ໃນຕອນເຊົ້າຂອງວັນທີ 23 ສິງຫາ ນີ້ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ (ສສຊ) ແລະ ສະມາ ຊິກສະພາປະຊາຊົນນະຄອນຫຼວງ (ສສ ນວ) ໄດ້ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ IX ແລະ ກອງປະຊຸມສະພາປະຊາຊົນ ນະຄອນຫຼວງວຽງຈັນ ຊຸດທີ II ຢູ່ເມືອງນຊາຍທອງ ນວ ນໍາພາໂດຍ: ທ່ານ ບຸນທາມ ພຸດທະວົງສາ, ຮອງປະ​ທານ​ຄະ​ນະ​ສະ​ມາ​ຊິກ ​ສະ​ພາ​ແຫ່ງ​ຊາດ ຊຸດທີ IX ປະ​ຈຳ​ເຂດ​ເລືອກ​ຕັ້ງ​ທີ 1 ນວ, ຮອງປະທານ ສະພາປະຊາຊົນ ນວ, ມີ ທ່ານ ພູວຽງ ເພຍເທບ, ສະ​ມາ​ຊິກ​ສະ​ພາ​ປະ​ຊາ​ຊົນ ນວ ຊຸດ​ທີ II, ຫົວໜ້າ ຄະນະສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ, ປະທານກວດກາພັກ-ລັດ ເມືອງນາຊາຍທອງ ນວ ຢູ່ທີ່ ວັດບ້ານນາຊາຍໃຕ້ ເຊິ່ງປະກອບມີ ຄະນະນຳຂອງບ້ານ 03 ບ້ານເຂົ້າຮ່ວມຄື: ບ້ານນາຊາຍໃຕ້, ບ້ານນາຊາຍກາງ ແລະ ບ້ານນາຊາຍເໜືອ ເຂົ້າຮ່ວມຢ່າງພ້ອມພຽງ.

ໃນການລົງເຄື່ອນໄຫວພົບປະຄັ້ງນີ້ ແມ່ນເພື່ອພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາ ມັນ ເທື່ອທີ 5 ສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ແລະ ເພື່ອຮັບຟັງຄໍາຄິດຄໍາເຫັນ, ຄໍາສະເໜີຂອງພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງ; ບັນດາທ່ານ ສສຊ ແລະ ສສນວ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມໂດຍເນັ້ນໃສ່ການຈັດຕັ້ງປະຕິບັດວຽກງານແຕ່ລະດ້ານ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຂອງລັດຖະບານ, ອົງການປົກຄອງ ນວ, ຂົງເຂດຕຸລາການ, ຂອງສະພາແຫ່ງຊາດ ແລະ ສະພາປະຊາຊົນ ນວ ແລະ ໃນໂອກາດດັ່ງກ່າວ, ບັນດາທ່ານ ສສຊ ແລະ ສສນວ ກໍໄດ້ຮັບຟັງການລາຍງານສະພາບການຈັດຕັ້ງປະຕິບັດຂອງແຕ່ລະບ້ານ, ແລກປ່ຽນຄຳຄິດຄຳເຫັນກັບພໍ່ແມ່ປະຊາຊົນ, ຮັບຟັງບັນຫາທີ່ຂັດຂ້ອງໝອງໃຈຕ່າງໆ ໃນການດຳລົງຊີວິດຂອງພໍ່ແມ່ປະຊາຊົນ ພ້ອມທັງຮັບເອົາການສະເໜີແຕ່ລະບັນຫາ ເພື່ອນຳໄປສະເໜີຕໍ່ພາກສ່ວນກ່ຽວຂ້ອງຕິດຕາມກວດກາ ແລະ ພິຈາລະນາຫາທິດທາງແກ້ໄຂໃນຕໍ່ໜ້າ.