​            ຕອນແລງ ວັນທີ 22​ ກັນຍາ 2023​ ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມ ພົບປະແລກປ່ຽນບົດຮຽນ ລະຫວ່າງ ຄະນະເລຂາທິການ ສະພາປະຊາຊົນແຂວງ ແລະ​ ຫ້ອງວ່າການແຂວງ​ ຂຶ້ນໂດຍພາຍໃຕ້ການເປັນປະທານຮ່ວມຂອງທ່ານ ຄຳຟອງ ກົ້ວມີໄຊ ກຳມະການຄະນະປະຈຳ ເລຂາທິການສະພາປະຊາຊົນແຂວງ ແລະ​ ທ່ານ​ ບຸນລົມ ສີເມືອງວົງ ຮອງຫົວໜ້າຫ້ອງວ່າການແຂວງ,​ ກອງປະຊຸມຍັງໄດ້ເປັນກຽດຕ້ອນຮັບການເຂົ້າຮ່ວມເປັນປະທານກິດຕິມະສັກ ຂອງທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ ຮອງປະທານສະພາປະຊາຊົນ​ແຂວງ,​ ມີບັນດາທ່ານ ຮອງເລຂາທິການສະພາປະຊາຊົນແຂວງ, ຮອງຫົວໜ້າຫ້ອງວ່າການ, ຫົວໜ້າ, ຮອງຫົວໜ້າຂະ ແໜງ ຕະຫຼອດຮອດພະນັກງານ-ລັດຖະກອນ ທັງສອງພາກສ່ວນເຂົ້າຮ່ວມ.

               ໃນກອງປະຊຸມ ໄດ້ຮັບຟັງ ບົດລາຍງານ ກ່ຽວກັບຈັດຕັ້ງປະຕິບັດວຽກງານໄລຍະ 9 ເດືອນຜ່ານມາ ແລະ ທິດທາງແຜນການ 3 ເດືອນທ້າຍ ປີ 2023 ຂອງສອງພາກສ່ວນ ໃນນາມເປັນເສນາທິການ ໃຫ້ແກ່ຄະນະປະຈຳພັກແຂວງ, ຄະນະປະຈຳສະພາປະຊາຊົນແຂວງ, ຈາກນັ້ນ ຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄຳຄິດຄຳເຫັນຢ່າງກົງໄປກົງມາ, ແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະ ການຈັດຕັ້ງປະຕິບັດວຽກງານເປັນເສນາທິການໃຫ້ແກ່ການນຳຂັ້ນຂອງຕົນ; ການບໍລິຫານພິທີການ ວຽກງານພາຍໃນ ແລະ ວຽກງານຕ່າງປະເທດ; ການສັງລວມ, ວິເຄາະ, ວິໄຈຂໍ້ມູນ; ການປະສານງານດ້ານຂໍ້ມູນ ຈາກພາກສ່ວນຕ່າງໆ ໃນໄລຍະຜ່ານມາ ມີຂໍ້ສະດວກ ແລະ ຂໍ້ຫຍຸ້ງຍາກ ເພື່ອໃຫ້ຮັບຮູ້, ເຂົ້າໃຈແຈ້ງ ກ່ຽວກັບ ສິດ, ໜ້າທີ່ພາລະບົດບາດ ໃນການເຄື່ອນໄຫວວຽກງານ ຂອງກັນ ແລະ ກັນ ເພື່ອນຳມາເປັນບົດຮຽນໃນການປັບປຸງວຽກງານ, ຂອດການປະສານງານ ໃນການເປັນເສນາທິການໃຫ້ແກ່ການນຳ ຂັ້ນຂອງຕົນ ກໍ່ຄືວຽກງານ ຂອງທັງສອງພາກສ່ວນ ໃຫ້ມີຄວາມເປັນເອກະພາບໃນທິດດຽວກັນ ເພື່ອຖອດຖອນບົດຮຽນ ແລະ ສືບຕໍ່ປັບປຸງແກ້ໄຂໃຫ້ດີຂຶ້ນກວ່າເກົ່າ.

             ຕອນທ້າຍ ທ່ານ ຄອນປະພັນ ເລືອງສີຈັນທອງ ຍັງໄດ້ມີຄຳເຫັນໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນສຳເລັດການຈັດຕັ້ງປະຕິບັດວຽກງານ ຂອງສອງພາກສ່ວນໃນໄລຍະຜ່ານມາ ດ້ວຍຄວາມຮັບຜິດຊອບສູງ ແລະ ມີຜົນສຳເລັດໃນຫຼາຍໆດ້ານ, ພ້ອມນັ້ນ ທ່ານຍັງໄດ້ເໜັ້ນໜັກໃຫ້ທັງສອງພາກສ່ວນ ຈົ່ງພ້ອມກັນເອົາໃຈໃສ່ ປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດສູງ, ກຳຈັດບັນດາຈຸດອ່ອນຂໍ້ຄົງຄ້າງໃຫ້ໝົດໄປເທື່ອລະກ້າວ ພ້ອມທັງເສີມຂະຫຍາຍດ້ານດີຜົນງານ, ບົດຮຽນທີ່ຖອດຖອນໄດ້ ເພື່ອນຳໄປປັບປຸງກົນໄກການປະສານງານ, ແບບແຜນວິທີເຮັດວຽກ ທັງສອງພາກສ່ວນ ໃຫ້ມີຄວາມຄ່ອງຕົວ ແລະ ທັນສະໄໝ, ສືບຕໍ່ສ້າງເງື່ອນໄຂ ພົວພັນປະສານງານແລກປ່ຽນວຽກງານຮອບດ້ານເຊິ່ງກັນ ແລະ ກັນ ໃຫ້ນັບມື້ນັບດີຂຶ້ນເລື້ອຍໆ.

ພາບ ແລະ ຂ່າວ: ນາງ ປຸ້ຍນິຕາ ເພັງມີໄຊ.