ໃນຕອນບ່າຍວັນທີ 21 ສິງຫາ 2023 ທີ່ສະໂມສອນສະພາປະຊາຊົນແຂວງ ເຊກອງ ໄດ້ມີກອງປະຊຸມກະກຽມຄວາມພ້ອມໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II ໂດຍການເປັນປະທານຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ເຂົ້າຮ່ວມມີທ່ານຮອງປະທານສະພາປະຊາຊົນແຂວງ, ບັນດາທ່ານປະທານ-ຮອງປະທານກຳມະການ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຄະນະເລຂາທິການ, ຫົວໜ້າຂະແໜງ-ຮອງຂະແໜງ ພ້ອມດ້ວຍກອງເລຂາເຂົ້າຮ່ວມ.

           ເຊິ່ງກອງປະຊຸມ ບັນດາຜູ້ແທນກອງປະຊຸມ ໄດ້ຮັບຟັງການລາຍງານກ່ຽວກັບບັນດາເນື້ອເອກະສານທີ່ສໍາຄັນຕ່າງໆ ເຊິ່ງໃນນັ້ນ ມີເອກະສານກ່ຽວກັບແຜນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II, ວາລະດໍາເນີນກອງປະຊຸມ, ກົດລະບຽບ, ຂັ້ນຕອນ ແລະ ວິທີການຕ່າງໆຂອງກອງປະຊຸມສະພາປະຊາຊົນແຂວງ. ພ້ອມນັ້ນ, ບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ສ້າງຄວາມເຂົ້າໃຈກ່ຽວກັບການນໍາໃຊ້ເຄື່ອງລົງຄະແນນສຽງແບບທັນສະໄໝ ພ້ອມທັງ, ມີການສົນທະນາປ່ຽນຕໍ່ວິມີການ ແລະ ຂັ້ນຕອນຂອງການນໍາໃຊ້ເຄື່ອງດັ່ງກ່າວ ເພື່ອຮັບປະກັນຄວາມຖືກຕ້ອງຊັດເຈນ ແລະ ເປັນເອກະພາບສູງ.

            ໂອກາດນີ້, ທ່ານ ດົງເພັດ ພະຍົນ ໄດ້ໃຫ້ກຽດໂອ້ລົມຕໍ່ກອງປະຊຸມ ເຊິ່ງທ່ານໄດ້ຮຽກຮ້ອງບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຄະນະຮັບຜິດຊອບເນື້ອໃນຕ່າງໆ ແລະ ບັນດາທ່ານທີ່ເຂົ້າຮ່ວມກອງປະຊຸມຄັ້ງນີ້ ຈົ່ງໄດ້ເຊີດຊູຄວາມຮັບຜິດຊອບການເມືອງຂອງຕົນ, ສຸມສະຕິປັນຍາເຂົ້າໃນການປະກອບຄໍາຄິດຄໍາເຫັນ, ຮ່ວມກັນຄົ້ນຄວ້າຊອກຫາວິທີການແກ້ໄຂບັນຫາຄວາມຫຍຸ້ງຍາກທີ່ເກີດຂຶ້ນ ໃຫ້ມີຄວາມເປັນເອກະພາບ ແລະ ພ້ອມກັນຈັດຕັ້ງປະຕິບັດ, ການຄົ້ນຄວ້າປະກອບຄໍາເຫັນໃຫ້ຮັບປະກັນສອດຄ່ອງກັບແນວທາງນະໂຍບາຍຂອງພັກ, ສອດຄ່ອງກັບສິດ ແລະ ໜ້າທີ່ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ຕາມທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ, ສອດຄ່ອງກັບສະພາບຄວາມເປັນຈິງ ຂອງການພັດທະນາເສດຖະກິດ-ສັງຄົມໃນໄລຍະໃໝ່ ແລະ ສາມາດເຊື່ອມໂຍງທາງດ້ານເສດຖະກິດກັບພາກພື້ນ ແລະ ສາກົນ.

#ໂດຍ: ນາລີວັນ.