ໃນລະຫວ່າງວັນທີ 27-28 ສິງຫາ 2023, ທ່ານ ສົມມາດ ພົລເສນາ ກຳມະການສູນກາງພັກ, ຮອງປະທານສະພາແຫ່ງຊາດ ສົມທົບກັບ ທ່ານ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງຈໍາປາສັກ, ທ່ານ ນາງ ບຸນມີ ຈຸນລະຈັກ ຮອງຫົວໜ້າສະຖາບັນການເມືອງ-ການປົກຄອງແຫ່ງຊາດ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງຂອງ 3 ເມືອງ ພ້ອມດ້ວຍຄະນະ ໄດ້ເຄື່ອນໄຫວພົບປະຢ້ຽມຢາມ ປະຊາຊົນບ້ານກຽດໂງ້ງ-ເມືອງປະທຸມພອນ, ບ້ານລົ່ມສັກເໜືອ ເມືອງບາຈຽງຈະເລີນສຸກ, ບ້ານຫິນລາດ ແລະ ບ້ານໜອງໂນ, ເມືອງຊະນະສົມບູນ, ແຂວງຈໍາປາສັກ ໂດຍໄດ້ຮັບການຕ້ອນຮັບຈາກອໍານາດການປົກຄອງເມືອງ, ອໍານາດການປົກຄອງບ້ານ ແລະ ພໍ່ແມ່ປະຊາຊົນຢ່າງອົບອຸ່ນ.

ການເຄື່ອນໄຫວຂອງທ່ານຮອງປະທານສະພາແຫ່ງຊາດ ພ້ອມດ້ວຍຄະນະໃນຄັ້ງນີ້, ເປັນການພົບປະຢ້ຽມຢາມຖາມຂ່າວພໍ່ແມ່ປະຊາຊົນຜູ້ມີສິດເລືອກຕັ້ງ, ຕິດພັນກັບການນໍາເອົາເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຈໍາປາສັກ ຊຸດທີ II ທີ່ໄດ້ພິຈາລະນາ ຮັບຮອງ ຫຼາຍບັນຫາສໍາຄັນພື້ນຖານຂອງຊາດ ແລະຂອງແຂວງຈໍາປາສັກ ເຜີຍແຜ່ໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງໄດ້ຮັບຮູ້ເຂົ້າໃຈຢ່າງເລິກເຊິ່ງ. ຄຽງຄູ່ກັບການພົບປະແລກປ່ຽນ, ຮັບຟັງການລາຍງານ ແລະ ຄໍາຄິດເຫັນ, ຄໍາສະເໜີ ຂອງອໍານາດການປົກຄອງ ແລະ ພໍ່ແມ່ປະຊາຊົນ ໂດຍພໍ່ແມ່ປະຊາຊົນສະເໜີຫຼາຍບັນຫາທີ່ພົວພັນເຖິງການຄຸ້ມຄອງບໍລິຫານລັດ, ການພັດທະນາເສດຖະກິດ-ສັງຄົມ, ການພັດທະນາທີ່ມີຜົນກະທົບຕໍ່ສັງຄົມ, ສິ່ງແວດລ້ອມ ແລະ ຊີວີດການເປັນຢູ່ຂອງປະຊາຊົນ ຕໍ່ກັບຄໍາສະເໜີຂອງປະຊາຊົນ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຊີ້ແຈ້ງອະທິບາຍຕໍ່ບາງບັນຫາຄໍາສະເໜີໃຫ້ປະຊາຊົນໄດ້ເຂົ້າໃຈ ສ່ວນຄໍາສະເໜີທີ່ເປັນບັນຫາໃຫຍ່ ແລະພົວພັນກັບຂະແໜ່ງການຂອງພາກລັດ ແລະເອກະຊົນ ກອງເລຂາກອງປະຊຸມໄດ້ບັນທຶກສັງລວມ ເພື່ອນໍາໄປລາຍງານຕໍ່ຄະນະປະຈໍາສະພາປະຊາຊົນແຂວງຈໍາປາສັກ ຄົ້ນຄວ້າພິຈາລະນາ ປະສານສົມທົບຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ. ການລົງເຄື່ອນໄຫວບັນດາທ່ານຜູ້ແທນໃນຄັ້ງນີ້, ຍັງໄດ້ນໍາເອົາອຸປະກອນການສຶກສາ ແລະ ກິລາ ຈໍານວນໜຶ່ງມອບໃຫ້ແກ່ໂຮງຮຽນຂອງທັງ 4 ບ້ານຂອງ 3 ເມືອງອີກດ້ວຍ.

(ພາບ-ຂ່າວ: ສພຂ.ຈສ)