(ສພຊ) ແຕ່ວັນທີ 31 ສິງຫາ-1 ກັນຍາ 2023 ທີ່ຫ້ອງວ່າການປົກຄອງແຂວງເຊກອງ, ກອງປະຊຸມປະເມີນກົດໝາຍ 4 ສະບັບ ໃນຂົງເຂດສະພາແຫ່ງຊາດ ໄດ້ສຳເລັດລົງດ້ວຍຜົນສຳເລັດຕາມລະດັບຄາດໝາຍ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ໂດຍການເຂົ້າຮ່ວມຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 16 ແຂວງເຊກອງ, ປະທານສະພາປະຊາຊົນແຂວງເຊກອງ, ທ່ານ ຂັນຕິ ສີລະວົງ ກຳມະການຄະນະປະຈຳພັກແຂວງ, ຮອງເຈົ້າແຂວງເຊກອງ, ມີບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ບັນດາທ່ານການນໍາຂອງແຂວງ, ການນໍາຂອງພະແນກການຂອງແຂວງ, ບັນດາທ່ານເຈົ້າເມືອງ, ອົງການຈັດຕັ້ງມະຫາຊົນ ແລະ ອະດີດສະມາຊິກສະພາແຫ່ງຊາດ, ອະດີດການນຳຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ກົດໝາຍ 4 ສະບັບ ໃນຂົງເຂດສະພາແຫ່ງຊາດ ແລະ ສະພາປະຊາຊົນແຂວງ ທີ່ຖືກປະເມີນໃນຄັ້ງນີ້ ປະກອບມີ: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ.
ທ່ານ ປະທານກອງປະຊຸມ ໄດ້ກ່າວເປີດກອງປະຊຸມ ໂດຍຍົກໃຫ້ເຫັນຄວາມສຳຄັນ, ຄວາມໝາຍ ແລະ ຄວາມຈຳເປັນໃນການປັບປຸງກົດໝາຍທັງ 4 ສະບັບດັ່ງກ່າວ ເນື່ອງຈາກກົດໝາຍທັງ 4 ສະບັບ ຕິດພັນ ເຊິ່ງກັນ ແລະ ກັນ ແລະ ໄດ້ຮັບການປັບປຸງເປັນແຕ່ລະໄລຍະມາຫຼາຍຄັ້ງແລ້ວ ແຕ່ຍັງມີຄວາມຈຳເປັນໃນການປັບປຸງອີກ ເພື່ອໃຫ້ສະພາບຕົວຈິງ, ທັງເພື່ອໃຫ້ສອດຄ່ອງກັບກົດໝາຍວ່າດ້ວຍການສ້າງນິຕິກຳ ແລະ ເປັນການຍາດແຍ່ງເອົາຄຳຄິດຄຳເຫັນຂອງເປົ້າໝາຍຕ່າງໆໃນສັງຄົມ ເພື່ອນຳໄປຄົ້ນຄວ້າປັບປຸງກົດໝາຍ ເຮັດໃຫ້ກາຍເປັນກົດໝາຍ ຂອງປະຊາຊົນ, ມາຈາກປະຊາຊົນ ແລະ ຮັບໃຊ້ປະຊາຊົນຢ່າງແທ້ຈິງ.
ໃນກອງປະຊຸມ, ຄະນະຮັບຜິດຊອບໄດ້ຜ່ານບົດປະເມີນການຈັດຕັ້ງປະຕິບັດກົດໝາຍ 4 ສະບັບດັ່ງກ່າວ ແລະ ປະທານກອງປະຊຸມ ໄດ້ມີການເຈາະຈີ້ມຕໍ່ແຕ່ລະກົດໝາຍ ເພື່ອສາມາດຮີບໂຮມບັນດາຄຳຄິດຄຳເຫັນທີ່ຫຼາຍຫຼາກ ກົດໝາຍໃຫ້ຮັດກຸມ ແລະ ຈະແຈ້ງຂຶ້ນກວ່າເກົ່າ ສາມາດປະຕິບັດໄດ້ຢ່າງມີປະສິດທິພາບ. ບັນດາທ່ານທີ່ເຂົ້າຮ່ວມໄດ້ສຸມຈິດສຸມໃຈ, ສະຕິປັນຍາປະກອບຄໍາຄິດເຫັນຢ່າງຫຼາກຫຼາຍ, ອຸດົມສົມບູນ ມີປະໂຫຍດຫຼາຍ ຕໍ່ບັນດາກົດໝາຍທີ່ນໍາມາປະເມີນໃນຄັ້ງນີ້ ເຮັດໃຫ້ບັນດາເນື້ອໃນທີ່ຍັງບໍ່ຈະແຈ້ງ, ບໍ່ຮັດກຸມ ມີຄວາມສົມບູນ, ຄົບຖ້ວນຂຶ້ນຕື່ມ ເຊິ່ງການປະກອບຄຳເຫັນຂອງຜູ້ເຂົ້າຮ່ວມໃນຄັ້ງນີ້ ໄດ້ມີການວິເຄາະໃນທຸກແງ່ມູມຂອງບັນດາມາດຕາ ທີ່ໄດ້ເຈາະຈີ້ມຕໍ່ແຕ່ລະກົດໝາຍຢ່າງມີຈຸດສຸມ ເຮັດໃຫ້ຄະນະຮັບຜິດຊອບປັບປຸງບັນດາກົດໝາຍໄດ້ມີຂໍ້ມູນ, ຄໍາຄິດເຫັນທີ່ຫຼາກຫຼາຍ ເຊິ່ງຈະເປັນພື້ນຖານອັນຈໍາເປັນໃຫ້ແກ່ການປັບປຸງເນື້ອໃນຂອງບັນດາກົດໝາຍໃຫ້ມີຄວາມສົມບູນ, ຄົບຖ້ວນຮັດກຸມກວ່າເກົ່າ, ສາມາດນໍາໄປພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນຄັ້ງຕໍ່ໄປ ແລະ ກະກຽມໃຫ້ແກ່ສະພາແຫ່ງຊາດ ຊຸດທີ X ໃນຕໍ່ໜ້າ.
(ພາບ ແລະ ຂ່າວ: ນາງ ປາກາລັກ ພົມມີໄຊ)