ໃນວັນທີ 6 ມີຖຸນາ 2023 ທີ່ຫ້ອງປະຊຸມທາງໄກ ຂອງຫ້ອງວ່າການແຂວງຜົ້ງສາລີ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 02 ແຂວງຜົ້ງສາລີ, ບັນດາທ່ານສະມາຊິກສະພາປະຊາຊົນແຂວງ, ບັນດາພາກສ່ວນກ່ຽວຂ້ອງຂັ້ນແຂວງ ແລະ ສະພາປະຊາຊົນແຂວງ ເຂົ້າຮ່ວມກອງປະຊຸມເພື່ອປຶກສາຫາລື, ເອກະພາບບັນດາຄາດໝາຍດ້ານການພັດທະນາຊົນນະບົດ ແລະ ແກ້ໄຂຄວາມທຸກຍາກ ປະຈໍາປີ 2023 (ໃນຮູບແບບກອງປະຊຸມທາງໄກ) ໂດຍພາຍໃຕ້ການເປັນປະທານ ຂອງທ່ານ ຄໍາຈັນ ໂສຕາປະເສີດ ປະທານກໍາມາທິການບັນດາເຜົ່າ ສະພາແຫ່ງຊາດ, ມີບັນດາທ່ານຕາງໜ້າກໍາມາທິການທີ່ກ່ຽວຂ້ອງ ຂອງສະພາແຫ່ງຊາດ, ກະຊວງກະສິກໍາ ແລະ ປ່າໄມ້ ແລະ ບັນດາກະຊວງທີ່ກ່ຽວຂ້ອງ, ບັນດາທ່ານສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ບັນດາພາກສ່ວນກ່ຽວຂ້ອງຂັ້ນແຂວງ ໃນຂອບເຂດທົ່ວປະເທດ ເຂົ້າຮ່ວມ
ທີ່ປະຊຸມ ໄດ້ຮັບຟັງ ຮອງປະທານກໍາມາທິການບັນດາເຜົ່າ ສະເໜີຜົນການຕິດຕາມກວດກາ ບັນດາຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງກໍາມາທິການການບັນດາເຜົ່າ; ຮັບຟັງທ່ານ ຮອງປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ຮອງປະທານກໍາມາທິການແຜນການ ການເງິນ ແລະ ການກວດສອບ, ສະພາແຫ່ງຊາດ, ພະແນກກະສິກໍາ ແລະ ປ່າໄມ້ແຂວງຜົ້ງສາລີ ແລະ ບັນດາແຂວງ, ນະຄອນຫຼວງ ໃນຂອບເຂດທົ່ວປະເທດ ປະກອບຄໍາເຫັນ, ລາຍງານວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຕົນ ຕາມຄໍາຖາມເຈາະຈີ້ມຂອງສະພາແຫ່ງຊາດ ເພື່ອປຶກສາຫາລື ແລະ ເອກະພາບບັນດາຄາດໝາຍ ທີ່ໄດ້ກໍານົດໃນມະຕິຮັບຮອງແຜນພັດທະນາເສດຖະກິດ-ສັງຄົມ ປະຈໍາປີ 2023 ສະບັບເລກທີ 82/ສພຊ, ລົງວັນທີ 30/12/2022 ແລະ ມະຕິຮັບຮອງແຜນພັດທະນາເສດຖະກິດ-ສັງຄົມ ປະຈໍາປີ 2023 ຂອງບັນດາແຂວງ, ນະຄອນຫຼວງ ໃຫ້ມີຄວາມເປັນເອກະພາບກັນ
ພາບ-ຂ່າວ: ນັກຂ່າວສະພາປະຊາຊົນແຂວງ