(ສພຊ) ເພື່ອຍົກລະດັບຂີດຄວາມສາມາດ ໃຫ້ແກ່ສະມາຊິກສະພາປະຊາຊົນຂັ້ນແຂວງ ແນໃສ່ເຮັດໃຫ້ສາມາດປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິຜົນ ໃຫ້ສະມາຊິກສະພາປະຊາຊົນຂັ້ນແຂວງ ມີຄວາມຮູ້ຄວາມເຂົ້າໃຈ ກ່ຽວກັບທັກສະທີ່ມີຄວາມຈໍາເປັນ ໃນການປະຕິບັດວຽກງານຕົວຈິງ ໃຫ້ມີຜົນສໍາເລັດດີຂຶ້ນ ເພື່ອແລກປ່ຽນ, ສົນທະນາກ່ຽວກັບບາງບົດຮຽນລະຫວ່າງວິທະຍາກອນ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານທີ່ເປັນເສນາທິການດ້ວຍກັນ ແນໃສ່ການຍົກລະດັບຄວາມຮັບຮູ້ ແລະ ຄວາມສາມາດໃນການ ປະຕິບັດໜ້າທີ່ການເມືອງໃຫ້ມີປະສິດທິຜົນດີ. ທັງຮັບປະກັນໃຫ້ແກ່ການປະຕິບັດພາລະບົດບາດ ຂອງສະມາຊິກສະພາ ໃນນາມເປັນຕົວແທນແຫ່ງສິດ ແລະ ຜົນປະໂຫຍດອັນຊອບທໍາ ຂອງປະຊາຊົນລາວບັນດາເຜົ່າ ແລະ ສ້າງຄວາມເຊື່ອໝັ້ນໄວ້ວາງໃຈຂອງປະຊາຊົນ ຕໍ່ສະມາຊິກສະພາໃຫ້ນັບມື້ສູງຂຶ້ນນັ້ນ ໃນວັນທີ 6 ສິງຫາ 2023 ທີ່ຫ້ອງປະຊຸມໃຫຍ່ຂອງແຂວງສາລະວັນ ໄດ້ມີກອງປະຊຸມການຍົກສູງຂີດຄວາມສາມາດດ້ານທັກສະການຕິດຕາມກວດກາ, ທັກສະການປະເມີນຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ, ການຊັກຖາມ ແລະ ການປະກອບຄຳເຫັນ, ການລົງພົບປະຜູ້ມີສິດເລືອກຕັ້ງ ໃຫ້ແກ່ສະມາຊິກສະພາປະຊາຊົນຂັ້ນແຂວງ. ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ມີຮອງຫົວໜ້າສູນເຝິກອົບຮົມ ແລະ ຂໍ້ມູນຂ່າວສານ, ສະມາຊິກສະພາປະຊາຊົນຂັ້ນແຂວງ 3 ແຂວງ ຄື: ຄໍາມ່ວນ, ສະຫວັນນະເຂດ ແລະ ສາລະວັນ; ນັກວິທະຍາກອນຮັບເຊີນຈາກສະພາແຫ່ງຊາດ, ຄະນະກົມ, ຄະນະພະແນກ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ສິນທະລາ ຫຼ້າສຸກສະໄໝ ປະທານກອງປະຊຸມ ໄດ້ກ່າວເປີດ ແລະ ມີຄໍາເຫັນເນັ້ນວ່າ: ຄະນະປະຈຳສະພາແຫ່ງຊາດ ເວລາໃດກໍໄດ້ຖືເປັນສຳຄັນວຽກງານຍົກສູງຂີດຄວາມສາມາດໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ວິຊາການ ທີ່ເປັນເສນາທິການໃຫ້ສະພາ ໂດຍມີການແຕ່ງຕັ້ງຄະນະຮັບຜິດຊອບ, ສ້າງແຜນດຳເນີນງານໃນແຕ່ລະໄລຍະ ແລະອະນຸມັດໃຫ້ວຽກງານດັ່ງກ່າວເຄື່ອນໄຫວຢ່າງຕໍ່ເນື່ອງ, ກອງປະຊຸມຄັ້ງນີ້ ແມ່ນສືບຕໍ່ຈັດຕັ້ງປະຕິບັດແຜນການ 5 ປີ (2021-2025) ແລະ ແຜນການປະຈໍາປີ 2023 ຂອງວຽກງານຍົກສູງຂີດຄວາມສາມາດ ໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ເຊິ່ງກອງປະຊຸມນີ້ ໄດ້ຈັດຂຶ້ນເປັນຄັ້ງທີ 6 ແລະ ມີ 4 ຫົວຂໍ້. ດັ່ງນັ້ນ, ຈຶ່ງຮຽກຮ້ອງມາຍັງບັນດາທ່ານ ທີ່ເຂົ້າຮ່ວມກອງປະຊຸມເຝິກອົບຮົມຄັ້ງນີ້ ຈົ່ງພ້ອມກັນສຸມສະຕິປັນຍາ ແລະ ນໍາໃຊ້ເວລາອັນມີຄຸນຄ່າເຂົ້າໃນການຟັງ, ການສົນທະນາ ແລະ ແລກປ່ຽນບົດຮຽນນຳກັນໃຫ້ເລິກເຊິ່ງ, ສາມາດນຳເອົາບົດຮຽນໄປຈັດຕັ້ງຜັນຂະຫຍາຍເຂົ້າໃນການປະຕິບັດພາລະບົດບາດຂອງຕົນໃຫ້ດີຂຶ້ນ.
