ໃນຕອນເຊົ້າຂອງວັນທີ 6 ກັນຍາ 2023 ນີ້ ຢູ່ທີ່ສະພາປະຊາຊົນແຂວງຈໍາປາສັກ ໄດ້ຈັດພິທີປະກາດພະນັກງານອອກພັກຜ່ອນ-ຮັບອຸດໜູນບໍານານ ແລະ ບໍາເນັດ ໃຫ້ກຽດຂົ້າຮ່ວມເປັນປະທານຂອງ ທ່ານ ສົມສີ ມະນີນິນ ກໍາມະການພັກແຂວງ, ຮອງປະທານຄະນະປະຈໍາສະພາປະຊາຊົນແຂວງ ມີບັນດາທ່ານໃນຄະນະປະຈໍາ, ຄະນະກໍາມະການຂອງສະພາປະຊາຊົນແຂວງ, ຕາງໜ້າພະແນກພາຍໃນແຂວງ ແລະ ແຂກຖຶກເຊີນຈາກກົມກອງອ້ອມຂ້າງ, ຫົວໜ້າ-ຮອງຫົວໜ້າຂະແໜງ ແລະ ວິຊາການຂອງສະພາປະຊາຊົນແຂວງເຂົ້າຮ່ວມ.

ໃນພິທີ ທ່ານ.ແສງອາທິດ ຂັນດາຣາ ຮອງຫົວໜ້າພະແນກພາຍໃນແຂວງ ໄດ້ໃຫ້ກຽດຜ່ານຂໍ້ຕົກລົງຂອງເຈົ້າແຂວງ ສະບັບເລກທີ 776 ແລະ ສະບັບເລກທີ 777/ຈຂ.ຈສ  ລົງວັນທີ 27 ມີຖຸນາ 2023, ວ່າດ້ວຍການອະນຸມັດໃຫ້ພະນັກງານ-ລັດຖະກອນອອກພັກຜ່ອນ-ຮັບອຸດໜູນບໍານານມີ 2 ທ່ານຄື: ທ່ານ ສາຍໃຈ ໄຊມົນຕີ ຫົວໜ້າຂະແໜງຈັດຕັ້ງ ແລະ ທ່ານ ສີໃສ ໄຊອາສາ ວິຊາການຂະແໜງບໍລິຫານ ແລະ ພິທີການ ຜ່ານຂໍ້ຕົກລົງຂໍ້ຕົກລົງຂອງເຈົ້າແຂວງ ສະບັບເລກທີ 88/ຈຂ.ຈສ, ລົງວັນທີ 31 ມັງກອນ 2023 ວ່າດ້ວຍການອະນຸມັດໃຫ້ພະນັກງານ-ລັດຖະກອນອອກພັກຜ່ອນ-ຮັບອຸດໜູນບໍາເນັດ 1 ທ່ານຄື: ທ່ານ ນາງ ພູມສະຫວັນ ຄໍາລືຊາ ຮອງເລຂາທິການສະພາປະຊາຊົນແຂວງ.

ຕອນທ້າຍ ທ່ານ ສົມສີ ມະນີນິນ ກໍາມະການພັກແຂວງ,​ ຮອງປະທານຄະນະປະຈໍາສະພາປະຊາຊົນແຂວງ ໄດ້ມີຄໍາເຫັນໂອ້ລົມຕໍ່ພິທີ ເຊິ່ງທ່ານຍົກໃຫ້ເຫັນບາງເນື້ອໃນຂອງກົດໝາຍ ວ່າດ້ວຍພະນັກງານ-ລັດຖະກອນ ທີ່ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຈັດຕັ້ງ ການເຄື່ອນໄຫວ, ການຄຸ້ມຄອງ, ການຕິດຕາມ ກວດກາວຽກງານພະນັກງານ-ລັດຖະກອນ ຢ່າງຖືກຕ້ອງງ, ເປັນລະບົບ, ມີຄວາມໜັກແໜ້ນ ແລະ ເຂັ້ມແຂງ ໂດຍສະເພາະເນື້ອໃນໃນມາດຕາ 64 ແລະ ມາດຕາ 70 ກ່ຽວກັບການສີ້ນສຸດການເປັນພະນັກງານ-ລັດຖະກອນ ແລະ ຮັບອຸດໜູນບໍານານ ທີ່ກໍານົດເງື່ອນໄຂການຮັບອຸດໜຸນບໍານານຂອງພະນັກງານ-ລັດຖະກອນຢ່າງລະອຽດ. ໂອກາດດຽວກັນ, ທ່ານຮອງປະທານຄະນະປະຈໍາສະພາປະຊາຊົນແຂວງຍັງໄດ້ສະແດງຄວາມຊົມເຊີຍຕໍ່ພະນັກງານທີ່ພັກຜ່ອນຮັບອຸດໜູນບໍານານ ແລະ ບໍາເນັດ ທີ່ມີຜົນງານໃນການທຸ້ມເທສະຕິປັນຍານໍາພາ-ຊີ້ນໍາປະຕິບັດຫນ້າທີ່ການເມືອງຂອງການຈັດຕັ້ງພັກ-ລັດມອບໃຫ້ ຍາດໄດ້ຜົນສໍາເລັດຢ່າງໃຫຍ່ຫຼວງຕະຫຼອດມາ.

(ພາບ-ຂ່າວ: ສົມວິຈິດ ໄຊມົນຕີ)