(ສພຊ) ເພື່ອຮັບປະກັນການປະເມີນຄວາມໄວ້ວາງໃຈ ໃນການປະຕິບັດໜ້າທີ່ບຸກຄະລາກອນ ທີ່ສະພາແຫ່ງຊາດ ເລືອກຕັ້ງ ແລະ ຮັບຮອງເອົາການແຕ່ງຕັ້ງ ໃຫ້ສຳເລັດຕາມແຜນການ, ມີປະສິດທິພາບ, ປະສິດທິຜົນ ໃຫ້ເປົ້າໝາຍທີ່ຖືກປະເມີນ ແລະ ການຈັດຕັ້ງຕ່າງໆທີ່ກ່ຽວຂ້ອງ ຮັບຮູ້ເຂົ້າໃຈລາຍລະອຽດກ່ຽວກັບການຂຽນບົດລາຍງານການປະຕິບັດໜ້າທີ່ຂອງຕົນ ໃຫ້ຖືກຕ້ອງຕາມແບບຟອມທີ່ໄດ້ກຳນົດໄວ້ມີເນື້ອໃນກະທັດຮັດ, ຄົບຖ້ວນ ແລະ ຈະແຈ້ງ. ໃນວັນທີ 11 ກັນຍາ 2023 ທີ່ສະພາແຫ່ງຊາດ ໄດ້ຈັດກອງປະຊຸມການເຜີຍແຜ່ແນະນຳການປະເມີນຄວາມໄວ້ວາງໃຈ ໃນການປະຕິບັດໜ້າທີ່ຂອງບຸກຄະລາກອນ ທີ່ສະພາແຫ່ງຊາດ ເລືອກຕັ້ງ ແລະ ຮັບຮອງເອົາການແຕ່ງຕັ້ງ ໂດຍການເປັນປະທານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ເຂົ້າຮ່ວມມີບັນດາຮອງປະທານສະພາແຫ່ງຊາດ, ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ 18 ເຂດ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຫ້ອງວ່າການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ຕາງໜ້າຫົວໜ້າຫ້ອງວ່າການສຳນັກງານປະທານປະເທດ, ຕາງໜ້າຫ້ອງການສານປະຊາຊົນສູງສຸດ ແລະ ພະນັກງານກ່ຽວຂ້ອງຈຳນວນໜຶ່ງ.

ກອງປະຊຸມໄດ້ຮັບຟັງການສະເໜີບົດຄຳແນະນຳ ຂອງຄະນະຮັບຜິດຊອບການປະເມີນ ເຊິ່ງມີບັນດາເອກະສານດັ່ງນີ້ ມະຕິ ຂອງຄະນະປະຈຳສະພາແຫ່ງຊາດ ວ່າດ້ວຍການປະເມີນຄວາມໄວ້ວາງໃຈ ໃນການປະຕິບັດໜ້າທີ່ບຸກຄະລາກອນ ທີ່ສະພາແຫ່ງຊາດ ເລືືອກຕັ້ງ ແລະ ຮັບຮອງເອົາການແຕ່ງຕັ້ງ ສະບັບເລກທີ 39/ຄປຈ, ລົງວັນທີ 24/2/2023; ຄຳແນະນຳຂອງຄະນະຮັບຜິດຊອບການປະເມີນຜົນ ກ່ຽວກັບການຂຽນບົດລາຍງານ ແລະ ຮ່າງບົດລາຍງານຂອງເປົ້າໝາຍທີ່ຖືກປະເມີນ.

ໂອກາດດັ່ງກ່າວ ປະທານກອງປະຊຸມ ຍັງໃຫ້ຮູ້ວ່າ: ສະພາແຫ່ງຊາດຊາດ ຊຸດທີ IX ຈະຈັດຕັ້ງການປະເມີນ 2 ຄັ້ງ ຄື: ຄັ້ງທີ 1 ກາງສະໄໝ (ຈະຈັດການປະເມີນໃນເດືອນພະຈິກ 2023 ນີ້) ແລະ ຄັ້ງທີ 2 ແມ່ນຈະປະເມີນ ໃນທ້າຍສະໄໝ (ປະມານກາງປີ 2025). ໃນນີ້, ຂໍແຈ້ງໃຫ້ຜູ້ແທນກອງປະຊຸມຮັບຊາບຕື່ມ ກ່ຽວກັບການປະເມີນຄວາມໄວ້ວາງໃຈ ຕໍ່ການປະຕິບັດໜ້າທີ່ວຽກງານຂອງການນຳຂັ້ນຕ່າງໆ ທີ່ໄດ້ດຳເນີນສຳເລັດແລ້ວໃນໄລຍະຜ່ານມາ (ໃນປີນີ້) ປະກອບມີ: ບັນດາສະຫາຍກຳມະການກົມການເມືອງສູນກາງພັກ, ກຳມະການສູນກາງສົມບູນ-ສຳຮອງສູນກາງພັກ, ອົງການຂັ້ນສູນກາງ, ຄະນະພັກກະຊວງ, ຄະນະພັກແຂວງ ແລະ ຄະນະພັກເມືອງ; ປະທານ-ຮອງປະທານສະພາປະຊາຊາຊົນຂັ້ນແຂວງ, ນະຄອນຫຼວງ ແລະ ບັນດາປະທານຄະນະກຳມະການ, ເລຂາທິການສະພາປະຊາຊົນຂັ້ນແຂວງ, ນະຄອນຫຼວງ; ເຈົ້າແຂວງ, ເຈົ້າຄອງນະຄອນຫຼວງ, ຮອງເຈົ້າແຂວງ, ຮອງເຈົ້າຄອງນະຄອນ ແລະ ບັນດາຫົວໜ້າພະແນກການຂອງແຂວງ ແລະ ເຈົ້າເມືອງ.