(ສພຊ) ໃນລະຫວ່າງວັນທີ 20-25 ກັນຍາ 2023 ຄະນະຜູ້ແທນກຳມາທິການບັນດາເຜົ່າ ນໍາໂດຍສະຫາຍ ຄຳຈັນ ໂສຕາປະເສີດ ກຳມະການຄະນະປະຈຳ, ປະທານກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ເດີນທາງຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ຕາມການເຊື້ອເຊີນ ຂອງປະທານສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ໃນຕອນເຊົ້າຂອງວັນທີ 21 ກັນຍາ 2023 ຄະນະຜູ້ແທນໄດ້ພົບປະສອງຝ່າຍກັບສະຫາຍ ອີ ແທັງ ຮ່າ ນຽກ ເກີດໍາ ກໍາມະການສູນກາງພັກກອມມູນິດຫວຽດນາມ, ປະທານສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍຄະນະ ທີ່ສະພາແຫ່ງຊາດ ສສ.ຫວຽດນາມ. ໃນການພົບປະຄັ້ງນີ້, ສະຫາຍ ປະທານກຳມາທິການ ໄດ້ມີຄໍາເຫັນວ່າ: ການຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ແມ່ນເປັນການສືບຕໍ່ຜົນການຢ້ຽມຢາມ ແລະ ເຮັດວຽກ ຢູ່ ສປປລາວ ຂອງ ສະຫາຍປະທານສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ແລະ ຄະນະ ໃນເດືອນກຸມພາ 2023 ຜ່ານມາ ທັງເປັນການປະຕິບັດບົດບັນທຶກການຮ່ວມມື ລະຫວ່າງ ສອງກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປລາວ ກັບ ສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ໃນການແລກປ່ຽນບົດຮຽນ ເຊິ່ງກັນ ແລະ ກັນ. ພ້ອມນີ້ ຍັງເປັນການເພີ່ມພູນຄູນສ້າງສາຍພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສອງອົງການຂອງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ໃຫ້ນັບມື້ ນັບກ້າວເຂົ້າສູ່ລວງເລິກ ແລະ ເປັນຮູບປະທໍາ ຂຶ້ນເທື່ອລະກ້າວ. ສໍາລັບວຽກທີ່ສົນທະນາ ແລະ ແລກປ່ຽນຮ່ວມກັນ ແມ່ນລົງເລິກກ່ຽວກັບວຽກງານຊົນເຜົ່າ ແລະ ວຽກງານພັດທະນາຊົນນະບົດ ແກ້ໄຂຄວາມທຸກຍາກ, ຜ່ານການຄົ້ນຄວ້າ ແມ່ນມີບັນຍາກາດດີ, ບັນດາສະຫາຍ ໄດ້ລາຍງານດ້ວຍຄວາມຈິງໃຈ; ສໍາລັບທິດທາງຮ່ວມມືໃນຕໍ່ໜ້າ ສືບຕໍ່ແລກປ່ຽນບົດຮຽນ ເຊິ່ງກັນ ແລະ ກັນ, ປະຕິບັດບົດບັນທຶກ ຂອງສອງພາກສ່ວນລົງນາມຮ່ວມກັນ. ຊຸກຍູ້ ແລະ ສ້າງເງື່ອນໄຂ ໃຫ້ສະພາປະຊາຊົນຂັ້ນທ້ອງຖິ່ນ ໂດຍສະເພາະບັນດາແຂວງທີ່ມີຊາຍແດນຕິດຈອດ ໄດ້ມີການພົບປະ, ແລກປ່ຽນບົດຮຽນ ແລະ ໄປມາຫາສູ່ ເຊິ່ງກັນ ແລະ ກັນ. ຈາກນັ້ນ, ສະຫາຍ ປະທານກຳມາທິການບັນດາເຜົ່າ ພ້ອມດ້ວຍຄະນະ ຍັງໄດ້ເຂົ້າຢ້ຽມຂໍ່ານັບສະຫາຍ ຫງວຽນ ຄັກ ດິ້ງ ກໍາມະການສູນກາງພັກ, ຮອງປະທານສະພາແຫ່ງຊາດ ແຫ່ງ ສສ.ຫວຽດນາມ ເຊິ່ງສະຫາຍກໍໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຊົມເຊີຍຕໍ່ຜົນສໍາເລັດໃນການເຄື່ອນໄຫວເຮັດວຽກ ຢູ່ ສສ.ຫວຽດນາມ ຂອງສະຫາຍ ປະທານກຳມາທິການບັນດາເຜົ່າ ໃນຄັ້ງນີ້ ພ້ອມອວຍພອນໃຫ້ສາຍພົວພັນມິດຕະພາບອັນສະຫງ່າ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ຈົ່ງໝັ້ນຄົງທະນົງແກ່ນຕະຫຼອດໄປ. ຕໍ່ຈາກນັ້ນ ສະຫາຍ ປະທານກຳມາທິການບັນດາເຜົ່າ ພ້ອມດ້ວຍຄະນະ ຍັງໄດ້ເຂົ້າຢ້ຽມຢາມ ສະຫາຍ ເຈືອງ ທິ ຮາແອງ ຮອງປະທານແນວໂຮມແຫ່ງຊາດ ແລະ ສະຫາຍ ໂຮ ອາ ເລັງ ຫົວໜ້າກຳມະການ ຊົນເຜົ່າ ຂອງລັດຖະບານ ຫວຽດນາມ.

