ໃນຕອນເຊົ້າຂອງວັນທີ 31 ສິງຫາ 2023 ທີ່ຜ່ານມາ ຄະນະປະຈໍາສະພາປະຊາຊົນແຂວງຈໍາປາສັກ ໄດ້ເປີດກອງປະຊຸມປະຈໍາເດືອນສິງຫາ 2023 ຂື້ນ ຢູ່ທີ່ຫ້ອງປະຊຸມຂອງສະພາປະຊາຊົນແຂວງ ໂດຍພາຍໃຕ້ການເປັນປະທານຂອງ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງຈໍາປາສັກ ມີບັນດາທ່ານຮອງປະທານ, ຄະນະປະຈໍາ, ຄະນະກຳມະການ, ຄະນະເລຂາທິການ ແລະ ວິຊາການຂອງສະພາປະຊາຊົນແຂວງເຂົ້າຮ່ວມ.

ກອງປະຊຸມໄດ້ຄົ້ນຄວ້າ ພິຈາລະນາ ຫຼາຍບັນຫາສໍາຄັນຄື: ຮັບຟັງການຜ່ານຮ່າງບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານ ຂອງຄະນະປະຈໍາສະພາປະຊາຊົນແຂວງ ປະຈໍາເດືອນສິງຫາ 2023 ແລະ ແຜນການເຄື່ອນໄຫວປະຈໍາເດືອນກັນຍາ 2023 ຈາກທ່ານ ແພງວິໄລ ສີອາລຸນ ຮອງເລຂາທິການສະພາປະຊາຊົນແຂວງ; ກອງປະຊຸມໄດ້ຮັບຟັງການຜ່ານຮ່າງບົດສະຫຼຸບຕີລາຄາຄືນການດຳເນີນກອງປະຊຸມສະໄໝສາມັນເທື່ອທີ 05ຂອງສະພາປະຊາຊົນແຂວງຈໍາປາສັກ ຊຸດທີ II ຈາກ ທ່ານ ສົມສີ ມະນີນິນ ຮອງປະທານຄະນະປະຈໍາສະພາປະຊາຊົນແຂວງ. ຈາກນັ້ນ, ບັນດາທ່ານໃນຄະນະປະຈໍາສະພາປະຊາຊົນແຂວງ ໄດ້ຄົ້ນຄວ້າປະກອບຄໍາເຫັນ ເພື່ອປັບປຸງເນື້ອໃນຂອງເອກະສານຕ່າງໆທີ່ນໍາເຂົ້າມາຄົ້ນຄວ້າພິຈາລະ ໂດຍສະເພາະເນື້ອໃນຮ່າງບົດສະຫຼຸບຕີລາຄາຄືນການດຳເນີນກອງປະຊຸມສະໄໝສາມັນເທື່ອທີ 05 ຂອງສະພາປະຊາຊົນແຂວງຈໍາປາສັກ ຊຸດທີ II ທີ່ເຫັນໄດ້ຈຸດດີ ແລະ ຈຸດອ່ອນບາງດ້ານທີ່ສາມາດຖອດຖອນໄດ້ ເພຶ່ອປັບປຸງແກ້ໄຂໃນຕໍ່ໜ້າ. ນອນນີ້, ກອງປະຊຸມຍັງໄດ້ຄົ້ນຄວ້າປົກສາຫາລື ເອກະສານສໍາຄັນ ທີ່ອົງການປົກຄອງແຂວງສະເໜີຕໍ່ສະພາປະຊາຊົນແຂວງ ແລະ ຮັບຟັງການລາຍງານຜົນການຕິດຕາມກວດກາ ໃນສາມຂົງເຂດວຽກງານຈາກສາມຄະນະກໍາມະການຂອງສະພາປະຊາຊົນແຂວງ ແລະ ແຜນການເຄື່ອນໄຫວເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຈໍາປາສັກ ຊຸດທີ II  ແລະ ວຽກງານປິ່ນອ້ອມອີກຈໍານວນໜຶ່ງ.

ໃນຕອນທ້າຍ, ທ່ານ ສາຍທອງ ໄຊຍະວົງ ປະທານກອງປະຊຸມ ໄດ້ມີຄໍາເຫັນສະຫຼຸບ ແລະ ຊີ້ນໍາຕໍ່ກອງປະຊຸມ ເພື່ອສືບຕໍ່ຈັດຕັ້ງປະຕິບັດວຽກງານ ແລະ ແຜນການເຄື່ອນໄຫວໃນເດືອນຕໍ່ໜ້າ ເຊິ່ງທ່ານໄດ້ເນັ້ນໃຫ້ບັນດາຄະນະກໍາມະການ ແລະ ຄະນະເລຂາທິການ ສືບຕໍ່ກະກຽມຄວາມພ້ອມໃນການຈັດຕັ້ງປະຕິບັດວຽກງານຂອງຕົນ ຕາມພາລະບົດບາດ, ສິດ ແລະໜ້າທີ່ ທີ່ກຳນົດໄວ້ໃນລັດຖະທໍາມະນູນ, ກົດໝາຍ ແລະ ແຜນການເຄື່ອນໄຫວຂອງຕົນ. ພ້ອມກັນສຸມໃສ່ວຽກງານໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 05 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນແຂວງຈໍາປາສັກ ຊຸດທີ II ໃຫ້ສັງຄົມ ແລະ ປະຊາຊົນໄດ້ຮັບຮູ້ຢ່າງກວ້າງຂວາງ.

(ພາບ-ຂ່າວ: ສົມວິຈິດ ໄຊມົນຕີ)