ເນື່ອງໃນໂອກາດທີ່ຮອງປະທານສະພາແຫ່ງຊາດໄດ້ລົງມາເຄື່ອນໄຫວເຮັດວຽກ ແລະ ຊີ້ນໍາວຽກງານການປະເມີນການຈັດຕັ້ງປະຕິບັດກົດ ໝາຍ 4 ສະບັບ ໃນຂົງເຂດສະພາແຫ່ງຊາດ ຢູ່ແຂວງຜົ້ງສາລີ. ໃນຕອນບ່າຍວັນທີ 5 ກັນຍາ 2023 ທີ່ຫ້ອງປະຊຸມຄະນະປະຈໍາສະພາປະຊາຊົນແຂວງຜົ້ງສາລີ, ໄດ້ມີກອງປະຊຸມພົບປະລະຫວ່າງ ທ່ານຮອງປະທານຄະນະປະຈໍາສະພາແຫ່ງຊາດ ກັບ ຄະນະປະຈໍາສະພາປະຊາຊົນແຂວງຜົ້ງສາລີ ໂດຍການເປັນປະທານຂອງທ່ານ ຄໍາໃບ ດໍາລັດ ຮອງປະທານຄະນະປະຈໍາສະພາແຫ່ງຊາດ, ເຂົ້າຮ່ວມມີທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງຜົ້ງສາລີ, ບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ບັນດາທ່ານ   ຄະນະປະຈໍາສະພາປະຊາຊົນແຂວງ, ຕາງໜ້າຄະນະເລຂາທິການສະພາແຫ່ງຊາດ ແລະ ສະພາປະຊາຊົນແຂວງ ເຂົ້າຮ່ວມ

ໃນກອງປະຊຸມ ທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ ໄດ້ລາຍງານໂດຍຫຍໍ້ ຕໍ່ທ່ານ ຮອງປະທານຄະນະປະຈໍາສະພາແຫ່ງຊາດ ກ່ຽວກັບສະພາບການຈັດຕັ້ງປະຕິບັດວຽກງານຂອງສະພາປະຊາຊົນແຂວງຜົ້ງສາລີ ຊຸດທີ II ໃນໄລຍະກາງສະໄໝ ແລະ ແຜນການເຄື່ອນໄຫວຈຸດສຸມທ້າຍສະໄໝ, ພ້ອມກັນນີ້ ກໍ່ໄດ້ມີຄໍາສະເໜີຈໍານວນໜຶ່ງ ເພື່ອສະເໜີຕໍ່ໃຫ້ຄະນະປະຈໍາສະພາແຫ່ງຊາດ ນໍາໄປຄົ້ນຄວ້າ ພິຈາລະນາຊ່ວຍ

ໃນໂອກາດດຽວກັນນີ້, ທ່ານຮອງປະທານຄະນະປະຈໍາສະພາແຫ່ງຊາດ ກໍ່ໄດ້ມີຄໍາເຫັນ ໂອ້ລົມຕື່ມ ເຊິ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ຜົນສໍາເລັດທີ່ຍາດມາໄດ້ ກ່ຽວກັບການຈັດຕັ້ງປະຕິບັດວຽກງານທີ່ຜ່ານມາຂອງຂອງສະພາປະຊາຊົນແຂວງຜົ້ງສາລີ ຊຸດທີ II ແລະ ທ່ານ ຍັງໄດ້ເນັ້ນຕື່ມ ເພື່ອເປັນທິດທາງ ແລະ ເປັນບ່ອນອີງໃນການຈັດຕັ້ງປະຕິບັດວຽກງານໃນຕໍ່ໜ້າ ທີ່ຕ້ອງໄດ້ເອົາໃຈໃສ່ບາງບັນຫາ ດັ່ງນີ້:

• ສືບຕໍ່ລົງພົບປະຜູ້ມີສິດເລືອກຕັ້ງ ໃຫ້ເປັນປົກກະຕິ ແລະ ທົ່ວເຖິງ
• ສືບຕໍ່ຕິດຕາມກວດກາ ແລະ ຊຸກຍູ້, ອົງການປົກຄອງ, ພາກສ່ວນກ່ຽວຂ້ອງ ໃນການຈັດຕັ້ງວຽກງານ ໂດຍສະເພາະວຽກງານຂົງເຂດວັດທະນະທໍາ-ສັງຄົມ, ເປັນຕົ້ນ ບັນຫາການສຶກສາ, ບັນຫາການຈັດຫາວຽກເຮັດງານທໍາ ແລະ ການໄປເຮັດວຽກຢູ່ຕ່າງປະເທດ ຂອງປະຊາຊົນບັນດາເຜົ່າ, ບັນຫາການແກ້ໄຂນະໂຍບາຍ ແລະ ວຽກງານອື່ນ ທີ່ຕິດພັນກັບການແກ້ໄຂບັນຫາຄວາມຫຍຸ້ງຍາກດ້ານເສດຖະກິດການເງິນ ແລະ ບັນຫາຢາເສບຕິດ, ເຊິ່ງເປັນບັນຫາພົ້ນເດັ່ນໃນສັງຄົມ
• ສືບຕໍ່ເປັນເຈົ້າການເຂົ້າຮ່ວມ ແລະ ແກ້ໄຂບັນຫາດັ່ງກ່າວ ໂດຍຖືເອົາການສຶກສາອົບຮົມການເມືອງແນວຄິດເປັນຫຼັກ ແລະ ທົ່ວເຖິງ

(ພາບ ແລະ ຂ່າວ: ສູນທອງ ວິໄລຈິດ)