ໃນຕອນເຊົ້າຂອງວັນທີ 16 ມິຖຸນາ 2023, ທ່ານ ນາງ ລຳພອຍ ສີອັກຄະຈັນ ຮອງປະທານ ສະພາປະຊາຊົນ ນວ, ມີ ທ່ານ ນາງ ເກດມະນີ ບັນດາສັກ ປະທານ ຄະນະກຳມະການວັດທະນະທໍາ–ສັງຄົມ ແລະ ບັນດາເຜົ່າ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງຢ້ຽມຢາມສູນສອບເສັງ ປະຈຳສົກຮຽນ 2022-2023 ຢູ່ສູນສອບເສັງ ມສ ສົມສະຫວາດ ເມືອງປາກງື່ມ ນວ, ໂດຍການຕ້ອນຮັບຂອງ ທ່ານ ຄຳໝູນ ຕຽງທະລາດ ເຈົ້າເມືອງປາກງື່ມ ແລະ ທ່ານ ບຸນທັນ ແສງມະນີ ຮອງຫົວໜ້າພະແນກສຶກສາທິການ ແລະ ກິລາ ນວ ພ້ອມດ້ວຍ ຫົວໜ້າຫ້ອງການສຶກສາເມືອງ, ຜູ້ອຳນວຍການໂຮງຮຽນ ມສ ສົມສະຫວາດ ແລະ ຄູອາຈານ ຈຳນວນໜຶ່ງ.

ໃນການລົງຢ້ຽມຢາມຄັ້ງນີ້, ໄດ້ຮັບຟັງການລາຍງານການຈັດຕັ້ງປະຕິບັດກະກຽມໃນໄລຍະການສອບເສັງຈົບຊັ້ນ ມ.4 ຂອງເມືອງປາກງື່ມ ນວ ໂດຍສະເພາະແມ່ນຢູ່ສູນສອບເສັງ ມສ ສີສະຫວາດ ປະກອບ 12 ຫ້ອງສອບເສັງ, ມີ 3 ໂຮງຮຽນ ຄື: ມສ ສົມສະຫວາດ, ມສ ຊຽງແລ ແລະ ມຕ ບ້ານພ້າວ, ມີນັກສອບເສັງທັງໝົດ 229 ຄົນ, ຍິງ 128 ຄົນ, ມີຈໍານວນວິຊາສອບເສັງທັງໝົດ 6 ວິຊາ ຄື: ພາສາລາວ-ວັນນະຄະດີ, ວິທະຍາສາດສັງຄົມ, ວິທະຍາສາດທຳມະຊາດ, ສຶກສາພົນລະເມືອງ, ຄະນິດສາດ ແລະ ພາສາອັງກິດ. ໃນການຢ້ຽມຢາມດັ່ງກ່າວ, ຄະນະລົງຢ້ຽມຢາມໄດ້ຮັບຟັງຂໍ້ສະດວກ, ຂໍ້ຫຍຸ້ງຍາກ ໃນການປະຕິບັດວຽກງານການສອບເສັງ ເປັນຕົ້ນ: ດ້ານງົບປະມານ, ສະພາບຫ້ອງສອບເສັງບໍ່ມີພັດລົມ, ບໍ່ມີປ່ອງຢ້ຽມ, ພາຫະນະໃນການຮັບໃຊ້, ອຸປະກອນຮັບໃຊ້ບໍ່ພຽງພໍ ແລະ ໃນຕອນທ້າຍກອງປະຊຸມຄະນະລົງຢ້ຽມຢາມ ກໍໄດ້ມີຄຳເຫັນແລກປ່ຽນຕໍ່ບັນດາຂໍ້ຄົງຄ້າງຕ່າງໆ ພ້ອມທັງໄດ້ຮັບເອົາຄຳສະເໜີຂອງບັນ ດາຄູອາຈານ ເພື່ອນຳໄປສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ, ຫຼັງຈາກນັ້ນ ທາງຄະນະກໍໄດ້ຍ່າງຢ້ຽມຊົມແຕ່ລະຕຶກຂອງສູນສອບເສັງ.