ສະພາປະຊາຊົນແຂວງຫລວງນ້ຳທາ ເປີດກອງປະຊຸມປະເມີນກົດໝາຍ 4 ສະບັບ ໃນຂົງເຂດສະພາແຫ່ງຊາດ ໃນວັນທີ 31 ກໍລະກົດ 2023 ຢູ່ທີ່ສະໂມສອນແຂວງ ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ໃຫ້ກຽດເປັນປະທານຮ່ວມຂອງທ່ານ ຄຳສິງ ໄຊສົມແພງ ຮອງປະທານກຳມາທິການວຽກງານສະມາຊິກສະພາແຫ່ງຊາດ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການ, ອົງການລັດທຽບເທົ່າຂັ້ນແຂວງ, ອາດີດ ສສຊ, ອາດີດ ສສຂ , 2ກອງບັນຊາການ, ບັນດາທະນາຄານ, ລັດວິສາຫະກິດ ເຂົ້າຮ່ວມ 100 ກວ່າຄົນ.

ກອງປະຊຸມໄດ້ຮັບຟັງບົດປະເມີນການຈັດຕັ້ງປະຕິບັດກົດໝາຍ ວ່າດ້ວຍ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ບົດປະເມີນການຈັດຕັ້ງປະຕິບັດກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ,ແລະ ສະມາຊິກສະພາປະຊາຊົນຂັ້ນແຂວງ ແລະ ຮັບຟັງບົດປະເມີນການຈັດຕັ້ງປະຕິບັດກົດໝາຍ ວ່າດ້ວຍການກວດກາ ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ  ທັງໝົດມີ ພ້ອມດຽວກັນ ຜູ້ແທນກອງປະຊຸມໄດ້ສຸ່ມໃສ່ປະກອບຄຳຄິດເຫັນຕໍ່ກັບກົດໝາຍ 4 ສະບັບ ໃນຂົງເຂດສະພາແຫ່ງຊາດ ແຕ່ລະມາດຕາ ຕາມຄຳຖາມເຈາະຈິ້ມຂອງສະພາແຫ່ງຊາດ ຢ່າງມີຈຸດສຸມ  ເພື່ອນຳໄປປັບປຸງ, ເຮັດໃຫ້ກົດໝາຍດັ່ງກ່າວສາມາດຈັດຕັ້ງປະຕິບັດໄດ້ຢ່າງມີປະສິດທິພາບ, ເໝາະສົມກັບສະພາບຕົວຈິງ ແລະ ເພື່ອຕອບສະໜອງການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນໄລຍະໃໝ່ ໃຫ້ມີປະສິດທິຜົນໃຫ້ສູງກວ່າເກົ່າ; ກອງປະຊຸມຈະໄດ້ດຳເນີນໄປເປັນເວລາ 2 ວັນເຕັມ.