(ສພຊ) ໃນວັນທີ 21 ສິງຫາ 2023, ທີ່ຫ້ອງວ່າການນະຄອນຫຼວງວຽງຈັນ ຄະນະໂຄສະນາອົບຮົມ ນະຄອນ ຫຼວງວຽງຈັນ ໄດ້ຈັດປາຖະກະຖາວັນລັດຖະທຳມະນູນ ແຫ່ງ ສປປລາວ ຄົບຮອບ 32 ປີ (15/8/1991-15/8/2023) ແລະ ວັນຍຶດອຳນາດ 23 ສິງຫາ ຄົບຮອບ 48 ປີ (23/8/1975-23/8/2023) ໂດຍການເປັນປະທານ ແລະ ປາຖະ ກະຖາວັນສຳຄັນດັ່ງກ່າວ ຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ມີຮອງເລຂາຄະນະພັກ, ກຳມະການປະຈຳພັກ, ຮອງປະທານສະພາປະຊາຊົນນະຄອນຫຼວງ, ກຳມະການພັກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຮັບຟັງ.

ທ່ານ ສຈ. ປອ. ຈະເລີນ ເຍຍປາວເຮີ ໄດ້ຍົກໃຫ້ເຫັນການກຳເນີດຂອງລັດຖະທຳມະນູນ, ຄວາມໝາຍ ແລະ ຄວາມສຳຄັນຂອງລັດຖະທຳມະນູນ ແຫ່ງ ສປປລາວ, ເພີ່ມທະວີໃນການຈັດຕັ້ງປະຕິບັດລັດຖະທຳມະນູນ ແລະ ກົດໝາຍໃຫ້ເຂັ້ມງວດ ແລະ ມີປະສິດທິຜົນ, ໄດ້ຍົກໃຫ້ເຫັນ ປະຫວັດ ແລະ ມູນເຊື້ອອັນດີງາມຂອງຊາວນະຄອນຫຼວງວຽງຈັນ, ພາລະກິດຍຶດອຳນາດ 23 ສິງຫາ ປີ 1975 ພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ໄດ້ເນັ້ນໃຫ້ຊາວນະຄອນຫຼວງວຽງຈັນ ສືບຕໍ່ເສີມຂະຫຍາຍມູນເຊື້ອ 23 ສິງຫາ.

ໃນການປາຖະກະຖາວັນສຳຄັນຄັ້ງນີ້ ແມ່ນເພື່ອໃຫ້ສະມາຊິກພັກ ທົ່ວອົງຄະນະພັກ ນະຄອນຫຼວງວຽງຈັນ ມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງ, ກຳແໜ້ນ ແລະ ເປັນເອກະພາບຕໍ່ເນື້ອໃນທີ່ນຳມາເຜີຍແຜ່ປາຖະກະຖາຄັ້ງນີ້, ທັງສາມາດນຳເອົາໄປຈັດຕັ້ງຜັນຂະຫຍາຍເຂົ້າໃນວຽກງານ ແລະ ການດຳລົງຊີວິດຕົວຈິງໃຫ້ເກີດດອກອອກຜົນເວົ້າລວມ, ເວົ້າສະເພາະເພື່ອຍົກສູງທັດສະນະຫຼັກໝັ້ນ, ຄຸນທາດການເມືອງຂອງສະມາຊິກພັກ-ພະນັກງານໃຫ້ສືບຕໍ່ມີຄວາມໜັກແໜ້ນ, ເຂັ້ມແຂງ, ເສີມຂະຫຍາຍດ້ານດີ, ແກ້ໄຂຈຸດອອ່ນ, ມີແບບແຜນດຳລົງຊີວິດທີ່ປອດໃສ, ມີຄວາມສາມັກຄີພາຍໃນເປັນປຶກແຜ່ນ, ມີສະຕິຕໍ່ການຈັດຕັ້ງ, ມີຄວາມເສຍສະຫຼະປະກອບສ່ວນເຂົ້າໃນການຈັດຕັ້ງປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນໃຫ້ມີຜົນສຳເລັດ, ມີປະສິດທິພາບ ແລະ ປະສິດທິຜົນຢ່າງແທ້ຈິງ.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)