(ສພຊ) ໃນລະຫວ່າງວັນທີ 9-12 ກໍລະກົດ 2023 ຄະນະຜູ້ແທນສະພາແຫ່ງຊາດລາວ ນຳໂດຍທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມຄະນະປະສານງານສະມັດຊາລັດຖະສະພາລະຫວ່າງຊາດອາຊຽນ (AIPA Caucus) ຄັ້ງທີ 14, ທີ່ ຟູກັວກ, ແຂວງກຽນຢາງ, ສສ.ຫວຽດນາມ ພາຍໃຕ້ຫົວຂໍ້: “ການສົ່ງເສີມນະວັດຕະກຳ, ການຖ່າຍໂອນ, ການນຳໃຊ້ ແລະ ການພັດທະນາວິທະຍາສາດ ແລະ ເຕັກໂນໂລຊີ ເພື່ອການພັດທະນາ ແລະ ການຂະຫຍາຍຕົວແບບຍືນຍົງ”, ເຂົ້າຮ່ວມກອງປະຊຸມຄັ້ງນີ້, ມີທ່ານ ເຈິ່ນ ແທງ ເມິ້ນ ຮອງປະທານສະພາແຫ່ງຊາດຜູ້ທີ່ໜຶ່ງ ສສ.ຫວຽດນາມ, ຄະນະຜູ້ແທນຈາກປະເທດສະມາຊິກໄອປາ ຄື: ບຣູໄນ, ກຳປູເຈຍ, ອິນໂດເນເຊຍ, ລາວ, ມາເລເຊຍ, ຟີລິບປິນ, ສິງກາໂປ, ໄທ ແລະ ເຈົ້າພາບຫວຽດນາມ, ກອງເລຂາໄອປາ, ກອງເລຂາອາຊຽນ, ຕາງໜ້າຈາກອົງການອາຫານ ແລະ ກະສິກໍາ ແຫ່ງ ສະຫະປະຊາຊາດ, ຕາງໜ້າກະຊວງແຜນການ ແລະ ການລົງທຶນ, ກະຊວງວິທະຍາສາດ ແລະ ເຕັກໂນໂລຊີ, ຄະນະຜູ້ແທນຈາກແຂວງກຽນຢາງ ສສ.ຫວຽດນາມ ເຂົ້າຮ່ວມຈຳນວນທັງໝົດ 81 ທ່ານ.
ຄະນະຜູ້ແທນທີ່ເຂົ້າຮ່ວມກອງປະຊຸມ ໄດ້ພ້ອມກັນທົບທວນຄືນ, ສົນທະນາ ແລະ ປຶກສາຫາລືກັນຢ່າງກົງໄປກົງມາ ແລະ ສ້າງສັນ ກ່ຽວກັບການຈັດຕັ້ງປະຕິບັດບັນດາມະຕິ ຈຳນວນ 11 ສະບັບ ໃນຂົງເຂດວຽກງານການເມືອງ, ເສດຖະກິດ, ສັງຄົມ, ວຽກງານສະມາຊິກສະພາແຫ່ງຊາດໜຸ່ມ ແລະ ສະມາຊິກລັດຖະສະພາເພດຍິງ ຂອງໄອປາ ທີ່ໄດ້ຮັບຮອງເອົາໃນກອງປະຊຸມສະມັດຊາໃຫຍ່ໄອປາ ຄັ້ງທີ 43 ທີ່ ພະນົມເປັນ, ຣາຊະອານາຈັກກຳປູເຈຍ ໃນປີ 2022 ຜ່ານມາ.
ໃນການເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນສະພາແຫ່ງຊາດລາວ ໄດ້ລາຍງານກ່ຽວກັບການຜັນຂະຫຍາຍ ແລະ ການຈັດຕັ້ງປະຕິບັດ ບັນດາມະຕິຕ່າງໆ ຂອງກອງປະຊຸມໃຫຍ່ໄອປາ ຄັ້ງທີ 43 ເພື່ອຊຸກຍູ້ສົ່ງເສີມການທູດລັດຖະສະພາ, ການຮ່ວມມືຫຼາຍຝ່າຍ ເພື່ອຄວາມເປັນແກນກາງຂອງອາຊຽນ, ການເຕີບໂຕຂອງເສດຖະກິດແບບຍືນຍົງ ແລະ ກວມລວມ, ການສົ່ງເສີມ MSMEs ໃນການຫັນເປັນດີຈີຕອນ ເພື່ອການຟື້ນຟູເສດຖະກິດ, ການແກ້ໄຂບັນຫາຢາເສບຕິດ, ການປົກປ້ອງສຸຂະພາບ ແລະ ສັງຄົມຢ່າງເທົ່າທຽມ, ການມີສ່ວນຮ່ວມຂອງຊາວໜຸ່ມ, ການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ການສົ່ງເສີມບົດບາດຂອງສະມາຊິກສະພາແຫ່ງຊາດເພດຍິງ.
