ໃນຕອນເຊົ້າຂອງວັນທີ 07 ມິຖຸນາ 2023, ທ່ານ ນາງ ສົມພຽນ ວົງໄຊ ປະທານ ຄະນະກຳມະການ ຍຸຕິທຳ ແລະ ປກຊ-ປກສ ສະພາປະຊາຊົນ ນວ ພ້ອມດ້ວຍຄະນະ ໄດ້ສືບຕໍ່ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຢູ່ພະແນກຍຸຕິທຳ ນະຄອນຫຼວງ ໂດຍການຕ້ອນຮັບຂອງ ທ່ານ ພູທອນ ແກ້ວດວງມະນີ ຫົວໜ້າພະແນກຍຸຕິທຳ ນວ, ມີບັນດາທ່ານຫົວໜ້າ-ຮອງຫົວໜ້າຂະແໜງ ແລະ ຫ້ອງການຍຸຕິທຳເມືອງ ກໍໄດ້ໃຫ້ການເຂົ້າຮ່ວມໃນກອງປະຊຸມຄັ້ງນີ້.

ໃນກອງປະຊຸມດັ່ງກ່າວ ທ່ານ ພູທອນ ແກ້ວດວງມະນີ ໄດ້ລາຍງານໃຫ້ຊາບວ່າ: ໃນໄລຍະຕົ້ນປີຜ່ານມາ ພະແນກຍຸຕິທຳ ນວ ໄດ້ຊຸກຍູ້ ​ແລະ ຊີ້​ນຳ​ການຈັດ​ຕັ້ງ​ປະຕິບັດ​ຄຳ​ຕັດ​ສີນ​ຂອງ​ສານໃນ​ຂອບ​ເຂດ ນວ ເຊິ່ງມີ​ສະຖິຕິ​ສໍານວນ​ຄະດີ​ທັງ​ໝົດ 12,202 ​ເລື່ອງ; ​ໃນນີ້ສາມາດ​ປະຕິບັດ​ໄດ້ 105 ​ເລື່ອງ, ​ປະສານ​ສົມທົບ​ ​ແລະ ​ເປັນ​ຄະນະ​ກຳມະການ​ຮ່ວມກັບ​ພາກສ່ວນ​ທີ່​ກ່ຽວຂ້ອງຄົ້ນຄວ້າ​​ການ​ສ້າງ​ນິຕິ​ກຳ​ຂັ້ນ ນວ​ ​ເພື່ອຄົ້ນຄວ້າ ແລະ ປະກອບ​ຄຳ​ເຫັນ​ທາງ​ດ້າກົດໝາຍ​ໃສ່​ຮ່າງ​ນິຕິ​ກຳ​ຕ່າງ​ ຂອງອົງການປົກຄອງ ນວ ແລະ ພະແນກການຕ່າງໆ ໄດ້​ທັງ​ໝົດ 22 ສະບັບ. ນອກນັ້ນ, ຍັງໄດ້​ສຸມ​ໃສ່​ແກ້​ໄຂ​ປະກົດ​ການ​ຍໍ້​ທໍ້​ໃນ​ສັງຄົມ ​ເປັນ​ຕົ້ນ​: ​ການ​ແກ້​ໄຂ​ຂໍ້​ຂັດ​ແຍ່ງ​ທີ່​ເກີດ​ຂື້ນ​ທັງ​ໝົດ 223 ​ເລື່ອງ, ​ຄົ້ນ​ຄວ້າ​ແກ້​ໄຂ​ໄດ້ 140 ​ເລື່ອງ, ສົ່ງ​ໃຫ້​ພາກສ່ວນ​ກ່ຽວຂ້ອງ 83 ​ເລື່ອງ; ພ້ອມກັນນັ້ນ ກໍໄດ້ເອົາໃຈໃສ່ຄົ້ນຄວ້າວຽກງານທີ່ຕິດພັນກັບຂົງເຂດຕົນຈຳນວນໜຶ່ງ ເປັນຕົ້ນ: ໃຫ້​ຄຳ​ປຶກສາ​ທາງ​ດ້ານ​ກົດໝາຍ​, ​ຢັ້ງຢືນ​​ເອກະສານ​ເອົາ​ເດັກ​ໄປ​ເປັນ​ລູກລ້ຽງ​, ​ປະ​ເມີນ ​ແລະ ສ້າງ​ບ້ານ​ແບບຢ່າງ​ປະຕິບັດ​ກົດໝາຍ​, ປະ​ເມີນ ​ແລະ ສ້າງ​ຄອບຄົວ​ແບບຢ່າງ​ປະຕິບັດ​ກົດໝາຍ​, ​ສົມທົບ​ຮ່ວມ​ມື​ກັບ​ອົງການ​ມູນ​ນິທິ​ເອ​ເຊຍ​ປະຈຳ​ລາວ​ໃນ​ການຈັດ​ຝຶກ​ອົບຮົມ​ວິທີ​ການ ​ແລະ ຂັ້ນ​ຕອນ​ກາ​ໄກ່​ເກ່ຍຂັ້ນ​ບ້ານ​ໄດ້ 5 ຊຸດ​ຄື: ຢູ່​ເມືອງ​ໄຊ​ທານີ 3 ຊຸດ, ຢູ່​ເມືອງ​ສັງ​ທອງ 1 ຊຸດ,ຫາດ​ຊາຍ​ຟອງ 1 ຊຸດ ແລະ ໄດ້​ສຸມ​ໃສ່​ວຽກ​ງານການ​ໂຄສະນາ​ເຜີຍ​ແຜ່​ກົດໝາຍ​ດ້ວຍ​ຫຼາຍ​ວິທີ​ການ ເຊັ່ນ: ໂຄສະນາ​ຜ່ານ​ທາງ​ວິທະຍຸ​ກະຈາຍສຽງ​, ​ໂຄສະນາ​ຜ່ານ​ທາງ​ໂທລະ​ໂຄ່ງ​ປະຈຳ​ບ້ານ​, ​ໂຄສະນາ​ແບບ​ເຕົ້າ​ໂຮມ​ປະຊາຊົນ​ຢູ່​ໃນ​ບ້ານ, ຢູ່​ໂຮງຮຽນ​ມໍ​ຕົ້ນ-ມໍ​ປາຍ​​ ເຫຼົ່ານີ້ເປັນຕົ້ນ.

ໃນໂອກາດດັ່ງກ່າວ, ຄະນະລົງເຮັດວຽກກໍໄດ້ມີການແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ພ້ອມທັງຮັບເອົາບາງບັນຫາ, ຂໍ້ຫຍຸ້ງຍາກທີ່ຄະນະຮັບຜິດຊອບໃນຂະແໜງການຕ່າງໆໄດ້ພົບພໍ້ ເພື່ອນຳໄປຊຸກຍູ້ ແລະ ສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ໃນຕອນທ້າຍກອງປະຊຸມ ທ່ານ ນາງ ສົມພຽນ ວົງໄຊ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນຳຂອງພະແນກ ແລະ ທຸກຂະແໜງການທີ່ໄດ້ເອົາໃຈໃສ່ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນ ຈົນໄດ້ຮັບຜົນສຳເລັດຫຼາຍດ້ານໃນໄລຍະຜ່ານມາ ແລະ ໃຫ້ສືບຕໍ່ເອົາໃຈໃສ່ປະຕິບັດບັນດາຄາດໝາຍທີ່ກຳນົດໄວ້ໃນແຜນປີ ໃຫ້ສຳເລັດ ແລະ ໃຫ້ບັນລຸຕາມຄາດໝາຍທີ່ວາງໄວ້.