(ສພຊ) ຄະນະຜູ້ແທນຂັ້ນສູງ ສະພາແຫ່ງຊາດ ສປປລາວ ນຳໂດຍ ພະນະທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ເຂົ້າຮ່ວມກອງປະຊຸມໄອປາ ຄັ້ງທີ 44 ທີ່ຈັດຂຶ້ນຢູ່ນະຄອນ ຫຼວງຈາກາຕາ ປະເທດອິນໂດເນເຊຍ ແຕ່ວັນທີ 5-11 ສິງຫາ ປີ 2023.
ພິທີເປີດກອງປະຊຸມຢ່າງເປັນທາງການທີ່ໄດ້ຈັດຂຶ້ນໃນວັນທີ 7 ສິງຫາ ໂດຍມີພະນະທ່ານ ດຣ. ປວນ ມາຫາຣານີ ປະທານສະພາຜູ້ແທນລາສະດອນ ແຫ່ງ ສາທາລະນະລັດ ອິນໂດເນເຊຍ ປະທານກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 44, ໃຫ້ກຽດເຂົ້າຮ່ວມມີພະນະທ່ານ ໂຈໂກ ວີໂດໂດ້ ປະທານາທິບໍດີ ແຫ່ງ ສາທາລະນະລັດ ອິນໂດເນເຊຍ. ໃນພິທີເປີດຍັງມີບັນດາຜູ້ແທນຂັ້ນສູງຈາກລັດຖະສະພາປະເທດອາຊຽນ ແລະ ຜູ້ແທນຈາກປະເທດຜູ້ສັງເກດການ ຈຳນວນ 14 ປະເທດ ແລະ ຜູ້ຕາງໜ້າອົງການຈັດຕັ້ງສາກົນ ຢູ່ອິນໂດເນເຊຍຈຳນວນໜຶ່ງ.
ກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 44 ນີ້ດຳເນີນໄປພາຍໃຕ້ ຫົວຂໍ້: “ຄວາມຮັບຜິດຊອບຂອງລັດຖະສະພາຕໍ່ສະຖຽນລະພາບ ແລະ ຄວາມສົມບູນພູນສຸກຂອງອາຊຽນ”. ໃນກອງປະຊຸມຄັ້ງນີ້, ພາຍຫຼັງນີ້ພະນະທ່ານປະທານສະພາ ລາສະດອນ ແຫ່ງ ອິນໂດເນເຊຍ, ປະທານກອງປະຊຸມໄອປາ ໄດ້ຂຶ້ນກ່າວເປີດກອງປະຊຸມຄັ້ງນີ້ແລ້ວພະນະທານເລຂາທິການໄອປາກໍ່ໄດ້ຂື້ນກ່າວຄຳເຫັນໂດຍໄດ້ສະແດງ ຄວາມຊົມເຊີຍ ແລະ ຕີລາຄາສູງຕໍ່ການຈັດກອງປະຊຸມຄັ້ງນີ້. ຈາກນັ້ນພະນະທ່ານປະທານນາທິບໍດີ ໂຈໂກ ວີໂດໂດ້ ໄດ້ກ່າວຄຳປາໄສຕໍ່ກອງປະຊຸມ ໂດຍໄດ້ສະແດງຄວາມດີໃຈທີ່ກອງປະຊຸມຄັ້ງນີ້ມີການ ປຶກສາຫາລືຫົວຂໍ້ສຳຄັນ ແລະ ອິນໂດເນເຊຍ ພ້ອມຈະປະກອບສ່ວນ ເພື່ອຄວາມເຂັ້ມແຂງ ຂອງອາຊຽນ.
