ໃນວັນທີ 20 ກັນຍາ 2023 ຄະນະຈັດທຳລາຍການ ກົດໝາຍເພື່ອປະຊາຊົນ ຂອງກົມສື່ມວນຊົນ ຄະນະເລຂາທິການສະພາແຫ່ງຊາດ ໄດ້ລົງເຄື່ອນໄຫວສຳພາດ ຢູ່ແຂວງຄໍາມ່ວນ, ເຊິ່ງນໍາໂດຍທ່ານ ບຸນເກີດ ວົງໄຊຍາ ຮອງຫົວໜ້າກົມຄຸ້ມຄອງຫໍສະພາແຫ່ງຊາດ ທັງເປັນ ຄະນະຈັດທຳລາຍການ ກົດໝາຍເພື່ອປະຊາຊົນ ພ້ອມດ້ວຍ ຄະນະຈັດທຳລາຍການກົດໝາຍເພື່ອປະຊາຊົນ ສະພາແຫ່ງຊາດ.

    ຈຸດປະສົງໃນການລົງເຄື່ອນໄຫວຄັ້ງນີ້ ກໍເພື່ອເປັນການໂຄສະນາເຜີຍແຜ່ການເຄື່ອນໄຫວວຽກງານຂອງອົງການນິຕິບັນຍັດ ໂດຍສະເພາະ ແມ່ນການຈັດຕັ້ງປະຕິບັດວຽກງານຂອງ ສະພາປະຊາຊົນຂັ້ນແຂວງ; ເພື່ອຍົກໃຫ້ເຫັນການຄຸ້ມຄອງລັດ, ຄຸ້ມສັງຄົມດ້ວຍກົດໝາຍ ຢູ່ຂັ້ນທ້ອງຖິ່ນ; ເພື່ອໃຫ້ຂະແໜງ ຫຼື ອົງການທີ່ກ່ຽວຂ້ອງ ຍົກໃຫ້ເຫັນຮູບການ, ວິທີການ ແລະ ຂັ້ນຕອນໃນການໂຄສະນາເຜີຍແຜ່ກົດໝາຍ ພາຍຫລັງທີ່ ສະພາແຫ່ງຊາດ ໄດ້ຕົກລົງຮັບຮອງເອົາບັນດາກົດໝາຍໃນກອງປະຊຸມສະໄໝສາມັນແຕ່ລະຄັ້ງ. ສຳລັບເນື້ອໃນຂອງການສຳພາດ ແມ່ນສຳພາດໃນຮູບແບບການສົນທະນາ ແລະ ສຳພາດຖາມ-ຕອບ ໃນການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາ ເພື່ອໃຫ້ລາຍການອອກມາໃນຮູບແບບໃໝ່ ໂດຍໃຫ້ມີສາລະປະໂຫຍດແກ່ປະຊາຊົນຜູ້ຮັບຊົມລາຍການ ແລະ ມີສີສັນຂຶ້ນຕື່; ສ່ວນຜູ້ຖືກເຊີນສຳພາດມີ: ປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ, ປະທານສານປະຊາຊົນແຂວງ, ຮອງຫົວໜ້າພະແນກຍຸຕິທຳແຂວງ, ຮອງຫົວໜ້າອົງການໄອຍະການປະຊາຊົນແຂວງ, ຄະນະກອງບັນຊາການປກຊ-ປກສ ເມືອງບັ້ງໄຟ ແລະ ຄະນະຫ້ອງການຍຸຕິທໍາເມືອງເຊບັ້ງໄຟ.