(ສພຊ) ຄະນະຜູ້ແທນຄະນະສະມາຊິກສະພາແຫ່ງຊາດໜຸ່ມ ສະພາແຫ່ງຊາດ ແຫ່ງ ສປປລາວ ນໍາໂດຍ ສະຫາຍ ແກ້ວຈະເລີນ ເຊ່ຍຢິ້ງຢ່າງ ຮອງປະທານກໍາມາທິການບັນດາເຜົ່າ, ປະທານຄະນະສະມາຊິກສະພາແຫ່ງຊາດໜຸ່ມ ສະພາແຫ່ງຊາດລາວ ຊຸດທີ IX ພ້ອມດ້ວຍຄະນະ ສືບຕໍ່ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ໃນລະຫວ່າງວັນທີ 17-20 ກັນຍາ 2023 ພາຍຫຼັງເຂົ້າຮ່ວມກອງປະຊຸມສະມາຊິກລັດຖະສະພາໜຸ່ມໂລກ ຄັ້ງທີ 9 ຂອງສະຫະພັນລັດຖະສະພາສາກົນ (IPU) ທີ່ ສສ.ຫວຽດນາມ ເປັນເຈົ້າພາບ.
ຕອນແລງວັນທີ 18 ກັນຍາ 2023 ສະຫາຍ ແກ້ວຈະເລີນ ເຊ່ຍຢິ້ງຢ່າງ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ອີແທັງຮ່າ ນຽກເກີດໍາ ກຳມະການສູນກາງພັກກອມມູນິດຫວຽດນາມ, ຄະນະປະຈໍາສະພາແຫ່ງຊາດ, ປະທານສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ແລະ ພົບປະເຮັດວຽກກັບ ສະຫາຍ ດິງ ກົງ ສີ, ຮອງປະທານກຳມາທິການວັດທະນະທຳ, ສຶກສາ, ຮອງປະທານຜູ້ປະຈຳການ ຄະນະສະມາຊິກສະພາແຫ່ງຊາດໜຸ່ມ ສະພາແຫ່ງຊາດຫວຽດນາມ ຊຸດທີ XV ດ້ວຍບັນຍາກາດໄມຕີຈິດມິດຕະພາບອັນອົບອຸ່ນ, ສະໜິດສະໜົມຖານສະຫາຍອ້າຍນ້ອງ. ສອງຝ່າຍ ແຈ້ງສະພາບການພົ້ນເດັ່ນ ຂອງແຕ່ລະປະເທດ ໃຫ້ກັນຊາບ, ຕີລາຄາສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ເວົ້າລວມ, ເວົ້າສະເພາະ ການພົວພັນຮ່ວມມື ລະຫວ່າງ ສອງສະພາແຫ່ງຊາດລາວ-ຫວຽດນາມ ກໍຄືສອງຄະນະສະມາຊິກສະພາແຫ່ງຊາດໜຸ່ມລາວ-ຫວຽດນາມ ໃນໄລຍະຜ່ານມາ ພ້ອມທັງໄດ້ປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າ, ເປັນຕົ້ນແມ່ນການສືບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ທີ່ສອງປະທານສະພາແຫ່ງຊາດລາວ ແລະ ຫວຽດນາມ ໄດ້ລົງນາມຮ່ວມກັນ ໃນປີ 2022 ໃຫ້ມີປະສິດທິຜົນຍິ່ງຂຶ້ນກວ່າເກົ່າ. ສອງຝ່າຍ ສືບຕໍ່ແລກປ່ຽນຄະນະຜູ້ແທນນຳກັນ, ມີການສ້າງກິດຈະກຳຮ່ວມກັນ ແລະ ແລກປ່ຽນບົດຮຽນຂໍ້ມູນຂ່າວສານ ທີ່ຕິດພັນກັບການຈັດຕັ້ງປະຕິບັດພາລະບົດບາດດ້ານນິຕິບັນຍັດ ໂດຍສະເພາະກົນໄກ ແລະ ແບບແຜນວິທີເຮັດວຽກ ຂອງຄະນະສະມາຊິກສະພາແຫ່ງຊາດໜຸ່ມນຳກັນ ສືບຕໍ່ຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນການເຄື່ອນໄຫວວຽກງານ ໃນເວທີລັດຖະສະພາພາກພື້ນ ແລະ ສາກົນ ເຊັ່ນ: ໃນເວທີ ສະມັດຊາລັດຖະສະພາສາກົນ (IPU), ເວທີປຶກສາຫາລືລັດຖະສະພາອາຊີ-ປາຊີຟິກ (APPF), ສະມັດຊາລັດຖະສະພາລະຫວ່າງຊາດອາຊຽນ (AIPA) ແລະ ອື່ນໆ.
ວັນທີ 19 ກັນຍາ 2023 ຄະນະຜູ້ແທນຄະນະສະມາຊິກສະພາແຫ່ງຊາດໜຸ່ມ ສະພາແຫ່ງຊາດລາວ ໄດ້ເດີນທາງຢ້ຽມຢາມ ນະຄອນຮ່າຍຟອງ. ຄະນະຜູ້ແທນດັ່ງກ່າວ ໄດ້ເຂົ້າຢ້ຽມພົບປະ ສະຫາຍ ບຸ່ຍ ດຶກ ກວາງ ກຳມະການພັກນະຄອນ, ຮອງປະທານສະພາປະຊາຊົນນະຄອນຮ່າຍຟອງ ແລະ ຢ້ຽມຊົມພື້ນຖານດ້ານເສດຖະກິດ, ວັດທະນະທໍາ ແລະ ສະຖານທີ່ທ່ອງທ່ຽວ ຂອງນະຄອນຈໍານວນໜຶ່ງ.