ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ການເປີດສົກຮຽນໃໝ່ ສົກປີ 2023-2024 ຄຽງຄູ່ກັບລົງຕິດຕາມບັນດາໂຮງຮຽນທີ່ມີຄວາມແອອັດຂອງໂຮງ ຮຽນພາກລັດ ແລະ ພາກເອກະຊົນ, ເຊິ່ງໃນ ວັນທີ 27 ກັນຍາ 2023, ນໍາພາໂດຍ ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວວຽກງານຢູ່ທີ່ ໂຮງຮຽນນີຣາດາ ໂດຍການຕ້ອນຮັບຂອງ ທ່ານ ລຳພັນ ອຸ່ນມະໂນ, ຫົວໜ້າຂະແໜງຈັດຕັ້ງ ພະແນກການສຶກສາທິການ ແລະ ກິລາ ນວ, ມີ ຫົວໜ້າຫ້ອງການສຶກສາທິການ ແລະ ກິລາ ເມືອງຈັນທະບູລີ, ຜູ້ອຳນວຍການໂຮງຮຽນນີຣາດາ ພ້ອມດ້ວຍຄະນະອຳນວຍການ ຈຳນວນໜຶ່ງເຂົ້າຮ່ວມ.
ໃນການລົງເຄື່ອນໄຫວວຽກງານຄັ້ງນີ້, ທ່ານ ນາງ ນິລະພອນ ແກ້ວບຸນລ້ອມ, ຜູ້ອຳນວຍ ການໂຮງຮຽນນີຣາດາ ໄດ້ລາຍງານໃຫ້ຊາບວ່າ: ໂຮງຮຽນນີຣາດາ ເປັນໂຮງຮຽນເອກະຊົນທີ່ສອນຕາມຫຼັກສູດຂອງກະຊວງສຶກສາທິການ ແລະ ກິລາ ວາງອອກ ໂດຍປະຕິບັດຕາມ 5 ຫຼັກມູນການສຶກສາຄື: ຄຸນສົມບັດສຶກສາ, ປັນຍາສຶກສາ, ສີລະປະສຶກສາ, ພາລະສຶກສາ, ແຮງງານສຶກສາ ໂດຍມີວິໄສທັດ ເພື່ອສ້າງຊັບພະຍາກອນມະນຸນໃຫ້ມີພື້ນຖານຄວາມຮູ້ຄວາມສາມາດ, ເປັນພົນລະເມືອງດີຂອງຊາດ, ຮັກປະເທດຊາດ ແລະ ເພື່ອສ້າງສາປະເທດຊາດໃນອະນາຄົດ, ຍົກສູງການນໍາໃຊ້ພາສາອັງກິດໃຫ້ໄດ້ດີ, ມີຄຸນສົມ ບັດ, ມີຄວາມກ້າຫານ, ມີຄວາມສາມາດຮອບດ້ານ ແລະ ມັກຄົ້ນຄວ້າຮໍ່າຮຽນ. ໂຮງຮຽນນີຣາດາ ມີ 02 ສາຂາ ຄື: ສາຂາສີບຸນເຮືອງ ແລະ ສາຂາຈອມມະນີ, ໃນນີ້ ມີສະເພາະແຕ່ສາຂາ ສີບຸນເຮືອງ ທີ່ມີຊັ້ນອະນຸບານ ແລະ ຊັ້ນປະຖົມ ໂດຍລວມນັກຮຽນແຕ່ຊັ້ນອະນຸບານ ເຖີງ ມ.5 ທັງໝົດ 2,078 ນ້ອງ, ຍິງ 1,054 ນ້ອງ, ມີຈຳນວນຫ້ອງຮຽນ 74 ຫ້ອງ. ມີຈຳນວນຄູລວມທັງໝົດ 02 ສາຂາ ຈຳນວນ 147 ຄົນ, ຍິງ 117 ຄົນ, ໃນນີ້ ຄູຕ່າງປະເທດ 14 ຄົນ, ຍິງ 11 ຄົນ. ໂຮງຮຽນດັ່ງກ່າວ ມີສະຫວັດດີການຄູ ເປັນຕົ້ນ: ແກ້ໄຂຄ່າຮຽນລູກ ຫຼື ຫຼານທີ່ເກີດຈາກລູກຂອງຕົນເອງ ຫຼຸດ 10-20%/ເດືອນ, ແກ້ໄຂຄ່າຮຽນລູກ ຫຼື ຫຼານທີ່ເກີດຈາກລູກຂອງຄະນະວິຊາການ ຫຼຸດ 15-30%, ມີນະໂຍບາຍຕັດຊຸດ, ນະໂຍບາຍໃນການໄປປະຊຸມ ຫຼື ຝຶກອົບຮົມຕ່າງໆຕາມເງື່ອນໄຂ ແລະ ຍັງຊຸກຍູ້ໃຫ້ບັນດາຄູ-ພະນັກງານ ໃຫ້ເຂົ້າສະຫວັດດີການສັງຄົມ ທຸກຄົນອີກດ້ວຍ.
ໃນໂອກາດດັ່ງກ່າວ, ທ່ານ ນາງ ລຳພອຍ ສີອັກຄະຈັນ ໄດ້ສະແດງຄວາມຍ້ອງຍໍຊົມເຊີຍຕໍ່ໂຮງຮຽນ ເຊິ່ງເຫັນວ່າໂຮງຮຽນມີຄວາມເໝາະສົມ ໄດ້ປະຕິບັດຕາມລະບຽບຫຼັກການຕາມທີ່ໄດ້ກຳນົດ, ມີການປະຕິບັດນະໂຍບາຍທີ່ສູງ, ຄູອາຈານ ມີຄວາມສາມາດໃນການສິດສອນໃຫ້ນ້ອງນັກຮຽນມີຄວາມກ້າຫານ, ກ້າສະແດງອອກ ແລະ ພ້ອມດຽວກັນນັ້ນ, ກໍໄດ້ມີຄຳເຫັນແລກປ່ຽນ ແລະ ມີທິດຊີ້ນຳໃນການແກ້ໄຂບາງບັນຫາທີ່ທາງໂຮງຮຽນໄດ້ສະເໜີ ເປັນຕົ້ນ ບັນຫາການຈາລະຈອນ, ໃຫ້ມີການຍົກລະດັບຄູຮຽນຕໍ່ເນື່ອງລະບົບເສົາ-ອາທິດ, ສະໜອງປື້ມຄູ່ມືໃຫ້ຄົບທຸກວິຊາແກ່ບັນດາໂຮງຮຽນເອກະຊົນ ແລະ ອື່ນໆ ເຊິ່ງບັນດາຂໍ້ຫຍຸ້ງຍາກດັ່ງກ່າວ ແມ່ນນໍາສະເໜີແລກປ່ຽນຕໍ່ພາກສ່ວນກ່ຽວຂ້ອງຄົ້ນຄວ້າ, ປຶກສາຫາລືຫາວິທີແກ້ໄຂໃນຕໍ່ໜ້າ.