ກອງປະຊຸມພົບປະແລກປ່ຽນບົດຮຽນລະຫວ່າງສະພາປະຊາຊົນແຂວງຫລວງນ້ຳທາກັບສະພາປະຊາຊົນແຂວງສາລະວັນ ໄດ້ຈັດຂຶ້ນໃນຕອນເຊົ້າຂອງວັນທີ 25 ກັນຍາ 2023 ຢູ່ທີ່ສະໂມສອນແຂວງສາລະວັນ ໂດຍການເປັນປະທານຮ່ວມຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫລວງນ້ຳທາ ແລະ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ ໃຫ້ກຽດເຂົ້າຮ່ວມມີຄະນະປະຈຳສະພາປະຊາຊົນແຂວງຫລວງນ້ຳທາແລະແຂວງສາລະວັນ, ຄະນະເລຂາທິການ, ປະທານ, ຮອງປະທານຄະນະກຳມະການ, ຫົວໜ້າ, ຮອງຫົວຫນ້າຂະແໜງ ພ້ອມດ້ວຍວິຊາການທັງສອງແຂວງເຂົ້າຮ່ວມທັງໝົດ 33ທ່ານ, ຍິງ 10ທ່ານ.

ໃນໂອກາດດັ່ງກ່າວໄດ້ຮັບຟັງບົດລາຍງານຫຍໍ້ການເຄື່ອນໄຫວວຽກງານຂອງສະພາປະຊາຊົນແຂວງສາລະວັນແລະຫລວງນ້ຳທາ

ພ້ອມນັ້ນທັງສອງແຂວງຍັງໄດ້ແລກປ່ຽນບົດຮຽນໃນຫົວຂໍ້ຕ່າງໆເປັນຕົ້ນແມ່ນການຈັດຕັ້ງປະຕິບັດ 3 ພາລະບົດບາດຄື ດ້ານນິຕິກຳ, ດ້ານການຕົກລົງບັນຫາສຳຄັນຂອງແຂວງ ແລະ ດ້ານການຕິດຕາມກວດກາ, ວຽກງານປະສານສົມທົບກັບອົງການປົກຄອງແຂວງ, ການດຳເນີນກອງປະຊຸມສະໄໝສາມັນ, ການຈັດຕັ້ງພະນັກງານ, ການປັບປຸງການຈັດຕັ້ງ,ການສ້າງຕັ້ງກົງຈັກຊ່ວຍວຽກຄະນະປະຈຳສະພາປະຊາຊົນແຂວງ ແລະ ຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງຢູ່ຊັ້ນເມືອງແລະວຽກງານອື່ນໆ

ທັງນີ້ກໍເພື່ອເປັນການແລກປ່ຽນບົດຮຽນເຊິ່ງກັນແລະກັນ ທັງເປັນການຮັດແໜ້ນຄວາມສາມັກຄີລະຫວ່າງສະພາປະຊາຊົນທັງສອງແຂວງແລະ ເພື່ອເຮັດໃຫ້ວຽກງານສະພາປະພາປະຊາຊົນແຂວງສະດວກວ່ອງໄວ, ມີຄຸນນະພາບຂຶ້ນເລື້ອຍໆ

ໂອກາດ ພົບປະແລກປ່ຽນບົດຮຽນກັບສະພາປະຊາຊົນແຂວງສາລະວັນ ໃນຄັ້ງນີ້ ຄະນະຜູ້ແທນສະພາປະຊາຊົນແຂວງສາລະວັນ ນໍາໂດຍທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ ພ້ອມດ້ວຍຄະນະ ໄດ້ນຳພາຄະນະຜູ້ແທນສະພາປະຊາຊົນແຂວງຫຼວງນຳ້ທາ ນຳພາໂດຍທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫຼວງນ້ຳທາ ພ້ອມດ້ວຍຄະນະ ໄປທ່ຽວຊົມເຂື່ອນໄຟຟ້າເຊເສັດ1, ຢ້ຽມຊົມສວນກາເຟ ບ້ານວັງຍາວ ເມືອງເລົ່າງາມ, ດື່ມນ້ຳຫມາກພ້າວນາໄຊ, ທ່ຽວຊົມ ຫໍໄຕປີດົກວັດກາງ ແລະ ຢ້ຽມຢາມບໍລິສັດຈຸງຢາອີຊີ ຊີມັງລາວຈໍາກັດຜູ້ດຽວ

                                                                                                                                                                                                        ໂດຍ ນາງ ອຳພອນ ສີປະເສີດ