ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຄະນະສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ສະນັ້ນມາໃນລະຫວ່າງວັນ 14-15 ມິຖູນາ 2023 ທ່ານ ວຽງໄຊ ສີວິໄລ ຮອງປະທານສະພາ ປະຊາຊົນແຂວງ ພ້ອມດ້ວຍພະນັກງານສະພາປະຊາຊົນແຂວງ ແລະ ພະແນກການທີ່ກ່ຽວຂ້ອງ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຢູ່ສູນບໍາບັດປິ່ນປົວຜູ້ຕິດຢາເສບຕິດແຂວງ (ນໍ້າກຶນ), ຄ້າຍຄຸມຂັງ-ດັດສ້າງຊົ່ວຄາວເມືອງແປກ ແລະ ຄ້າຍຄຸມຂັງຄັງໄຂ.

ເພື່ອຕິດຕາມແລະຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາຕ່າງໆຕາມພາລະບົດບາດ, ຂອບເຂດສິດ ແລະ ໜ້າທີ່ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ9 ແລະ ສະມາຊິກສະພາປະຊາຊົນແຂວງທີ່ກໍານົດໄວ້ໃນກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃຫ້ມີຜົນສໍາເລັດຕາມແຜນທີ່ວາງໄວ້ ແລະ ເພື່ອເປັນຂໍ້ມູນໃຫ້ແກ່ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ເຂົ້າຮ່ວມ ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX. ໃນໂອກາດດັ່ງກ່າວ, ຄະນະພັກຄະນະບັນຊາທັງ 3 ຄ້າຍໄດ້ລາຍງານສະພາບ ການເຄື່ອນໄຫວວຽກງານຂອງຕົນໃນໄລຍະຜ່ານມາ ເຊິ່ງຍົກໃຫ້ເຫັນເຖິ່ງ ຂໍ້ສະດວກ, ຂໍ້ຫຍຸ້ງຍາກ ແລະ ສະພາບຄວາມເປັນຈິງຂອງຄ້າຍ, ຫ້ອງກັກຂັງ ແລະ ໂຄງສ້າງຂອງຫ້ອງກັກຂັງ, ພ້ອມນັ້ນຄະນະພັກຄະນະບັນຊາ 3 ຄ້າຍ ໄດ້ມີຄໍາສະເໜີຕໍ່ ສະ ພາປະຊາຊົນແຂວງ ໃຫ້ຂັ້ນເທິ່ງຄົ້ນຄວ້າ ແລະ ຂໍທິດຊີ້ນຳ ເພື່ອສະດວກໃນການຈັດຕັ້ງປະຕິບັດໜ້າ ທີ່ວຽກງານ ໃຫ້ມີຄວາມ ຖືກຕ້ອງ ແລະ ສອດຄ່ອງກັບສະພາບ ຄວາມເປັນຈິງ.

       ນອກນັ້ນ ທ່ານ ວຽງໄຊ ສີວິໄລ ຍັງໄດ້ຊີ້ນໍາ ຄະນະພັກຄະນະບັນຊາທັງ 3 ຄ້າຍ ຈົ່ງຈັດຕັ້ງປະຕິບັດໜ້າທີ່ວຽກງານຂອງຕົນ ໃຫ້ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ ບົນພື້ນຖານສອດຄອງກັບລັດຖະທຳມະນູນ, ກົດໝາຍ ແລະ ຈະນໍາເອົາບັນດາຄໍາສະເໜີຂອງທັງ 3 ຄ້າຍ ໄປນໍາສະເໜີຕໍ່ຂັ້ນເທິ່ງ ພິຈາລາ ແລະ ແກ້ໄຂໃຫ້ທັນກັບເວລາ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