີຊຸກຍູ້ການຮ່ວມມືທີ່ສອງປະເທດມີທ່າແຮງນໍາກັນ ໂດຍສະເພາະໃນສອງຂະແໜງການຄື: ພະລັງງານ ແລະ ກະສິກໍາ ໃຫ້ໄດ້ຮັບການຈັດຕັ້ງປະຕິບັດກັນຢ່າງແທ້ຈິງ; ສະແດງຄວາມຊົມເຊີຍ ທີ່ ສປປ ລາວ ໄດ້ຮັບເປັນປະທານ ອາຊຽນ ແລະ ປະທານ ໄອປາ ໃນປີ 2024, ປະເທດ ບຣູໄນ ຍິນດີ ຊຸກຍູ້ສະໜັບສະໜູນ ສປປລາວ ໃນການເປັນປະທານ ດັ່ງກ່າວໃຫ້ສໍາເລັດຜົນຕາມ ລະດັບຄາດໝາຍ; ໄດ້ຕີລາຄາສູງການພົວພັນຮ່ວມມືຂອງສອງອົງການນິຕິບັນຍັດ, ເຊື່ອໝັ້້ນວ່າ ສອງຝ່າຍໄດ້ມີການຮ່ວມມືໃກ້ຊິດນໍາກັນແລ້ວ ຈະສືບຕໍ່ເຂົ້າສູ່ລວງເລິກຕື່ມ ນຳເອົາຜົນປະໂຫຍດມາສູ່ ສອງປະເທດ; ສົມເດັດ ຊຸນຕານ ຖືໂອກາດເຊື້ອເຊີນປະທານສະພາແຫ່ງຊາດ ໄຊສົມພອນ ພົມວິຫານ ໄປຢ້ຽມຢາມ ປະເທດ ບລູໄນ ໃນເວລາທີ່ເຫັນວ່າມີຄວາມສະດວກ.
ທ່ານປະທານສະພາແຫ່ງຊາດຮັບວ່າ ຈະຈັດສັນເວລາຢ້ຽມຢາມ ປະເທດ ບຣູໄນ ຕາມຄວາມເໝາະສົມ.
