(ສພຊ) ກອງປະຊຸມຄະນະປະຈໍາສະພາແຫ່ງຊາດ ສະໄໝວິສາມັນ ໄດ້ດໍາເນີນຂຶ້ນ ໃນວັນທີ 15 ກໍລະກົດ 2023 ໂດຍການເປັນປະທານນໍາພາກອງປະຊຸມ ໂດຍທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈຳສະພາແຫ່ງຊາດ, ມີບັນດາທ່ານຮອງປະທານຄະນະປະຈຳສະພາແຫ່ງຊາດ, ບັນດາທ່ານກຳມະການຄະນະປະຈຳສະພາແຫ່ງຊາດ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.

​ ກອງປະຊຸມຄະນະປະຈໍາສະພາແຫ່ງຊາດ ໄດ້ຮັບຟັງການລາຍງານ ແລະ ພິຈາລະນາຫຼາຍບັນຫາທີ່ມີຄວາມສຳຄັນ ເປັນຕົ້ນ ບົດລາຍງານການສະເໜີແຕ່ງຕັ້ງ ສະມາຊິກສະພາຜູ້ພິພາກສາຂອງສາປະຊາຊົນສູງສຸດ; ບົດສະຫຼຸບຕີລາຄາຜົນສຳເລັດການດໍາເນີນ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX; ບົດລາຍງານການປັບປຸງຮ່າງກົດໝາຍສ້າງໃໝ່ ຈໍານວນ 4 ສະບັບ ຕາມການປະກອບຄຳເຫັນຂອງສະມາຊິກສະພາແຫ່ງຊາດ; ບົດລາຍງານການກະກຽມເປັນເຈົ້າພາບ ກອງປະຊຸມໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ທີ່ ສປປ ລາວ ຈະເປັນເຈົ້າພາບ. ພ້ອມກັນນັ້ນ, ກອງປະຊຸມຄະນະປະຈໍາສະພາແຫ່ງຊາດ ໄດ້ຮັບຟັງລາຍງານ ການປັບປຸງເນື້ອໃນຮ່າງມະຕິກອງປະຊຸມສະພາແຫ່ງຊາດ ຈໍານວນ 7 ສະບັບ ຊຶ່ງເປັນນິຕິກໍາທີ່ມີຄວາມສໍາຄັນ ແລະ ເປັນໝາກຜົນຂອງການດໍາເນີນ ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX.