(ສປ ນວ) ໃນຕອນເຊົ້າຂອງວັນທີ 20 ມິຖຸນາ 2023, ໜ່ວຍພັກຮາກຖານສະພາປະຊາຊົນ ນະຄອນຫຼວງວຽງຈັນ ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2022 ແລະ ພິທີຍ້ອງຍໍຜົນງານ 5 ປີ ຂະບວນການແຂ່ງຂັນ “ຮັກຊາດ ແລະ ພັດທະນາ” (2016-2020) ທີ່ຫ້ອງວ່າການ ນວ ໂດຍການໃຫ້ກຽດເຂົ້າຮ່ວມຂອງ ທ່ານ ອານຸພາບ ຕຸນາລົມ, ເລຂາທິການສູນກາງພັກ, ເລຂາຄະນະພັກ ປະທານສະພາປະຊາຊົນ ນວ. ຄະນະໜ່ວຍພັກ, ຮອງຄະນະປະທານ ສະມາຊິກພັກ ແລະ ຂະແໜງການທີ່ກ່ຽວຂ້ອງ ໄດ້ໃຫ້ການເຂົ້າຮ່ວມ.
ໃນພິທີດັ່ງກ່າວ, ທ່ານ ນະຄະນະເສນ ສີຫາລາດ ຮອງເລຂາໜ່ວຍພັກ ເລຂາທິການສະພາປະຊາຊົນ ນວ ໄດ້ຜ່ານບົດສະຫຼຸບໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2022 ແລະ ທິດທາງແຜນການປີ 2023 ໃຫ້ຮູ້ວ່າ: ໃນໄລຍະຜ່ານມາ ໜ່ວຍພັກໄດ້ເອົາໃຈໃສ່ຊີ້ນໍາບັນດາຄະນະກໍາມະການ ຂອງສະພາປະຊາຊົນ ສົມທົບກັບ ອົງການປົກຄອງ ນວ ເພື່ອນໍານິຕິກໍາ ເຂົ້າພິຈາລະນາໃນກອງປະຊຸມຂອງສະພາປະຊາຊົນ ນວ ຈຳນວນ 4 ສະບັບ, ໄດ້ອອກນິຕິກໍາພາຍໃນຂອງຄະນະປະຈໍາ ສະພາປະຊາຊົນ 12 ສະບັບ, ສົມທົບກັບອົງການປົກຄອງ ນວ ຈັດກອງປະຊຸມປະເມີນຜົນການຈັດຕັ້ງປະຕິບັດກົດໝາຍ 4 ສະບັບ, ເຂົ້າຮ່ວມກອງປະຊຸມທາບທາມຄໍາຄິດເຫັນ ແລະ ຄົ້ນຄວ້າປະກອບຄໍາເຫັນໃສ່ບັນດາກົດໝາຍສະບັບປັບປຸງ ແລະ ຮ່າງກົດໝາຍ ທີ່ສ້າງໃໝ່ 11 ສະບັບ, ໄດ້ພິຈາລະນາ ແລະ ຮັບຮອງເອົາບັນດາເນື້ອໃນທີ່ນໍາເຂົ້າໃນພິຈາລະນາໃນກອງປະຊຸມສະໄໝສາມັນ ເທື່ອທີ 3 ແລະ 4 ຂອງສະພາປະຊາຊົນ ນວ ຈຳນວນ 15 ຫົວຂໍ້ ແລະ ໄດ້ອອກເປັນມະຕິກອງປະຊຸມ ເພື່ອເປັນບ່ອນອີງໃນການຈັດຕັ້ງປະຕິບັດ, ໄດ້ພິຈາລະນາ ແລະ ຮັບຮອງເອົາບັນຫາສໍາຄັນຂອງ ນວ, ວຽກງານຂົງເຂດຕຸລາການ , ວຽກງານພາຍໃນຂອງສະພາປະຊາຊົນ 22 ເນື້ອໃນ ແລະ ໄດ້ອອກເປັນມະຕິ ເພື່ອເປັນບ່ອນອີງໃນການຈັດຕັ້ງປະຕິບັດ, ເອົາໃຈໃສ່ຄົ້ນຄວ້າພິຈາລະນາຄໍາຮ້ອງຂໍຄວາມເປັນທໍາ ແລະ ຄໍາສະເໜີຂອງປະຊາຊົນ ໂດຍໄດ້ຮັບຄໍາຮ້ອງຂໍຄວາມເປັນທໍາ ທັໝົດ 198 ເລື່ອງ ສາມາດຄົ້ນຄວ້າພິຈາລະນາແກ້ໄຂ ແລະ ນໍາສົ່ງໃຫ້ພາກສ່ວນກ່ຽວຂ້ອງ ແກ້ໄຂ 140 ເລື່ອງ ເທົ່າກັບ 70% ຂອງຈໍານວນຄໍາຮ້ອງທັງໝົດ, ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມຂອງສະພາແຫ່ງຊາດ ແລະ ສະພາປະຊາຊົນ ນວ 310 ຈຸດ ເທົ່າກັບ 98% ຂອງແຜນການ ມີຜູ້ເຂົ້າຮ່ວມຮັບຟັງທັງໝົດ 27.695 ຄົນ ແລະ ໄດ້ຮັບຄໍາສະເໜີ 512 ຂໍ້.
ຜ່ານການສະຫຼຸບຕີລາຄາ ແລະ ປະເມີນຂະບວນການຮັກຊາດ ແລະ ພັດທະນາ ສາມາດສັງລວມການຍ້ອງຍໍຜົນງານ 5 ປີ (2016-2020) ໃຫ້ບຸກຄົນ ແລະ ໜ່ວຍພັກຄື: ປະເພດຫຼຽນໄຊແຮງງານຊັ້ນ I ມີ 3 ຫຼຽນ, ປະເພດຫຼຽນໄຊແຮງງານ ຊັ້ນ II ມີ 7 ຫຼຽນ ແລະ ຫຼຽນໄຊແຮງງານຊັ້ນ III ມີ 17 ຫຼຽນ ຫຼຽນກາແຮງງານ 7 ຫຼຽນ ໃບຍ້ອງຍໍລັດຖະບານ 6 ໃບ ແລະ ໃບຍ້ອງຍໍເຈົ້າຄອງ ນວ 2 ໃບ.