ຕອນເຊົ້າຂອງວັນທີ 18 ກັນຍາ 2023ນີ້ ຢູ່ທີຫ້ອງປະຊຸມຂອງສະພາປະຊາຊົນແຂວງ ໄດ້ເປີດກອງປະຊຸມທາບທາມບຸກຄະລາກອນຂອງສະພາປະຊາຊົນແຂວງ ທີ່ຈະດຳລົງຕຳແໜ່ງເປັນຮອງເລຂາທິການ ສະພາປະຊາຊົນແຂວງ ໂດຍການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໃຫ້ກຽດເຂົ້າຮ່ວມມີຄະນະປະຈຳສະພາປະຊາຊົນແຂວງ ຄະນະຈັດຕັ້ງແຂວງ, ຄະນະເລຂາທິການ, ຫົວໜ້າ, ຮອງຫົວໜ້າຂະແຫນງ ພ້ອມດ້ວຍພະນັກງານວິຊາການພາຍໃນສະພາປະຊາຊົນແຂວງເຂົ້າຮ່ວມທັງຫມົດ 36 ຄົນ ຍິງ 17 ຄົນ

ໃນກອງປະຊຸມໄດ້ຮັບຟັງການຜ່ານດຳລັດຂອງລັດຖະບານເລກທີ 461/ສພຊ, ລົງວັນທີ 6 ຕຸລາ 2012 ວ່າດ້ວຍມາດຕະຖານຕຳແໜງບໍລິຫານຂອງລັດຖະກອນ ແຫ່ງ ສປປ ລາວ; ວາລະດຽວກັນ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ຍັງໄດ້ມີຄຳເຫັນຕໍ່ພະນັກງານລັດຖະກອນ ໃນການທາບທາມບຸກຄະລາກອນຂອງສະພາປະຊາຊົນແຂວງ ທີ່ຈະດຳລົງຕຳແໜ່ງເປັນຮອງເລຂາທິການ ສະພາປະຊາຊົນແຂວງ ນີ້ຕ້ອງທາບທາມເອົາບຸກຄະລາກອນທີ່ມີຄວາມຮູ້, ຄວາມສາມາດ, ມາດຖານເງື່ອນໄຂທີ່ຄົບຖ້ວນແທ້ ແລະ ໃຫ້ມີຄວາມຍຸຕິທຳໃນການທາບທາມ ເພື່ອໃຫ້ໄດ້ບຸກຄະລາກອນທີ່ມາຊີ້ນຳວຽກງານຮອງເລຂາທິການໃຫ້ດີຂື້ນເປັນກ້າວໆ; ພ້ອມດຽວກັນ ພະນັກງານລັດຖະກອນພາຍໃນສະພາປະຊາຊົນແຂວງ ໄດ້ທາບທາມເອົາບຸກຄະລາກອນຂອງສະພາປະຊາຊົນແຂວງ ທີ່ຈະດຳລົງຕຳແໜ່ງເປັນຮອງເລຂາທິການ ສະພາປະຊາຊົນແຂວງ ຊຶ່ງບຸກຄະລາກອນນຳມາທາບທາມຄັ້ງນີ້ ມີທັງໝົດ 7 ທ່ານ, ຍິງ 2 ທ່ານ ແລະ ໃຫ້ເລືອກເອົາ 1 ທ່ານ ເພື່ອດຳລົງຕຳແໜ່ງຮອງເລຂາທິການສະພາປະຊາຊົນແຂວງ.