ໃນລະຫວ່າງວັນທີ 18-19 ກັນຍາ 2023. ທ່ານ ປອ. ລີເບີ ລີບົວປາວ ປະທານກໍາມາທິການແຜນການ,ການເງີນ ແລະ ການກວດສອບ ສະພາແຫ່ງຊາດ ພ້ອມດ້ວຍຄະນະ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດການ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ, ການແກ້ໄຂຜົນການກວດສອບ ແລະ ກວດກາ, ການຈັດຕັ້ງປະຕິບັດບາງໂຄງການລົງທືນຂອງລັດ ຢູ່ແຂວງອັດຕະປື.

ໃນໂອກາດດັ່ງກ່າວ, ທີ່ຫ້ອງປະຊຸມສະພາປະຊາຊົນແຂວງ, ທ່ານ ປອ. ລີເບີ ລີບົວປາວ ພ້ອມດ້ວຍຄະນະ ໄດ້ຈັດກອງປະຊຸມເຮັດວຽກຮ່ວມກັບສະພາປະຊາຊົນແຂວງ ແລະ ພະແນກການທີ່ກ່ຽວຂ້ອງ, ໂດຍມີທ່ານ ນາງ ມີນາພອນ ໄຊສົມພູ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ແຂວງອັດຕະປື ປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ຄະນະກໍາມະການເສດຖະກິດແຜນການ ແລະ ການເງີນ, ພະແນກແຜນການ ແລະການລົງທືນ, ພະແນການເງີນ, ພະແນກໂຍທາທິການ ແລະ ຂົນສົ່ງ, ກອງບັນຊາການທະຫານ,  ຕາງໜ້າບໍລິສັດຮັບເໝົາໂຄງການ ແລະ ວີຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມ ທ່ານ ນາງ ມີນາພອນ ໄຊສົມພູ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານຂອງສະພາປະຊາຊົນແຂວງ ອັດຕະປື ກໍ່ຄືຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ເຊິ່ງຜ່ານມາມີທັງຂໍ້ສະດວກ ແລະ ຜົນສໍາເລັດໃນການຈັດຕັ້ງປະຕິບັດວຽກງານ ການຕິດຕາມກວດກາແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໄລຍະກາງສະໄໝຂອງແຜນການ 5 ປີ (2021-2025) ແລະ 6 ເດືອນຕົ້ນປີ 2023 ຕິດພັນກັບການປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ ແລະ ຮັບຟັງການລາຍງານ ຈາກບັນດາພະແນກການທີ່ກ່ຽວຂ້ອງ ເປັນຕົ້ນ: ພະແນກແຜນການ ແລະ ການລົງທຶນ, , ພະແນກການເງິນແຂວງ, ພະແນກໂຍທາທິການ ແລະ ຂົນສົ່ງ, ກ່ຽວກັບສະພາບການຈັດຕັ້ງປະຕິບັດວຽກງານໃນໄລຍະຜ່ານມາທີ່ສະແດງໃຫ້ເຫັນເຖິງຜົນສໍາເລັດ, ຂໍ້ສະດວກ, ຂໍ້ຫຍຸ້ງຍາກ, ສາເຫດ, ວີທີການ, ສິ່ງທ້າທາຍ ແລະ ມາດຕະການແກ້ໄຂ ຕໍ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ, ຈໍານວນການຈັດສັນທຶນໃຫ້ແກ່ໂຄງການລົງທຶນຂອງລັດ ປະຈໍາປີ 2023 ພາຍໃນແຂວງ, ການແກ້ໄຂໜີ້ສີ້ນຂອງໂຄງການລົງທຶນຂອງລັດ ໂດຍສະເພາະໜີ້ສີ້ນໂຄງການສໍາເລັດແລ້ວ 100% ແລະ ໜີ້ສີ້ນໂຄງການສືບຕໍ່, ການສົ່ງເສີມການລົງທຶນເອກະຊົນພາຍໃນ ແລະ ຕ່າງປະເທດ ໂດຍສະເພາະການປະຕິບັດວຽກງານຈຸດສຸມຂອງວາລະແຫ່ງຊາດ ໃນການສົ່ງເສີມການລົງທຶນ ເພື່ອຜະລິດທົດແທນການນໍາເຂົ້າ ແລະ ເປັນສີນຄ້າສົ່ງອອກ, ການແບ່ງຂັ້ນຄຸ້ມຄອງໃນການຈັດເກັບລາຍຮັບ ລະຫວ່າງສູນກາງ ແລະ ທ້ອງຖີ່ນ, ການດໍາເນີນແບ່ງຂັ້ນຄຸ້ມຄອງຂໍ້ມູນຖານລາຍຮັບ, ການແບ່ງຂັ້ນຄຸ້ມຄອງຫົວໜ່ວຍທຸລະກິດ, ການຈັດຕັ້ງປະຕິບັດມາດຕະການປະຢັດ ແລະ ຕ້ານການຟຸມເຟືອຍ ດໍາລັດເລກທີ 205/ລບ ແລະ ເລກທີ 599/ລບ, ການຈັດຕັ້ງປະຕິບັດການຫັນເປັນທັນສະໄໝການເກັບລາຍຮັບ-ລາຍຈ່າຍ, ການເກັບກູ້ລາຍຮັບຈາກຜົນການກວດສອບ-ກວດກາ, ສະພາບການເງີນເຟີ້, ການເຜີຍແຜ່ ແລະ ການຈັດຕັ້ງປະຕິບັດກົດໝາຍ ວ່າດ້ວຍການຄຸ້ມຄອງເງີນຕາຕ່າງປະເທດ,  ເພື່ອຮັບປະກັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ເພີ່ມທະວີການຄຸ້ມຄອງການລົງທຶນຂອງລັດໃຫ້ມີປະສິດທິພາບ ແລະ ປະສິດທິຜົນ ແນໃສ່ປະກອບສ່ວນເຂົ້າໃນການປະຕິບັດວາລະແຫ່ງຊາດ ກ່ຽວກັບການແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງິນ ໃຫ້ບັນລຸຕາມແຜນ ກໍຄືການປະຕິບັດແຜນພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຕາມທິດມີຄຸນນະພາບ, ໝັ້ນທ່ຽງ ແລະ ຍືນຍົງ ເວົ້າລວມ, ເວົ້າສະເພາະແມ່ນປະຕິບັດການຈັດສັນງົບປະມານ ລົງທຶນຂອງລັດໃຫ້ສອດຄ່ອງ ຕາມລັດຖະທໍາມະນູນ, ກົດໝາຍ ໃຫ້ມີຜົນສັກສິດ ແລະ ມີປະສິດທິພາບ, ຮັບປະກັນຄວາມຍຸຕິທໍາ, ມີຈຸດສຸມ, ເປັນບຸລິມະສິດ, ມີການກະຈາຍ ແລະ ການດຸນດ່ຽງການລົງທຶນ ລະຫວ່າງຂະແໜງການສູນກາງ ແລະ ທ້ອງຖິ່ນ ແລະ ລະຫວ່າງເຂດແຄວ້ນ ໃຫ້ສົມເຫດສົມຜົນ; ປັບປຸງຫຼັກການ ແລະ ກົນໄກການຈັດສັນງົບປະມານໃຫ້ຈະແຈ້ງ, ມີຄວາມໂລ່ງລ່ຽນ ແລະ ນໍາໃຊ້ເຕັກນິກການຈັດສັນງົບປະມານໃຫ້ທັນສະໄໝຫຼາຍຂຶ້ນ.