ຈາກນັ້ນ, ກອງປະຊຸມ ໄດ້ຮັບຟັງການສະເໜີຫົວຂໍ້ກ່ຽວກັບ ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ທັກສະການຊັກຖາມ ແລະ ການປະກອບຄໍາເຫັນ ເຊິ່ງສະເໜີໂດຍ ທ່ານ ຄໍາສິງ ໄຊສົມແພງ ຮອງປະທານກໍາມາທິການວຽກງານ ສະມາຊິກສະພາແຫ່ງຊາດ, ຫົວຂໍ້ກ່ຽວກັບ ທັກສະການປະເມີນຜົນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ສະເໜີໂດຍ ທ່ານ ສາຍທອງ ພົມມະວົງ ຫົວໜ້າກົມແຜນການ ແລະ ການລົງທຶນ ແລະ ຫົວຂໍ້ກ່ຽວກັບ ທັກສະການພົບປະ ປະຊາຊົນ ຂອງສະມາຊິກສະພາປະຊາຊົນແຂວງ ສະເໜີໂດຍ ທ່ານ ນາງ ບົວວັນ ທຳມະວົງ ຮອງຫົວໜ້າສູນເຝິກອົບຮົມ ແລະ ຂໍ້ມູນຂ່າວສານ ສະຖາບັນຄົ້ນຄວ້ານິຕິກຳສະພາແຫ່ງຊາດ; ໃນພິທີ ຜູ້ເຂົ້າຮ່ວມໄດ້ສຸມໃສ່ຄົ້ນຄວ້າ, ປະກອບຄຳຄິດຄຳເຫັນ ແລະ ສົນທະນາແລກປ່ຽນບົດຮຽນກັບນັກວິທະຍາກອນຢ່າງກົງໄປກົງມາ ກ່ຽວກັບຫົວຂໍ້ຕ່າງໆ ທີ່ໄດ້ນໍາມາສະເໜີໃນກອງປະຊຸມຄັ້ງນີ້ ເພື່ອສ້າງຂີດຄວາມສາມາດ ການປະຕິບັດພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາປະຊາຊົນຂັ້ນແຂວງ ໃຫ້ມີປະສິດທິພາບ ແລະ ປະສິດທິຜົນດີຂຶ້ນ.
ກອງປະຊຸມຄັ້ງນີ້ ແມ່ນຈະໄດ້ດຳເນີນໄປຮອດວັນທີ 7 ສິງຫາ 2023 ຈຶ່ງຈະສຳເລັດ ໂດຍໄດ້ຮັບການສະໜັບສະໜູນດ້ານງົບປະມານນໍາໃຊ້ງົບປະມານຊ່ວຍເຫຼືອລ້າຈາກອົງການຈັດຕັ້ງສາກົນ ແລະງົບປະມານສົມທົບຈາກຄະນະເລຂາທິການສະພາແຫ່ງຊາດ.
(ພາບ ແລະ ຂ່າວ: ນາງ ກົງໃຈ ແສງອໍາພັນ)