ໃນຕອນບ່າຍຂອງວັນດຽວກັນ, ຄະນະກຳມາທິການບັນດາເຜົ່າ ແລະ ຄະນະຂອງສະພາຊົນຊາດ ສະພາແຫ່ງ ຊາດ ແຫ່ງ ສສ.ຫວຽດນາມ ກໍໄດ້ຮ່ວມກັນຈັດສຳມະນາ ໃນຫົວຂໍ້: “ ບົດຮຽນການຕິດຕາມການຈັດຕັ້ງປະຕິບັດນະໂຍບາຍ, ກົດໝາຍ ກ່ຽວກັບ ການອະນຸລັກ ແລະ ຂະຫຍາຍຄຸນຄ່າວັດທະນະທໍາຂອງບັນດາເຜົ່າ ລະຫວ່າງ ກໍາມາທິການບັນດາເຜົ່າ ສະພາແຫ່ຊາດ ແຫ່ງ ສປປລາວ ກັບ ສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ”ໂດຍການຜັດປ່ຽນກັນເປັນປະທານກອງປະຊຸມລະຫວ່າງສອງຝ່າຍ. ຝາຍ ລາວ ສະເໜີ 2 ຫົວຂໍ້ ຄື: 1. ການອະນຸລັກ ແລະ ເສີມຂະຫຍາຍຄຸນຄ່າວັດທະນະທຳຂອງຊົນເຜົ່າຢູ່ລາວ ແລະ 2. ບົດຮຽນໃນການກວດກາ ເພື່ອຮັບປະກັນດ້ານນະໂຍບາຍຊົນເຜົ່າ ຕິດພັນກັບການຫຼຸດຜ່ອນຄວາມທຸກຍາກ ເຂົ້າໃນຮ່າງກົດໝາຍ ແລະ ດຳລັດຕ່າງໆ. ຝ່າຍ ຫວຽດນາມ ສະເໜີ 6 ຫົວຂໍ້ ຄື: 1. ນະໂຍບາຍອະນຸລັກ ແລະ ເສີມຂະຫຍາຍຄຸນຄ່າວັດທະນະທຳມູນເຊື້ອອັນດີງາມຂອງຊົນເຜົ່າສ່ວນນ້ອຍ ຕິດພັນກັບການພັດທະນາການທ່ອງທ່ຽວ, 2. ຜົນສຳເລັດໃນການປະຕິບັດວຽກງານອະນຸລັກ ແລະ ເສີມຂະຫຍາຍຕົວຕົນວັດທະນະທຳຊົນເຜົ່າສ່ວນນ້ອຍ ແລະ ວຽກງານກໍ່ສ້າງໂຄງການຈຸດໝາຍແຫ່ງຊາດ ກ່ຽວກັບການຟື້ນຟູ ແລະ ພັດທະນາວັດທະນະທຳຫວຽດນາມ, 3. ນະໂຍບາຍສຳລັບເຂດຊົນເຜົ່າສ່ວນນ້ອຍ ແລະ ພູດອຍຢູ່ ຫວຽດນາມ, 4. ບົດຮຽນໃນການຕິດຕາມກວດກາ ການຫຼຸດຜ່ອນຄວາມທຸກຍາກແບບຍືນຍົງຢູ່ເຂດຊົນເຜົ່າ ສ່ວນນ້ອຍ ຢູ່ ຫວຽດນາມ, 5. ບັນດາຜົນສຳເລັດທີ່ຍາດໄດ້ ແລະ ບົດຮຽນໃນການສ້າງຊົນນະບົດໃໝ່ ຢູ່ເຂດຊົນເຜົ່າ ສ່ວນນ້ອຍ ຢູ່ ຫວຽດນາມ ແລະ 6. ນະໂຍບາຍ, ກົດໝາຍກ່ຽວກັບການສ້າງສາຊົນນະບົດໃໝ່ ຢູ່ເຂດຊົນເຜົ່າສ່ວນ ນ້ອຍຢູ່ ຫວຽດນາມ. ຫຼັງຈາກຂຶ້ນສະເໜີບົດສຳເລັດ ທັງສອງຄະນະ ກໍໄດ້ມີການຖາມ-ຕອບ, ແລກປ່ຽນຄໍາຄິດຄໍາເຫັນໃນບັນດາຫົວຂໍ້ທີ່ສອງຝ່າຍມີຄວາມສົນໃຈ.

ນອກຈາກນີ້, ຄະນະ ຍັງໄດ້ໄປຢ້ຽມຢາມໂຄງການສ້າງຊົນນະບົດ ຢູ່ແຂວງ ເທືືອ ທຽນ ເຫວ້ ແລະ ຢ້ຽມຊົມບັນດາໂຄງການຕົວແບບກ່ຽວກັບການພັດທະນາເສດຖະກິດ, ວັດທະນະທຳ, ການທ່ອງທ່ຽວ ຢູ່ນະຄອນດານັງ.

ຈາກນັ້ນ, ປະທານກຳມາທິການບັນດາເຜົ່າ ພ້ອມດ້ວຍຄະນະ ຍັງໄດ້ຢ້ຽມຢາມ ແລະ ເຮັດວຽກຮ່ວມກັບການນຳຄະນະກຳມະການ ສາສະໜາ ຂອງ ລັດຖະບານ ຫວຽດນາມຕື່ມອີກ.