ເພື່ອຕິດຕາມ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາຕ່າງໆຕາມພາລະບົດບາດ, ຂອບເຂດສິດ ແລະ ໜ້າທີ່ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ9 ແລະ ສະມາຊິກສະພາປະຊາຊົນແຂວງທີ່ກໍານົດໄວ້ໃນກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ສະນັ້ນມາໃນລະຫວ່າງວັນທີ 5-6 ກັນຍາ 2023 ທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ ພ້ອມດ້ວຍພະນັກງານສະພາປະຊາຊົນແຂວງ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ມະຕິຂອງກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຢຸ່ເມືອງແປກ

 ໃນໂອກາດທີ່ໄດ້ລົງຕິດຕາມກວດກາໃນຄັ້ງນີ້, ທ່ານ ກົງທະນູ ອູ່ນສະຫວັນ ເລຂາພັກເມືອງ ເຈົ້າເມືອງແປກ ໄດ້ລາຍງານສະພາບ ການເຄື່ອນໄຫວວຽກງານຂອງຕົນໃນໄລຍະຜ່ານມາ ເຊິ່ງຍົກໃຫ້ເຫັນເຖິ່ງ ຂໍ້ສະດວກ, ຂໍ້ຫຍຸ້ງຍາກ ແລະ ສະພາບຄວາມເປັນຈິງຂອງການເຄື່ອນໄຫວວຽກງານ, ພ້ອມນັ້ນຄະນະສະມາຊິກສະພາປະຊາຊົນແຂວງ ຍັງໄດ້ມີເຈາະຈິ້ມຄໍາຖາມເຈາະຈິ້ມທີ່ກ່ຽວພັນກັບບັນດາຫ້ອງການຂອງເມືອງເປັນຕົ້ນແມ່ນວຽກງານການຂຸດຄົ້ນແຮ່ຂອງບັນດາບໍລິສັດທີ່ມາລົງທຶນຢູ່ພາຍໃນເມືອງ, ການປະຕິບັດແຜນພັດທະນາເສດຸະກິດ-ສັງຄົມຂອງເມືອງ, ການປະຕິບັດຄໍາຕັດສິນຂອງສານ, ການຊຸກຍູ້ການຜະລິດ, ບັນຫາຢາເສບຕິດ ແລະ ອື່ນໆອີກ. ນອກນັ້ນບັນດາຜູ້ແທນກອງປະຊຸມໄດ້ມີຄໍາສະເໜີຕໍ່ສະພາປະຊາຊົນແຂວງ ໃຫ້ຂັ້ນເທິ່ງຄົ້ນຄວ້າ ແລະ ຂໍທິດຊີ້ນຳ ເພື່ອສະດວກໃນການຈັດຕັ້ງປະຕິບັດໜ້າ ທີ່ວຽກງານ ໃຫ້ມີຄວາມ ຖືກຕ້ອງ ແລະ ສອດຄ່ອງກັບສະພາບ ຄວາມເປັນຈິງ. ໃນນັ້ນທີ​ມງານ​ທີ່​ມາ​ຈາກ​ ​ສະ​ພາ​ປະຊາຊົນ​ແຂວງ ພ້ອມດ້ວຍການນໍາເມືອງ ​ໄດ້​​​ເດີນ​ທາງ​ໄປ​ກຸ່ມ​ລາດບວກ ບ້ານໂພນ ​ເມືອງ​ແປກ ​​ແຂວງ​ຊຽງຂວາ​ງ ​ເພື່ອ​ໄປ​​ເບິ່ງ​ສະຖານ​ທີ່​ການ​ຂຸດ​ຄົ້ນ, ການ​ສໍາຫຼວ​ດຕົວ​ຈິງ ​ແລະ ​ເກັບ​ກໍາ​ຄໍາ​ຄິດ​ຄໍາ​ເຫັນ​ຂອງ​ປະຊາຊົນ​ຢູ່​ກຸ່ມ​ບ້ານ​ດັ່ງກ່າວທີ່​ຈະ​ໄດ້​ຮັບຜົນ​ກະທົບ​ ​ເພື່ອ​ນໍ​າສະ​ເໜີຂັ້ນເທິງ​ແກ້​ໄຂ​ໃຫ້​ຖືກຕ້ອງ ​ແລະ ທັນ​ເວລາ.

ນອກນັ້ນ ທ່ານ ວຽງໄຊ ສີວິໄລ ຍັງໄດ້ຊີ້ນໍາ ໃຫ້ຄະນະພັກ, ຄະນະນໍາອົງການປົກຄອງເມືອງແປກ ຈົ່ງຈັດຕັ້ງປະຕິບັດໜ້າທີ່ວຽກງານຂອງຕົນ ໃຫ້ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ ບົນພື້ນຖານສອດຄອງກັບລັດຖະທຳມະນູນ, ກົດໝາຍ, ສືບຕໍ່ປະຕິບັດສິດ ແລະ ໜ້າທີ່ຂອງຕົນ, ເອົາໃຈໃສ່ພົວພັນປະສານງານກັບຂະແໜງການທີ່ກ່ຽວຂ້ອງ ໃຫ້ຈອດກັນ ເພື່ອໃຫ້ສະດວກໃນການຈັດຕັ້ງປະຕິບັດວຽກງານ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