ທ່ານ ປອ ລີເບີ ລີບົວປາວ ຍັງໄດ້ຍ້ອງຍໍຊົມເຊີຍມາຍັງສະພາປະຊາຊົນແຂວງ ແລະ ບັນດາພະແນກການຕ່າງໆທີ່ກ່ຽວຂ້ອງ  ທີ່ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຕົນໄດ້ຮັບຜົນສຳເລັດເປັນກ້າວໆມາ ແລະ ຈະເປັນຂໍ້ມູນພື້ນຖານສໍາຄັນທີ່ຈະນໍາໄປຄົ້ນຄວ້າລາຍງານຕໍ່ຄະນະປະຈໍາສະພາແຫ່ງຊາດ ແລະ ຈົ່ງພ້ອມກັນສືບຕໍ່ເອົາໃຈໃສ່ຊຸກຍູ້ສົ່ງເສີມການຈັດຕັ້ງປະຕິບັດວຽກງານ ກໍຄືແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຄຽງຄູ່ກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນໃຫ້ປະສົບຜົນສໍາເລັດຕາມແຜນການທີ່ວາງໄວ້.

ຈາກນັ້ນ, ປະທານກໍາມາທິການແຜນການ, ການເງີນ ແລະ ການກວດສອບ ສະພາແຫ່ງຊາດ ພ້ອມດ້ວຍຄະນະ ໄດ້ຮ່ວມກັບທ່ານປະທານສະພາປະຊາຊົນແຂວງ ພ້ອມຄະນະ ແລະ ພາກສ່ວນທີ່ກ່ຽວຂ້ອງລົງເບິ່ງພື້ນທີ່ຕົວຈິງ ເພື່ອເກັບກໍາຂໍ້ມູນຄວາມຄືບໜ້າ ຂອງໂຄງການກໍ່ສ້າງເສັ້ນທາງຍຸດທະສາດລຽບຊາດແດນ ຢູ່ເຂດເມືອງສະໜາມໄຊ ແລະ ເມືອງພູວົງ ແຂວງອັດຕະປື.

(ວິນັດ)