(ສພຊ) ໃນຕອນບ່າຍຂອງວັນທີ 9 ມິຖຸນາ 2023 ທີ່ສະພາແຫ່ງຊາດ ນະຄອນຫຼວງວຽງຈັນ ໄດ້ມີພິທີປິດຊຸດເຝິກອົບຮົມທິດສະດີການເມືອງ ຂັ້ນຕົ້ນ ຊຸດທີ I ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ; ເຂົ້າຮ່ວມມີສະຫາຍ ນາງ ບຸນມີ ຈູນລະຈັກ ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງ-ການປົກຄອງແຫ່ງຊາດ, ມີບັນດາສະຫາຍກໍາມະການຄະນະບໍລິຫານງານພັກສະພາແຫ່ງຊາດ, ຄະນະພັກຮາກຖານ, ຄະນະໜ່ວຍພັກຮາກຖານ, ຄະນະຮັບຜິດຊອບວຽກຊຸດເຝິກອົບຮົມ, ອາຈານຈາກສະຖາບັນການເມືອງ-ການປົກຄອງແຫ່ງຊາດ ແລະ ນັກເຝິກອົບຮົມ.

ໃນພິທີ ໄດ້ຮັບຟັງການຜ່ານບົດສະຫຼຸບຜົນສຳເລັດຂອງການຮຽນ ຈາກສະຫາຍ ສິງຄຳ ວົງພະຈັນ ກຳມະການຄະນະບໍລິຫານງານພັກສະພາແຫ່ງຊາດ, ຫົວໜ້າຄະນະຊ່ວຍວຽກຄະນະພັກສະພາແຫ່ງຊາດ ທັງເປັນຄະນະຮັບຜິດຊອບການຮຽນທິດສະດີການເມືອງຂັ້ນຕົ້ນ; ຈາກນັ້ນ, ໄດ້ມີພິທີມອບໃບຢັ້ງຢືນທິດສະດີການເມືອງຂັ້ນຕົ້ນ ໃຫ້ກັບນັກເຝິກອົບຮົມ ຈຳນວນ 45 ສະຫາຍ.

ໂອກາດດັ່ງກ່າວ, ສະຫາຍ ປອ. ນາງ ສູນທອນ ໄຊຍະຈັກ ໄດ້ມີຄໍາເຫັນໂອ້ລົມຕໍ່ພິທີປິດຊຸດເຝິກອົບຮົມຄັ້ງນີ້ວ່າ:ຜ່ານການຮັບຟັງການສະຫຼຸບລາຍງານຂອງຄະນະຮັບຜິດຊອບຊຸດເຝິກອົບຮົມ ຕີລາຄາສູງຕໍ່ຄວາມບາກບັ່ນພະຍາຍາມຂອງບັນດານັກເຝິກອົບຮົມທີ່ໄດ້ຕັ້ງໜ້າຄົ້ນຄວ້າຮໍ່າຮຽນ ສົມກັບຄວາມຢາກຮຽນ ຢາກຮູ້ ບັນຫາພື້ນຖານຂອງທິດສະດີລັດທິມາກ-ເລນິນ ທີ່ເປັນທິດສະດີພື້ນຖານຂອງການປະຕິວັດເຮົາ, ມີຄວາມສົນໃຈຢາກເຂົ້າໃຈແຈ້ງຕື່ມກ່ຽວກັບບັນຫາທິດສະດີ-ພຶດຕິກຳຕົວຈິງຂອງພັກ-ລັດເຮົາ ໃນຕະຫຼອດໄລຍະແຫ່ງການດຳເນີນການຕໍ່ສູ້ເພື່ອເອກະລາດແຫ່ງຊາດ ແລະ ໃນໄລຍະປັບປຸງບູລະນະລະບອບປະຊາທິປະໄຕ ປະຊາຊົນ ໃນປັດຈຸບັນ ຢ່າງເປັນລະບົບ. ການເຝິກອົບຮົມຄັ້ງນີ້ ເປັນການປະກອບອາວຸດທີ່ສຳຄັນໃຫ້ແກ່ພະນັກງານ-ລັດຖະກອນ ໃນອົງການນິຕິບັນຍັດ ເຊິ່ງຈະເປັນການຊ່ວຍໃຫ້ບັນດາພະນັກ ງານສາມາດຍົກສູງປະສິດທິພາບໃນການປະຕິບັດໜ້າທີ່ການເມືອງໃຫ້ສູງຂຶ້ນເລື້ອຍໆ ແລະ ການທີ່ຊຸດເຝິກອົບຮົມຊຸດນີ້ສາມາດບັນລຸຜົນສຳເລັດໄດ້ນັ້ນ ປັດໄຈສຳຄັນແມ່ນການປະກອບສ່ວນຢ່າງຕັ້ງໜ້າຂອງບັນດາຄູ-ອາຈານ ຈາກສະຖາບັນການເມືອງ ແລະ ການປົກຄອງແຫ່ງຊາດ ທີ່ໄດ້ມີຄວາມຮັບຜິດຊອບສູງໃນການສິດສອນ, ຖ່າຍທອດຄວາມຮູ້ທາງດ້ານທິດສະດີ ແລະ ມີການສົມທຽບໃສ່ພຶດຕິກໍາຕົວຈິງຂອງປະເທດເຮົາຢ່າງປະດິດສ້າງ ອັນໄດ້ເຮັດໃຫ້ຜູ້ເຝິກອົບຮົມສາມາດຮັບເອົາຄວາມຮູ້ຢ່າງເປັນລະບົບ; ເຖິງວ່າບັນດາຜູ້ເຝິກອົບຮົມຈະມາຈາກຫຼາຍກົມ, ຫຼາຍກໍາມາທິການ ທີ່ມີລະດັບຄວາມຮັບຮູ້ພື້ນຖານແຕກຕ່າງກັນ ແຕ່ກໍໄດ້ຕັ້ງໜ້າໃນການຄົ້ນຄວ້າຮໍ່າຮຽນ, ກໍາແໜ້ນເອົາບັນດາຫຼັກມູນທິດສະດີ ແລະ ພຶດຕິກໍາຕົວຈິງ ທີ່ຄູ-ອາຈານຖ່າຍທອດໃຫ້ໄດ້ເປັນຢ່າງດີ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)