ກ່ອນອື່ນທ່ານປະທານສະພາແຫ່ງຊາດລາວ ໄດ້ສະແດງຄວາມຊົມເຊີຍ ແລະ ອວຍພອນ ຢ່າງຈິງໃຈ ຕໍ່ພະນະທ່ານ ທີ່ໄດ້ຮັບການເລືອກຕັ້ງເປັນປະທານສະພາຜູ້ແທນ ຣາດຊະດອນ ແຫ່ງ ຣາຊະອານາຈັກໄທ ໃນກອງປະຊຸມສະໄໝສາມັນ ເທື່ອທີ 1 ຂອງສະພາຜູ້ແທນຣາດຊະດອນໄທ ຊຸດທີ 25 ທີ່ຜ່ານມາ, ທ່ານປະທານສະພາຜູ້ແທນຣາດສະດອນໄທ ກໍ່ໄດ້ສະແດງດີໃຈ ທີ່ໄດ້ພົບປະກັນ ໃນຄັ້ງນີ້.

ຈາກນັ້ນ, ທັງສອງຝ່າຍ ໄດ້ຕີລາຄາຄືນການພົວພັນ ແລະ ຮ່ວມມື ລະຫວ່າງສອງປະເທດ ກໍ່ຄືສອງອົງການນິຕິບັນຍັດ ໃນໄລະຍະຜ່ານມາ ແລະ ປຶກສາຫາລືກັນຫລາຍບັນຫາ ທີ່ເປັນທິດທາງການພົວພັນຮ່ວມມືນຳກັນໃນຕໍ່ຫນ້າ. ການພົບປະຄັ້ງນີ້ ເປັນການປະກອບສ່ວນອັນສຳຄັນ ໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ລາວ-ໄທ, ຖານບ້ານໃກ້ເຮືອນຄຽງທີ່ມີແຕ່ດົນນານ ບົນພື້ນຖານການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ໃຫ້ນັບມື້ນັບຈະເລີນງອກງາມຍິ່ງໆຂຶ້ນໄປ.

ພ້ອມດ່ຽວກັນນີ້, ທ່ານປະທານສະພາແຫ່ງຊາດລາວ ໄດ້ສະແດງຄວາມປິຕິຍິນດີທີ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ຣາຊະອານາຈັກໄທ ໄດ້ຮັບການພັດທະນາ ແລະ ເສີມຂະຫຍາຍຢ່າງຕໍ່ເນື່ອງ ຕະຫຼອດມາ ຈົນໄດ້ຍົກລະດັບການພົວພັນຂຶ້ນເປັນ ຄູ່ຮ່ວມຍຸດທະສາດ ເພື່ອຄວາມຈະເລີນເຕີບໂຕ ແລະ ການພັດທະນາແບບຍືນຍົງ ໃນເດືອນ ມິຖຸນາ ປີ 2022 ຜ່ານມາ, ແລະ ທ່ານໄດ້ຕີລາຄາສູງ ຕໍ່ລັດຖະບານ ຂອງສອງປະເທດ ທີ່ໄດ້ເອົາໃຈໃສ່ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງຕ່າງໆ ທີ່ໄດ້ລົງນາມຮ່ວມກັນ ພ້ອມທັງສະໜັບສະໜູນ ການຈັດຕັ້ງປະຕິບັດແຜນປະຕິບັດງານວ່າດ້ວຍການເປັນ ຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ໄລຍະ 5 ປີ (2022-2026) ໃຫ້ມີປະສິທິຜົນ.

ໃນໂອກາດນີ້ທັງສອງຝ່າຍ ໄດ້ເຫັນດີເປັນເອກະພາບ ສືບຕໍ່ຈັດຕັ້ງປະຕິບັດບົດບັນທຶກການຮ່ວມມື ລະຫວ່າງ 2 ອົງການນິຕິບັນຍັດ, ຊຸກຍູ້ສົ່ງເສີມການພົວພັນທາງດ້ານເສດຖະກິດ, ການຄ້າ, ການລົງທຶນ, ທ່ອງທ່ງວ, ການສຶກສາ ສາທາລະນະສຸກ ແລະອື່ນໆ ຮ່ວມມືສະຫນັບສະຫນູນເຊິ່ງກັນ ແລະກັນໃນເວທີລັດຖະສະພາພາກພື້ນ ແລະສາກົນ.

ໃນຕອນທ້າຍ, ທ່ານປະທານສະພາແຫ່ງຊາດລາວ ໄດ້ສະແດງຄວາມຂອບໃຈເປັນຢ່າງສູງ ມາຍັງ ລັດຖະບານ, ລັດຖະສະພາ ແລະ ປະຊາຊົນໄທ ທີ່ໄດ້ໃຫ້ການສະໜັບສະໜູນແກ່ ສປປ ລາວ. ແລະ ຂໍຖືເປັນກຽດເຊື້ອເຊີນ ພະນະທ່ານ ວັນມູຫະມັດນໍ ມະທາ, ປະທານສະພາຜູ້ແທນຣາດຊະດອນ ແຫ່ງ ຣາຊະອານາຈັກໄທ ນຳພາຄະນະຜູ້ແທນຂັ້ນສູງ ໄປຢ້ຽມຢາມ ສປປ ລາວ ຢ່າງເປັນທາງການ ໃນວັນເວລາທີ່ເໝາະສົມ.