ສະພາປະຊາຊົນແຂວງຄໍາມ່ວນ ໄດ້ຈັດພິທີປາຖະກາຖາ ເຜີຍແຜ່ມູນເຊື້ອວັນຍຶດອຳນາດ ຄົບຮອບ 48 ປີ, ວັນລັດຖະທຳມະນູນແຫ່ງ ສປປ ລາວ ຄົບຮອບ 32 ປີ ແລະ ວັນສ້າງຕັ້ງສະພາປະຊາຊົນ ຄົບຮອບ 45 ປີ; ຂຶ້ນໃນຕອນເຊົ້າຂອງວັນທີ 19 ກັນຍາ 2023 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໂດຍເປັນກຽດປາຖະກາຖາຂອງທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມພິທີມີບັນດາທ່ານ ຄະນະປະຈໍາສະພາປະຊາຊົນແຂວງຄໍາມ່ວນ, ຄະນະກໍາມະການ-ຄະນະເລຂາທິການສະພາປະຊາຊົນຂັ້ນແຂວງ, ຫົວໜ້າຂະແໜງ/ຮອງຫົວໜ້າຂະແໜງ ແລະ ຕະຫຼອດຮອດພະນັກງານ-ລັດຖະກອນພາຍໃນສະພາປະຊາຊົນແຂວງຄໍາມ່ວນ ເຂົ້າຮ່ວມຮັບຟັງ.

       ໃນພິທີທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງ ກໍ່ໄດ້ປາຖະກາຖາ ມູນເຊື້ອ ວັນຍຶດອໍານາດທົ່ວປະເທດ ສປປລາວ ຄົບຮອບ 78 ປີ, ເຊີ່ງທ່ານໄດ້ໃຫ້ຮູ້ວ່າ. ວັນຢຶດອຳນາດ 23 ສິງຫາ ແມ່ນວັນປະຫວັດສາດຂອງຊາດລາວເຮົາ ຊຶ່ງມີຄວາມໝາຍຄວາມສຳຄັນຫຼາຍ ສຳລັບປະຊາຊົນລາວທັງຊາດ ໂດຍປີນີ້ມີອາຍຸຄົບຮອບ 78 ປີ (23/8/1945-23/8/2023). ຕົ້ນສະຕະວັດທີ XX ພວກຈັກກະພັດຕ່າງດ້າວ ໄດ້ດຳເນີນການຮຸກຮານ ແລະ ຢຶດຄອງບັນດາປະເທດເປັນຫົວເມືອງຂຶ້ນ ແລະ ປະເທດລາວ ໄດ້ຕົກເປັນຫົວເມືອງຂຶ້ນຂອງຈັກກະພັດແບບເກົ່າ ໃນປີ 1893. ປະຊາຊົນລາວບັນດາເຜົ່າໄດ້ຈົມຢູ່ໃນຄວາມເປັນຂ້ອຍຂ້າຂອງພວກລ່າເມືອງຂຶ້ນຕ່າງດ້າວ ແລະ ຖືກຂູດຮີດຢ່າງແສນສາຫັດ. ເຖິງຢ່າງໃດກໍຕາມ, ຍ້ອນນ້ຳໃຈຮັກຊາດ ຄຽດແຄ້ນຕໍ່ການຮຸກຮານ ແລະ ການກົດຂີ່ຂູດຮີດຂອງພວກລ່າເມືອງຂຶ້ນ, ປະຊາຊົນລາວບັນດາເຜົ່າ ຈຶ່ງໄດ້ລຸກຮື້ຂຶ້ນຕໍ່ສູ້ ເພື່ອທວງເອົາຄວາມເປັນເອກະລາດ, ສິດເສລີພາບ ແລະ ຄວາມຢູ່ດີກິນດີຂອງຕົນ. ຂະບວນການທຳອິດ ແມ່ນເລີ່ມຈາກການລຸກຮື້ຂຶ້ນຕ້ານກັບພວກລ່າເມືອງຂຶ້ນແບບເກົ່າ ຂອງປະຊາຊົນແຂວງສະຫວັນນະເຂດ ພາຍໃຕ້ການນຳພາຂອງພໍ່ກະດວດ ຜູ້ຮັກຊາດ ໃນປີ 1901, ປີ 1916 ພາຍໃຕ້ການນຳພາຂອງເຈົ້າ ຟ້າເມືອງສິງ, ປີ 1920 ຂະບວນການຕໍ່ສູ້ຂອງນາຍຄູ ຄຳ ຢູ່ວຽງຈັນ, ຂະບວນການຕໍ່ສູ້ພາຍໃຕ້ການນຳພາຂອງເຈົ້າຟ້າປັດໃຈ ປີ 1918-1922 ແລະ ຂະບວນການອື່ນໆ,ໃນໄລຍະຕໍ່ມາ. ວັນຢຶດອຳນາດ 23/8/1975 ແມ່ນມີຄວາມໝາຍສຳຄັນຫຼາຍ ຊຶ່ງມັນແມ່ນໝາກຜົນແຫ່ງການຕໍ່ສູ້ປະຕິວັດອັນຍືດເຍື້ອຍາວນານຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກແມ່ນຜົນທີ່ເກີດຈາກຄວາມກ້າຫານປະດິດສ້າງແຫ່ງການນຳໃຊ້ 3 ບາດຄ້ອນຍຸດທະສາດ ເພື່ອຢຶດອຳນາດ ການປົກຄອງ ໃນປະເທດແບບ “ບົວບໍ່ຊໍ້ານໍ້າບໍ່ຂຸ່ນ”. ພ້ອມນີ້, ຍັງແມ່ນໄຊຊະນະຂອງແນວທາງປະຕິວັດອັນຖືກຕ້ອງ ແລະ ການນຳພາທີ່ສະຫຼາດສ່ອງໃສຂອງພັກ, ແມ່ນໄຊຊະນະຂອງກຳລັງແຮງແຫ່ງຄວາມສາມັກຄີເປັນຈິດໜຶ່ງໃຈດຽວກັນ ຂອງທົ່ວປວງຊົນທັງຊາດ, ຄວາມເປັນອັນໜຶ່ງອັນດຽວກັນຂອງກອງທັບ ແລະ ປະຊາຊົນລາວບັນດາເຜົ່າ. ພ້ອມນີ້ທ່ານຍັງໄດ້ກ່າວຕື່ມອີກວ່າ ເພື່ອສືບຕໍ່ເສີມຂະຫຍາຍມູນເຊື້ອ 23 ສິງຫາ ເຂົ້າໃນການພັດທະນາປະເທດຊາດ ຍິ່ງຕ້ອງເພີ່ມທະວີການສຶກສາອົບຮົມປະຊາຊົນລາວບັນດາເຜົ່າ ເປັນຕົ້ນຄົນຮຸ່ນໜຸ່ມໃຫ້ມີຄວາມຮັບຮູ້, ເຂົ້າໃຈກ່ຽວກັບມູນເຊື້ອ 23 ສິງຫາ ດ້ວຍຮູບການຕ່າງໆໃຫ້ກວ້າງຂວາງເລິກເຊິ່ງ, ຕັ້ງໜ້າປັບປຸງຮັດແໜ້ນຄວາມສາມັກຄີປອງດອງທົ່ວປວງຊົນ ພາຍໃຕ້ຮົ່ມທຸງຂອງພັກ, ຍົກສູງສະຕິລະວັງຕົວຕໍ່ກົນອຸບາຍຫັນປ່ຽນ ໂດຍສັນຕິຂອງພວກຄົນບໍ່ດີ, ເອົາໃຈໃສ່ຕ້ານ ແລະ ສະກັດກັ້ນສິ່ງຫຍໍ້ທໍ້ຕ່າງໆໃນສັງຄົມ. ເພີ່ມທະວີການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍໃຫ້ມີຄວາມສັກສິດ, ເຊີດຊູນ້ຳໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອພັດທະນາຕົນເອງ, ຄອບຄົວ ແລະ ປະເທດຊາດຫຼຸດພົ້ນອອກຈາກຄວາມທຸກຍາກ. ຈາກນັ້ນ ໃນພິທີ ທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ກໍ່ໄດ້ພັດປ່ຽນກັນຂື້ນປາຖະກາຖາ ວັນລັດຖະທຳມະນູນແຫ່ງ ສປປ ລາວ ຄົບຮອບ 32 ປີ ( 15 ສິງຫາ 1991 – 15 ສິງຫາ 2023), ແລະ ທ່ານ ສະເຫຼີກສັກ ແກ້ວຈັນທະລາ ຄະນະປະຈໍາສະພາປະຊາຊົນແຂວງ ເລົ່າມູນເຊື່ອ ວັນສ້າງຕັ້ງສະພາປະຊາຊົນ ຄົບຮອບ 45ປີ ( 4 ສິງຫາ 1978 – 4 ສິງຫາ 2023).