ເພື່ອເປັນການປະຕິບັດຕາມແຜນການຂອງສະພາແຫ່ງຊາດວ່າດ້ວຍການສ້າງ ແລະ ປັບປຸງກົດໝາຍມີຄວາມຖືກຕ້ອງສອດຄ່ອງກັບລັດຖະທຳມະນູນ ແລະ ກົດໝາຍ ເທື່ອລະກ້າວ, ທັງຮັບປະກັນເຮັດໃຫ້ເນື້ອໃນຂອງກົດໝາຍ ຈຳນວນ 03 ສະບັບ ໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ມີຄວາມຄົບຖ້ວນ, ຮັດກຸມ, ສາມາດຈັດຕັ້ງປະຕິບັດໄດ້ ແລະ ຮັບປະກັນເຖິງຜົນປະໂຫຍດລວມ.

ໃນຕອນເຊົ້າວັນທີ 29 ສິງຫາ 2023 ທີ່ຫ້ອງປະຊຸມຂອງສະພາປະຊາຊົນແຂວງຜົ້ງສາລີ ໄດ້ຈັດກອງປະຊຸມ ຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ 03 ສະບັບ ຂົງເຂດປ້ອງກັນຊາດ-ປ້ອງກັນຄວາມສະຫງົບ ໂດຍການເປັນປະທານຂອງ ທ່ານ ຫຸມເພັງ ຈອມວິສານ ຮອງປະທານຄະນະປະຈໍາສະພາປະຊາຊົນແຂວງ ຜົ້ງສາລີ, ມີທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ສະມາຊິກສະພາປະຊາຊົນແຂວງ, ປະທານຄະນະກໍາມະການ ຂອງສະພາປະຊາຊົນແຂວງ, ຫົວໜ້າ, ຄະນະກອງບັນຊາການ ແລະ ຄະນະຮັບຜິດຊອບປະເມີນກົດໝາຍ ຈາກ 2 ກໍາລັງ ປກຊ-ປກສ​, ບັນດາທ່ານ ຈາກອົງການຈັດຕັ້ງມະຫາຊົນຂັ້ນແຂວງ, ສະຫະພັນນັກຮົບເກົ່າ ແລະ ວິຊາການທີ່ກ່ຽວຂ້ອງຂອງສະພາປະຊາຊົນແຂວງ ເຂົ້າຮ່ວມ.

ກອງປະຊຸມໄດ້ຮັບຟັງທ່ານ ສົມຈັນ ລອດສຸລີ ຮອງຫົວໜ້າກອງບັນຊາການທະຫານແຂວງ ລາຍງານ ຜົນການປະເມີນ ການຈັດຕັ້ງປະຕິບັດກົດໝາຍ ວ່າດ້ວຍປ້ອງກັນຊາດ, ກົດໝາຍວ່າດ້ວຍນາຍທະຫານກອງທັບປະຊາຊົນລາວ ແລະ ຮັບຟັງທ່ານ ຄໍາຈັນ ແສງລາວົງ ຫົວໜ້າກອງບັນຊາການປ້ອງກັນຄວາມສະຫງົບແຂວງ ລາຍງານຜົນການປະເມີນ ການຈັດຕັ້ງປະຕິບັດກົດໝາຍ ວ່າດ້ວຍປ້ອງກັນຄວາມສະຫງົບປະຊາຊົນ

ຫຼັງຈາກນັ້ນປະທານກອງປະຊຸມ ໄດ້ມີຄໍາເຫັນເຈາະຈີ້ມ ເພື່ອໃຫ້ບັນດາທ່ານຜູ້ເຂົ້າຮ່ວມ ໄດ້ປະກອບຄໍາຄິດເຫັນ ແນໃສ່ເຮັດໃຫ້ເນື້ອໃນມີຄວາມຖືກຕ້ອງ, ຄົບຖ້ວນ ແລະ ສອດຄ່ອງກັບສະພາບຕົວຈິງ ເພື່ອສັງລວມລາຍງານໃຫ້ສະພາແຫ່ງຊາດ ທີ່ຈະນໍາເຂົ້າພິຈາລະນາ ໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX.

ພາບ-ຂ່າວ: ນັກຂ່າວສະພາປະຊາຊົນແຂວງ