ທ່ານ ປອ. ໄຊສົມພອນ ພົມວິຫານ ໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກໍາ ລະຫວ່າງສອງພັກ, ສອງລັດຖະບານລາວ-ຈີນ ແລະ ໄດ້ສະແດງຄວາມຊົມເຊີຍ ຕໍ່ຜົນສໍາເລັດອັນໃຫຍ່ຫຼວງ ໃນການພັດທະນາ, ສ້າງສາປະເທດຊາດ ຂອງ ສປ ຈີນ ໃນໄລຍະຜ່ານມາ.

ທ່ານປະທານສະພາແຫ່ງຊາດ ແຫ່ງ ສປປ ລາວ ໄດ້ລາຍງານໃຫ້ຊາບ ກ່ຽວກັບ ສະພາແຫ່ງຊາດລາວ ຫາກໍ່ສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX.

ສໍາລັບການພົວພັນຮ່ວມມື ລະຫວ່າງ ສອງອົງການນິຕິບັນຍັດ ຜ່ານມາແມ່ນໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ແລະ ເປັນຮູບປະທໍາຫຼາຍຂຶ້ນ, ສອງອົງການນິຕິບັນຍັດ ຍັງໄດ້ໃຫ້ການສະໜັບສະໜູນ ແລະ ປຶກສາຫາລືກັນຢ່າງໃກ້ຊິດ ໃນເວທີລັດຖະສະພາພາກພື້ນ ແລະ ສາກົນ ຢ່າງແໜ້ນແຟ້ນຕະຫຼອດມາ. ທ່ານໄດ້ສະແດງຄວາມຂອບໃຈຢ່າງຈິງໃຈ ຕໍ່ພັກກອມມູນິດຈີນ, ລັດຖະບານ, ສະພາຜູ້ແທນປະຊາຊົນທົ່ວປະເທດ ແລະ ປະຊາຊົນຈີນອ້າຍນ້ອງ ທີ່ໄດ້ໃຫ້ການຊ່ວຍເຫຼືອຢ່າງຫຼວງຫຼາຍແກ່ປະຊາຊົນລາວ ຕະຫຼອດໄລຍະທີ່ຜ່ານມາ.

ຈາກນັ້ນຫົວໜ້າຄະນະຜູ້ແທນສະພາຜູ້ແທນປະຊາຊົນທົ່ວປະເທດຈີນ ໄດ້ສະຄວາມປິຕິຍິນດີທີ່ຈະໄດ້ຕ້ອນຮັບຄະນະຜູ້ແທນຂັ້ນສູງຂອງສະພາແຫ່ງຊາດລາວ ພ້ອມດ້ວຍຄະນະ ຢ້ຽມຢາມ ສປ ຈີນ ຢ່າງເປັນທາງການ ເຊິ່ງນໍາໂດຍທ່ານປະທານສະພາແຫ່ງຊາດລາວໃນຕົ້ນເດືອນກັນຍາ 2023 ຈະມາເຖິງນີ້ ແລະ ເຊີນການນໍາລາວເຂົ້າຮ່ວມກອງປະຊຸມ ຫນຶ່ງແລວ ຫນຶ່ງເສັ້ນທາງ ເພື່ອການຮ່ວມມືສາກົນ ຄັ້ງທີ 3 ໃນກາງເດືອນຕຸລາ 2023 ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອ, ການຮ່ວມມືຍຸດທະສາດຮອບດ້ານ ໝັ້ນຄົງ ຍາວນານຕາມທິດ 4 ດີ ກໍຄືການເປັນຄູ່ຮ່ວມຊະຕາກຳລາວ-ຈີນ, ຈີນ-ລາວ ຈົ່ງໄດ້ຮັບການເສີມຂະຫຍາຍຍິ່ງໆຂຶ້ນ ເພື່ອຜົນປະໂຫຍດ ຂອງສອງປະເທດ ກໍຄືເພື່ອສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາ ໃນພາກພື້ນ ແລະ ໃນໂລກ.

ຝ່າຍຈີນມີຄວາມຍິນດີ ໃຫ້ການສະຫນັບສະຫນູນ ສປປ ລາວ ໃນການເປັນເຈົ້າຈັດກອງປະຊຸມສຸດຍອດອາຊຽນ ແລະ ກອງປະຊຸມໄອປາ ຄັ້ງທີ 44 ໃນປີ 2024 ຈະມາເຖິງນີ້.

ສອງຝ່າຍໄດ້ຕົກລົງເປັນເອກະພາບໃນການສືບຕໍ່ການພົວພັນຮ່ວມມື ລະຫວ່າງ ສອງອົງການນິຕິບັນຍັດ ລາວ-ຈີນ ໃນຕໍ່ຫນ້າ ໂດຍສະເພາະການແລກປ່ຽນຢ້ຽມຢາມຂອງຄະນະຜູ້ແທນຂອງສອງປະເທດ ແລະ ແລກປ່ຽນບົດຮຽນທີ່ສອງຝ່າຍທີ່ມີຄວາມສົນໃຈຮ່ວມກັນ ແລະອື່ນໆ.