ຕໍ່ມາບັນດາຫົວໜ້າຄະນະຜູ້ແທນປະເທດສະມາຊິກໄອປາ ໄດ້ຜັດປ່ຽນກັນຂຶ້ນປະກອບຄຳ ເຫັນ ໂດຍໄດ້ເນັ້ນໝັກເຖິງບົດບາດອັນສຳຄັນຂອງລັດຖະສະພາໃນການມີສ່ວນຮ່ວມຕໍ່ບັນຫາ ສະຖຽນລະພາບ ແລະ ຄວາມສົມບູນພູນສຸກ ຂອງປະເທດຕົນເອງ ກໍຄືໃນຂອບເຂດພາກພື້ນ ແລະ ໃນໂລກ. ປະກອບສ່ວນເຂົ້າໃນການຈັດຕັ້ງຍຸດທະສາດອາຊຽນຮອດປີ 2025 ເພື່ອສ້າງໃຫ້ ອາຊຽນມີຄວາມເຂັ້ມແຂງ, ເຊື່ອມຈອດເຊື່ອມໂຍງ, ສ້າງໃຫ້ອາຊຽນເປັນສູນກາງແຫ່ງການເຕີບ ໃຫຍ່ຂະຫຍາຍຕົວທາງດ້ານເສດຖະກິດ ກໍຄືການປັບປຸງຊີວິດການເປັນຢູ່ຂອງປະຊາຊົນອາຊຽນ ໃຫ້ດີຂຶ້້ນເລື້ອຍໆ ໂດຍບໍ່ປະໃຫ້ໃຜຄ້າງຢູ່ເບື້ອງຫຼັງ.
ໃນກອງປະຊຸມວາລະລວມ, ພະນະທ່ານ ໄຊສົມພອນ ພົມວິຫານ ໄດ້ຂຶ້ນກ່າວຄຳເຫັນ ໂດຍໄດ້ຕີລາຄາເຖິງຄວາມສໍາຄັນຂອງຫົວຂໍ້ກອງປະຊຸມໄອປາຄັ້ງທີ 44 ເຊິ່ງໄດ້ເນັ້ນໜັກເຖິງບົດບາດອັນສໍາຄັນຂອງລັດຖະສະພາໃນການຊຸກຍູ້ໃນການຈັດຕັ້ງປະຕິບັດຍຸດທະສາດຂອງອາຊຽນ ເພື່ອສ້າງຄວາມເຂັ້ມແຂງໃຫ້ແກ່ບັນດາປະເທດອາຊຽນ, ໄດ້ຕີລາຄາສະພາບພາກພື້ນ ແລະ ສາກົນທີ່ພວມມີການຜັນແປຢ່າງວ່ອງໄວ, ສະຫຼັບຊັບຊ້ອນ, ຄາດເດົາໄດ້ຍາກເປັນຕົ້ນແມ່ນການປ່ຽນແປງດ້ານດິນຟ້າອາກາດ, ການຕໍ່ສູ້ດ້ວຍອາວຸດ, ອາສະຍາກໍາຂ້າມຊາດ, ບັນຫາ. ຄວາມທຸກຍາກດ້ານເສດຖະກິດການເງີນ, ໄພເງິນເຟີ້,ການເພີ່ມຂຶ້ນຂອງລາຄາສະບຽງອາຫານ, ພະລັງງານເຊື້ອໄຟ ເຊິ່ງສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນ ໂດຍສະເພາະແມ່ນປະທດກໍາລັງພັດທະນາ ແລະ ດ້ອຍພັດທະນາ ລວມທັງ ສປປ ລາວ ເຮົາ, ເຊິ່ງເປັນສິ່ງທ້າທາຍຕໍ່ການພັດທະນາເສດຖະກິດ-ສັງຄົມ, ການປົກປັກຮັກສາສັນຕິພາບ, ສະຖຽນລະພາບ ແລະ ຄວາມໜັ້ນຄົງ ກໍຄືການບັນລຸເປົ້າໝາຍສ້າງປະຊາຄົມອາຊຽນໃນປີ 2025 ແລະ ເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດໃນປີ 2030.
ໃນສະພາບການຄືດັ່ງກ່າວ, ທ່ານ ປະທານສະພາແຫ່ງຊາດ ລາວ ໄດ້ສະເໜີໃຫ້ໄອປາ ຈົ່ງໄດ້ເພີ່ມທະວີຄວາມຮັບຜິດຊອບຂອງຕົນໃນການສົ່ງເສີມການສ້າງຄວາມເຂັ້ມແຂງໃນອາຊຽນ ເຊິ່ງຈະເປັນການປະກອບສ່ວນເຂົ້າໃນພາລະກິດສັນຕິພາບ, ສະຖຽນລະພາບມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ, ສົ່ງເສີມການແກ້ໄຂບັນຫາຂ້ຂັດແຍ່ງໂດຍສັນຕິວິທີ, ຮັບປະກັນໃຫ້ມີຄວາມໝັ້ນຄົງທາງນໍ້າ, ດ້ານພະລັງງານ, ສະບຽງອາຫານ….
ໃນຕອນທ້າຍ ຂອງການກ່າວຄໍາເຫັນ, ທ່ານ ປະທານສະພາແຫ່ງຊາດລາວ ໄດ້ແຈ້ງໃຫ້ກອງປະຊຸມຊາບວ່າ ສປປ ລາວ ຈະເປັນເຈົ້າພາບຈັດກອງປະຊຸມສະມັດຊາລັດຖະສະພາແຫ່ງຊາດອາຊຽນ (ໄອປາ) ຄັ້ງທີ 45 ພາຍໃຕ້ຫົວຂໍ້: ບົດບາດຂອງລັດຖະສະພາໃນການສົ່ງເສີມການເຊື່ອມໂຍງ, ເຊື່ອມຈອດ ແລະ ການພັດທະນາແບບກວມລວມຂອງອາຊຽນ ແລະ ໄດ້ສະແດງຄວາມເຊື່ອໝັ້ນວ່າບັນດາປະເທດສະມາຊິກໄອປາຈະໃຫ້ການສະໜັບສະໜູນ ສປປ ລາວ ໃນການປະຕິບັດພັນທະດັ່ງກ່າວດ້ວຍຄວາມສໍາເລັດ.
ຕໍ່ມາບັນດາທ່ານຜູ້ຕາງໜ້າຂອງປະເທດສັງເກດການ ແລະ ອົງການຈັດຕັ້ງສາກົນທີ່ປະຈໍາຢູ່ອິນໂດເນເຊຍຈໍານວນໜຶ່ງໄດ້ກ່າວຄໍາເຫັນໂດຍໄດ້ສະແດງເຈດຈໍານົງໃນການຮ່ວມມືກັບອາຊຽນໃຫ້ຫລາຍຂຶ້ນໃນຂົງເຂດທີ່ປະເທດຕົນເອງມີທ່າແຮງ.
ກອງປະຊຸມໄອປາດໍາເນີນຕາມຫົວຂໍ້: ຮ່ວມມືດ້ານການເມືອງ, ດ້ານວຽກງານເພດຍິງ (ໄວປາ), ດ້ານວຽກງານຊາວໜຸ່ມ, ດ້ານວຽກງານວັດທະນະທໍາສັງຄົມ ແລະ ວຽກງານການຈັດຕັ້ງພາຍໃນປະເທດສະມາຊິກໄອປາ.
ນອກຈາກເຂົ້າຮ່ວມກອງປະຊຸມຫລາຍຝ່າຍແລ້ວ ຄະນະຜູ້ແທນຂັ້ນສູງສະພາແຫ່ງຊາດລາວ ຍັງໄດ້ມີການພົບປະສອງຝ່າຍກັບປະເທດເຈົ້າພາບອິນໂດເນເຊຍ, ຄະນະຜູ້ແທນສະພາແຫ່ງຊາດຫວຽດນາມ, ກໍາປູເຈຍ, ໄທ, ສປຈີນ ແລະ ບາງປະເທດສັງເກດການຈໍານວນໜຶ່ງ.
ໃນພິທີປິດກອງປະຊຸມໃນວັນທີ 9 ສິງຫາ 2023 ທ່ານ ປະທານສະພາແຫ່ງຊາດ ສປປ ລາວ ໄດ້ມີການກ່າວຄໍາເຫັນ ກ່າວຮັບການເປັນເຈົ້າພາບກອງປະຊຸມໄອປາ ຄັ້ງທີ 45 ໃນປີ 2024 ທີ່ຈະມາເຖິງນີ້.