ເປີດສາກຂຶ້ນຢ່າງເປັນທາງການ ການແຂ່ງຂັນກິລາດອກປີກໄກ່ຊິງແຊ໋ມທົ່ວປະເທດ ຄັ້ງທີ 22 ຊິງຂັນທ່ານປະທານສະພາແຫ່ງຊາດ ປະຈຳປີ 2023 ຫຼື ລາຍການ (22nd BeerLao Badminton Championship 2023 Presented by Lao Brewery Company) ໃນວັນທີ 23 ສິງຫາ 2023 ທີ່ສະໂມສອນເສດຖາ ຊີງເງິນລາງວັນລວມ 146 ລ້ານກວ່າກີບ ເພື່ອເປັນການສ້າງຂະບວນການຂໍ່ານັບຮັບຕ້ອນວັນຍຶດອຳນາດ ຄົບຮອບ 48 ປີ (23 ສິງຫາ 1975-23 ສິງຫາ 2023) ແລະ ສົ່ງເສີມນັກກິລາດອກປີກໄກ່ຮຸ່ນສືບທອດມີການເຄື່ອນໄຫວຢ່າງຕໍ່ເນື່ອງ ເພື່ອກ້າວສູ່ທີມຊາດໃນຕໍ່ໜ້າ.

ລາຍການດັ່ງກ່າວ ຈັດຂຶ້ນເປັນຄັ້ງທີ 22 ແລ້ວ ໂດຍໄດ້ຮັບການສະໜັບສະໜູນຫຼັກຈາກບໍລິສັດ ເບຍລາວ ຈຳກັດ ແລະ ປີນີ້ ເບຍລາວ ກໍສືບຕໍ່ມອບເງິນຈຳນວນ 362 ລ້ານກີບ ສະໜັບສະໜູນງານດັ່ງກ່າວ ເຊິ່ງກ່າວມອບໂດຍທ່ານ ຈັນສະໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ ແລະ ກ່າວຮັບແມ່ນທ່ານ ປອ. ໄຊບັນດິດ ຣາຊະພົນ ຮອງປະທານ-ເລຂາທິການ ສະຫະພັນດອກປີກໄກ່ແຫ່ງຊາດລາວ ໂດຍການເຂົ້າຮ່ວມເປັນສັກຂີພິຍານຂອງທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ, ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ປະທານຄະນະກຳມະການພາລາແລມປິກແຫ່ງຊາດລາວ ທັງເປັນຮອງປະທານຄະນະກຳມະການໂອແລມປີກແຫ່ງຊາດລາວ ແລະ ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ທັງເປັນເລຂາທິການຄະນະກຳມະການໂອແລມປິກແຫ່ງຊາດລາວ ພ້ອມດ້ວຍຄະນະບໍລິຫານງານສະຫະພັນ, ຄະນະນຳແຕ່ລະພາກສ່ວນ, ຄູເຝິກ ແລະ ນັກກິລາ ຕະຫຼອດຮອດມວນຊົນຊາວນະຄອນຫຼວງ ແລະ ຊາວຕ່າງຊາດເຂົ້າຮ່ວມຢ່າງຫຼວງຫຼາຍ.

ລາຍການນີ້ ຈະຈັດຂຶ້ນ ລະຫວ່າງວັນທີ 23-26 ສິງຫານີ້ ເຊິ່ງມີການຊີງໄຊທັງໝົດ 13 ລາຍການ ມີນັກກິລາເຂົ້າຮ່ວມທັງໝົດ 324 ຄົນ ຍິງ 47 ຄົນ ຈາກ 24 ພາກສ່ວນ, ໃນນັ້ນ ມີ 5 ແຂວງເຂົ້າຮ່ວມ ປະກອບມີ: ແຂວງຈໍາປາສັກ, ແຂວງສະຫວັນນະເຂດ, ແຂວງຄຳມ່ວນ, ແຂວງຫຼວງພະບາງ ແລະ ແຂວງອຸດົມໄຊ ນອກຈາກນັ້ນ ກໍຍັງມີບັນດາສະໂມສອນອ້ອມຂ້າງສູນກາງ ແລະ ບັນດານັກກິລາອິດສະຫຼະທີ່ບໍ່ມີສັງກັດຈຳນວນໜຶ່ງ ເຂົ້າຮ່ວມຊີງໄຊຢ່າງເປັນຂະບວນຟົດຟື້ນ.