ເພື່ອຮັບປະກັນໃຫ້ແກ່ການເຄື່ອນໄຫວ ແລະ ການຈັດຕັ້ງປະຕິບັດໜ້າທີ່ການເມືອງຕາມພາລະບົດບາດ, ສິດ ແລະ ໜ້າທີ່ທັງເປັນບ່ອນອີງໃຫ້ແກ່ການພົວພັນປະສານງານລະຫວ່າງຄະນະປະຈຳສະພາປະຊາຊົນແຂວງ ແລະ ຄະນະປະຈຳອົງການແນວລາວສ້າງຊາດແຂວງຫຼວງນໍ້າທາໃຫ້ໄດ້ຮັບຜົນດີ

ຕອນແລງວັນທີ 20 ກັນຍາ 2023 ສະພາປະຊາຊົນແຂວງຫລວງນ້ໍາທາ ໄດ້ຈັດພິທີເຊັນຂໍ້ຕົກລົງ ວ່າດ້ວຍການພົວພັນລະຫວ່າງ ຄະນະປະຈຳສະພາປະຊາຊົນແຂວງກັບຄະນະປະຈຳອົງການແນວລາວສ້າງຊາດແຂວງຫລວງນໍ້າທາ ຂຶ້ນທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຮ່ວມຂອງທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ແລະ ທ່ານ ບຸນປີ ໄລປະເສີດ ກຳມະການພັກແຂວງ ປະທານອົງການແນວລາວສ້າງຊາດແຂວງ ,ມີຮອງປະທານສະຫະພັນແມ່ຍິງແຂວງ, ສະຫະພັນນັກຮົບເກົ່າ, ຄະນະເລຂາທິການ, ມີບັນດາທ່ານຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການພາຍໃນສະພາປະຊາຊົນແຂວງເຂົ້າຮ່ວມເປັນສັກຂີພິຍານຢ່າງພ້ອມພຽງ.

ໃນພິທີໄດ້ຮັບຟັງຂໍ້ຕົກລົງ ວ່າດ້ວຍການພົວພັນລະຫວ່າງ ຄະນະປະຈຳສະພາປະຊາຊົນແຂວງກັບຄະນະປະຈຳອົງການແນວລາວສ້າງຊາດແຂວງຫລວງນໍ້າທາ, ເຊິ່ງລວມມີທັງໝົດ 5 ໝວດ,  22 ມາດຕາ;

ຕອນທ້າຍພິທີ ຍັງໄດ້ຮັບຟັງຄຳເຫັນໂອ້ລົມຂອງທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ກ່ອນອື່ນທ່ານໄດ້ເຫັນດີເປັນເອກະພາບຕໍ່ຂໍ້ຕົກລົງສະບັັບດັ່ງກ່າວ,  ເຊິ່ງເຫັນວ່າຂໍ້ຕົກລົງສະບັບນີ້ມີຄວາມໝາຍສໍາຄັນຫລາຍເພາະວ່າເປັນບ່ອນອີງໃນການພົວພັນປະສານງານ, ການຕິດຕາມກວດກາການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງກັບອົງການແນວລາວສ້າງຊາດແຂວງແລະ  ພ້ອມກັນນຳເອົາຂໍ້ຕົກລົງສະບັບດັ່ງກ່າວໄປຈັດຕັ້ງປະຕິບັດໃຫ້ໄດ້ຮັບຜົນດີ

ໂດຍ ນາງ ອໍາພອນ ສີປະເສີດ