ຄະນະຜູ້ແທນສະພາແຫ່ງຊາດລາວ ຍັງໄດ້ມີການປະກອບຄຳເຫັນກ່ຽວກັບການຈັດຕັ້ງປະຕິບັດວຽກງານການສົ່ງເສີມນະວັດຕະກຳ, ການຖ່າຍໂອນ, ການນຳໃຊ້ ແລະ ການພັດທະນາວິທະຍາສາດ ແລະ ເຕັກໂນໂລຊີ ເພື່ອການພັດທະນາ ແລະ ການຂະຫຍາຍຕົວແບບຍືນຍົງ ເຂົ້າໃນການຜະລິດ ແລະ ການບໍລິການ ໂດຍສະເພາະໃນຂະແໜງການທີ່ ສປປລາວ ມີທ່າແຮງ ເຊັ່ນ: ດ້ານພະລັງງານ, ກະສິກໍາ ແລະ ການເຊື່ອມໂຍງເຊື່ອມຈອດ.
ພ້ອມກັນນັ້ນ, ກອງປະຊຸມຍັງໄດ້ເປີດໂຕປື້ມຄູ່ມືສຳລັບລັດຖະສະພາອາຊຽນ ໃນການສົ່ງເສີມການຮັບຮອງເອົາຂໍ້ແນະນຳ ຂອງອາຊຽນ ກ່ຽວກັບການລົງທຶນຢ່າງມີຄວາມຮັບຜິດຊອບ ໃນຂະແໜງການອາຫານ, ກະສິກຳ ແລະ ປ່າໄມ້ ໂດຍອົງການອາຫານ ແລະ ກະສິກຳ ແຫ່ງສະຫະປະຊາຊາດ ແລະ ກອງເລຂາໄອປາ.
ກອງປະຊຸມໄດ້ເຫັນດີເປັນເອກະພາບ ແລະ ລົງລາຍເຊັນຮັບຮອງເອົາບົດລາຍງານ ຂອງກອງປະຊຸມຄະນະປະສານງານໄອປາ ຄັ້ງທີ 14 ເພື່ອນໍາໄປລາຍງານໃນກອງປະຊຸມສະມັດຊາໃຫຍ່ໄອປາ ຄັ້ງທີ 44 ທີ່ຈະຈັດຂຶ້ນໃນລະຫວ່າງວັນທີ 5-10 ສິງຫາ 2023, ທີ່ປະເທດອິນໂດເນເຊຍ, ກອງປະຊຸມຍັງໄດ້ຕົກລົງເຫັນດີໃຫ້ ບຣູໄນ ດາຣູສະລາມ ເປັນເຈົ້າພາບຈັດກອງປະຊຸມຄະນະປະສານງານໄອປາ (AIPA Caucus) ຄັ້ງທີ 15 ໃນປີ 2024.
ນອກຈາກນັ້ນ, ທ່ານຮອງປະທານສະພາແຫ່ງຊາດລາວ ຍັງໄດ້ພົບປະແບບສອງຝ່າຍ ກັບທ່ານ ເຈິ່ນ ແທງ ເມິ້ນ ຮອງປະທານສະພາແຫ່ງຊາດຜູ້ທີ່ໜຶ່ງ ສສ.ຫວຽດນາມ ແລະ ທ່ານເລຂາທິການໃຫຍ່ໄອປາ ເພື່ອປຶກສາຫາລືກ່ຽວກັບການຮ່ວມມື ແລະ ການສະໜັບສະໜູນ ເຊິ່ງກັນ ແລະ ກັນ ໃນຕໍ່ໜ້າ ໂດຍສະເພາະແມ່ນການກະກຽມເປັນເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ 45, ໃນປີ 2024, ທີ່ ສປປລາວ.