ກອງປະຊຸມຮ່ວມ ລະຫວ່າງ ຄະນະປະຈໍາສະພາປະຊາຊົນແຂວງ ກັບ ອົງການປົກຄອງແຂວງ ໄດ້ຈັດຂຶ້ນ.ໃນວັນທີ 2 ສິງຫາ 2023 ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຮ່ວມຂອງທ່ານ ນາງ ມີນາພອນ ໄຊສົມພູ ປະທານສະພາປະຊາຊົນແຂວງ ແລະ ທ່ານ ເລັດ ໄຊຍະພອນ ເຈົ້າແຂວງ ອັດຕະປື, ມີບັນດາທ່ານຄະນະປະຈໍາສະພາປະຊາຊົນແຂວງ, ຄະນະປະຈໍາພັກແຂວງ, ຄະນະກໍາມະການ, ຄະນະເລຂາທິການ ແລະ ຫົວໜ້າພະແນກການ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ ໄດ້ຮັບຟັງຜ່ານຮ່າງມະຕິ ຮັບຮອງເອົາເນື້ອໃນທີ່ນໍາເຂົ້າຄົ້ນຄວ້າພິຈາລະນາໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II, ມະຕິຂອງຄະນະປະຈໍາສະພາປະຊາຊົນແຂວງ ເລກທີ 168/ຄປຈຂ,ລົງວັນທີ 31/07/2023 ວ່າດ້ວຍການປະເມີນຄວາມໄວວາງໃຈໃນການປະຕິບັດໜ້າທີ ຂອງບຸກຄະລາກອນທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ, ຂໍ້ຕົກລົງ ຂອງຄະນະປະຈໍາສະພາປະຊາຊົນແຂວງ ເລກທີ 169/ຄປຈຂ, ລົງວັນທີ 31/7/2023 ວ່າດ້ວຍການແຕ່ງຕັ້ງຮັບຜິດຊອບການປະເມີນ,  ພ້ອມນັ້ນບັນດາທ່ານຜູ້ເຂົ້າຮ່ວມ ກໍໄດ້ປະກອບຄວາມຄິດຄວາມເຫັນຢ່າງກົງໄປກົງມາ, ມີຈຸດສຸມ ແລະ ສະເໜີທິດທາງທີ່ຈະແຈ້ງ.

ທັງນີ້ ເພື່ອປຶກສາຫາລື ແລະ ແລກປ່ຽນຄວາມເຫັນ ເພື່ອກ້າວໄປເຖິງສ້າງຄວາມເປັນເອກະພາບກັນ ຕໍ່ບັນດາເນື້ອໃນ ແລະ ໃນຂອບເຂດຄວາມຮັບຜິດຊອບຂອງອົງການປົກຄອງແຂວງ ທີ່ຈະນໍາເຂົ້າພິຈາລະນາ ໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ II.ທີ່ຈະຈັດຂຶ້ນໃນຕໍ່ໜ້າ; ເປັນເອກະພາບທາງດ້ານທັດສະນະ ຕໍ່ບັນຫາສຳຄັນຈຳນວນໜຶ່ງ ແລະ ພ້ອມກັນຕີລາຄາ, ຖອດຖອນບົດຮຽນ ກ່ຽວກັບກົນໄກການປະສານງານ ລະຫວ່າງ ສະພາປະຊາຊົນແຂວງ ກັບອົງການປົກຄອງແຂວງ