ໃນລະຫວ່າງວັນທີ 11-12 ກັນຍາ 2023 ຢູ່ທີ່ສະໂມສອນຂອງຫ້ອງວ່າການເມືອງໝອກທ່ານ ນ. ສົມພອນ ໂສພິລາວັນ ຮອງປະທານສະພາປະຊາຊົນແຂວງ ພ້ອມດ້ວຍປະທານ-ຮອງປະທານຂອງບັນດາຄະນະກຳມະການ, ເລຂາທິການ ແລະ ທີມງານ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ມະຕິຕ່າງໆ.

                                ການລົງຕິດຕາມກວດກາໃນຄັ້ງນີ້ ໄດ້ຮັບຟັງການລາຍງານສະພາບ ການເຄື່ອນໄຫວວຽກງານ ແລະ ຈັດຕັ້ງປະຕິບັດລັດຖະທຳມະນູນ, ກົດໝາຍ ໃນໄລຍະຜ່ານມາຂອງເມືອງ ແລະ ຂະແໜງການທີ່ກ່ຽວຂ້ອງຂອງເມືອງ, ພ້ອມນັ້ນບັນດາທ່ານຄະນະທີມງານ ຍັງໄດ້ມີຄຳຄິດເຫັນ ແລະ ຄໍາຖາມເຈາະຈິ້ມ ທີ່ກ່ຽວພັນກັບຂົງເຂດວຽກງານຂອງເມືອງ ເປັນຕົ້ນແມ່ນວຽກງານການຂຸດຄົ້ນແຮ່ທາດ ຂອງບັນດາບໍລິສັດທີ່ມາລົງທຶນ, ການປະຕິບັດແຜນພັດທະນາເສດຖະກິດ-ສັງຄົມ, ການປະຕິບັດຄໍາຕັດສິນຂອງສານ, ການຊຸກຍູ້ການຜະລິດ, ການແກ້ໄຂບັນຫາຢາເສບຕິດ ແລະ ອື່ນໆອີກ; ຕິດພັນກັບການໂຄສະນາເຜີຍແຜ່ຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II. ພ້ອມທັງຮັບຟັງບັນດາຜູ້ແທນກອງປະຊຸມ ມີຄໍາສະເໜີຕໍ່ສະພາປະຊາຊົນແຂວງ ໃຫ້ຂັ້ນເທິ່ງຄົ້ນຄວ້າ ແລະ ຂໍທິດຊີ້ນຳ ເພື່ອສະດວກໃນການຈັດຕັ້ງປະຕິບັດໜ້າ ທີ່ວຽກງານ ໃຫ້ມີຄວາມ ຖືກຕ້ອງ ແລະ ສອດຄ່ອງກັບສະພາບ ຄວາມເປັນຈິງ. ຈາກນັ້ນທີມງານ ພ້ອມດ້ວຍການນໍາເມືອງ ແລະ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ ໄດ້ເດີນທາງໄປ ບ້ານນ້ຳຈາວໃຕ້ ເມືອງໝອກ ເພື່ອຮັບຟັງຄຳຄິດເຫັນຂອງພໍ່ແມ່ປະຊາຊົນ, ຈາກຜົນກະທົບ ຂອງການສໍາຫຼວດ ແລະ ຂຸດຄົ້ນແຮ່ທາດຕ່າງໆ ເພື່ອນໍາສະເໜີຂັ້ນເທິງແກ້ໄຂ ບັນຫາທີ່ຍັງຄົງຄ້າງໃຫ້ຖືກຕ້ອງ, ສອດຄອງ ແລະ ທ່ວງທັນກັບເວລາ.

                          ໃນໂອກາດລົງຊຸກຍູ້ ແລະ ຕິດຕາມກວດກາໃນຄັ້ງນີ້ ທ່ານ ນ. ສົມພອນ ໂສພິລາວັນ ຍັງໄດ້ໂອ້ລົມມີທິດຊີ້ນໍາ ໃຫ້ຄະນະພັກ, ຄະນະນໍາຂອງເມືອງ ຈົ່ງເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຂອງຕົນ ດ້ວຍຄວາມຈິງໃຈ, ໂປງໃສ ແລະ ຖືກຕ້ອງສອດຄ່ອງກັບລະບຽບກົດໝາຍ, ພົວພັນປະສານງານກັບຂະແໜງການທີ່ກ່ຽວຂ້ອງ ໃຫ້ກົມກຽວ ເພື່ອສະດວກໃນການຈັດຕັ້ງປະຕິບັດວຽກງານ.

ການລົງຕິດຕາມກວດກາໃນຄັ້ງນີ້ເຊິ່ງໄດ້ຮັບການສະໜັບສະໜູນໂດຍ ໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນແຂວງ (steps) ແລະ ມູນນິທິເອເຊຍ (The Asia Foundation)

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