(ສພຊ) ຕ້ອນຮັບຄະນະຜູ້ແທນຂັ້ນສູງ ສະພາແຫ່ງຊາດອໍານາດປະຊາຊົນ ແຫ່ງ ສາທາລະນະລັດກູບາ ນໍາໂດຍ ສະຫາຍ ນາງ ແອນນາ ມາເລຍ ມາລີ ມາຊາໂດ ກຳມະການສູນກາງພັກກອມມູນິດກູບາ, ຮອງປະທານສະພາແຫ່ງຊາດອຳນາດປະຊາຊົນ, ຮອງປະທານສະພາແຫ່ງລັດ ສາທາລະນະລັດ ກູບາ ຢ້ຽມຢາມ ຢູ່ ສປປລາວ ຢ່າງເປັນທາງການ ໃນລະຫວ່າງວັນທີ 10-13 ກັນຍາ 2023.
ໃນໄລຍະຢ້ຽມຢາມ ຢູ ສປປລາວ, ຄະນະ ໄດ້ຢ້ຽມຂ່ຳນັບ ແລະ ພົບປະເຮັດວຽກກັບບັນດາການນຳຂັ້ນສູງ ຂອງ ສປປລາວ ດັ່ງນີ້:
ໃນຕອນເຊົ້າ ວັນທີ 11 ກັນຍາ 2023, ສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບ ແລະ ພົບປະສອງຝ່າຍກັບ ຄະນະຜູ້ແທນຂັ້ນສູງສະພາແຫ່ງຊາດອໍານາດປະຊາຊົນກູບາ ດ້ວຍບັນຍາກາດອົບອຸ່ນຖານສະຫາຍອ້າຍນ້ອງ. ສອງຝ່າຍ ແຈ້ງສະພາບການພົ້ນເດັ່ນ ຂອງແຕ່ລະປະເທດ ໃຫ້ກັນຊາບ, ຕີລາຄາຄືນການພົວພັນຮ່ວມມືທີ່ເປັນມູນເຊື້ອອັນດີງາມມາແຕ່ດົນນານ ລະຫວ່າງ ສອງປະເທດລາວ-ກູບາ ກໍຄືການພົວພັນຮ່ວມມື ລະຫວ່າງ ສອງສະພາແຫ່ງຊາດ ໃນໄລຍະຜ່ານມາ ພ້ອມທັງໄດ້ປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າ, ເປັນຕົ້ນແມ່ນ ການສືບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ທີ່ສອງປະທານສະພາ ລາວ ແລະ ກູບາ ໄດ້ລົງນາມຮ່ວມກັນ ໃນປີ 2019 ໃຫ້ມີປະສິດທິຜົນຍິ່ງຂຶ້ນກວ່າເກົ່າ. ສອງຝ່າຍ ໄດ້ເປັນເອກະພາບກັນຈະສືບຕໍ່ການແລກປ່ຽນຄະນະຜູ້ແທນຂັ້ນຕ່າງໆນຳກັນ, ແລກປ່ຽນຂໍ້ມູນຂ່າວສານ, ແລກປ່ຽນບົດຮຽນ ເຊິ່ງກັນ ແລະ ກັນ ໃນການຈັດຕັ້ງປະຕິບັດພາລະບົດບາດ ຂອງອົງການນິຕິບັນຍັດ, ສືບຕໍ່ຊຸກຍູ້ ແລະ ສົ່ງເສີມໃຫ້ຂະແໜງການທີ່ກ່ຽວຂ້ອງ ຂອງລັດຖະບານ ຂອງສອງປະເທດ ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງຕ່າງໆ ທີ່ໄດ້ລົງນາມຮ່ວມກັນ ໃຫ້ໄດ້ຮັບປະສິດທິຜົນສູງ ໂດຍສະເພາະຂະແໜງການທີ່ສອງປະເທດມີທ່າແຮງ ເຊັ່ນ: ການສຶກສາ-ກິລາ, ສາທາລະນະສຸກ, ຕຸລາການ ແລະ ອື່ນໆ; ນອກຈາກນີ້, ສອງຝ່າຍ ເຫັນດີເປັນເອກະພາບສືບຕໍ່ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ເພື່ອສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາ ແລະ ນໍາເອົາຜົນປະໂຫຍດມາສູ່ປະຊາຊົນສອງຊາດ.
ໃນຕອນບ່າຍຂອງວັນດຽວກັນ, ຄະນະຜູ້ແທນຂັ້ນສູງ ສະພາແຫ່ງຊາດອຳນາດປະຊາຊົນກູບາ ໄດ້ເຂົ້າຢ້ຽມຂ່ຳນັບ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈໍາການ ເລຂາທິການສູນກາງພັກ, ຮອງປະທານປະເທດ ແຫ່ງ ສປປລາວ ແລະ ສືບຕໍ່ເຂົ້າຢ້ຽມຂໍ່ານັບ ສະຫາຍ ປອ. ໄຊສົມພອນ ພົມວິຫານ ກຳມະ ການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ເຊິ່ງການນຳຂັ້ນສູງ ຂອງ 2 ປະເທດ ໄດ້ຕີລາຄາສູງມູນເຊື້ອການພົວພັນຮ່ວມມືລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໃນໄລຍະຜ່ານມາ ແລະ ເຫັນດີເປັນເອກະພາບ ໃນການສືບຕໍ່ເສີມຂະຫຍາຍສາຍພົວພັນດັ່ງກ່າວ ໃຫ້ນັບມື້ນັບມີປະສິດທິຜົນ.
ວັນທີ 12 ກັນຍາ 2023, ສະຫາຍ ນາງ ແອນນາ ມາເລຍ ມາລີ ມາຊາໂດ ພ້ອມດ້ວຍຄະນະຜູ້ແທນຂັ້ນສູງ ໄດ້ເດີນທາງດ້ວຍຂະບວນລົດໄຟດ່ວນລາວ-ຈີນ ໄປຢ້ຽມຢາມ ຢູ່ແຂວງຫຼວງພະບາງ. ຄະນະຜູ້ແທນດັ່ງກ່າວ ໄດ້ເຂົ້າຢ້ຽມພົບປະ ສະຫາຍ ຄໍາຂັນ ຈັນທະວີສຸກ ກຳມະການສູນກາງພັກ, ເຈົ້າແຂວງຫຼວງພະບາງ ແລະ ສືບຕໍ່ຢ້ຽມຊົມສະຖານທີ່ທ່ອງທ່ຽວ, ພື້ນຖານດ້ານເສດຖະກິດ ແລະ ວັດທະນະທໍາ ຂອງແຂວງຈໍານວນໜຶ່ງ.
ວັນທີ 13 ກັນຍາ 2023, ຄະນະຜູ້ແທນຂັ້ນສູງສະພາແຫ່ງຊາດອຳນາດປະຊາຊົນກູບາ ສືບຕໍ່ຢ້ຽມຢາມ ເຂດໂລຈິກສຕິກນະຄອນຫຼວງວຽງຈັນ, ຢ້ຽມຊົມຫໍພິພິຕະພັນໄມ້ຮ່ວມສະໄໝ ແລະ ພື້ນຖານວັດທະນະທຳ ຈຳນວນໜຶ່ງ ໃນນະຄອນຫຼວງວຽງຈັນ.