ໃນວັນທີ 02 ມິຖຸນາ 2023 ນີ້ ທ່ານ ປອ.ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ພ້ອມດ້ວຍຄະນະ ໄດ້ລົງຕິດຕາມ ຊຸກຍູ້ ໂຄງການພັດທະນາໂຄງລ່າງພື້ນຖານ ແລະ ສິ່ງອຳນວຍຄວາມສະດວກ ອ່າງນ້ຳງື່ມ1 ເມືອງແກ້ວອຸດົມ ແຂວງວຽງຈັນ ເຊິ່ງໂຄງການດັ່ງກ່າວແມ່ນໄດ້ຮັບການສະໜັບໜູນຈາກທະນາຄານພັດທະນາອາຊີ (ADB), ເປົ້າໝາຍເພື່ອພັດທະນາເຂດດັ່ງກ່າວ ໃຫ້ກາຍເປັນຈຸດໝາຍປາຍທາງຂອງນັກທ່ອງທ່ຽວ ແລະ ເປັນການສ້າງສ້າງວຽກເຮັດງານທຳໃຫ້ແກ່ປະຊາຊົນໃນທ້ອງຖິ່ນດັ່ງກ່າວ.
ຈາກນັ້ນ ຕາງໜ້າບໍລິສັດຄຳຟອງກຼຸບ ຈຳກັດຜູ້ດຽວໄດ້ລາຍງານວ່າ: ມາຮອດປະຈຸບັນ ໂຄງການພັດທະນາພື້ນຖານໂຄງລ່າງ ແລະ ສິ່ງອຳນວຍຄວາມສະດວກ ອ່າງນ້ຳງື່ມ1 ແມ່ນມີຄວາມຄືບໜ້າ 54,23% ເຊິ່ງເຫັນວ່າມີຫລາຍໜ້າວຽກມີຄວາມຄືບໂດຍສະເພາະແມ່ນ: ການກໍ່ສ້າງເສັ້ນທາງເຂົ້າໄປຫາເຂດທ່ອງທ່ຽວອ່າງນ້ຳງື່ມໃກ້ຈະສຳເລັດ 100% ແລ້ວ, ໂດຍໄດ້ປັບປຸງເສັ້ນທາງຈາກທາງປູຢາງເປັນທາງເບຕົງ ເຊິ່ງມີຄວາມຍາວ 6 ກິໂລແມັດ, ກວ້າງ6ແມັດ ແລະ ໜາ 17 ຊັງຕີແມັດ, ປັບປຸງທ່າຈອດເຮືອເຂດມາລີນາເຊິ່ງມີເນື້ອທີ່22.689ຕາແມັດ, ນອກນີ້ແມ່ນການເຮັດກະຕ່າຫີນກັນເຈື່ອນລຽບແຄມນ້ຳງື່ມ ແລະ ຫນ້າວຽກອື່ນໆ.
ພ້ອມດຽວກັນນັ້ນ ປະທານສະພາແຫ່ງຊາດ ແລະ ເຈົ້າແຂວງໄດ້ຮ່ວມກັນປູກຕົ້ນໄມ້ເນື່ອງໃນໂອກາດວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ທີ 1 ມິຖຸນາ ຢູ່ສະຖານທີ່ທ່ອງທ່ຽວກ້ອງເຂື່ອນນ້ຳງື່ມ1.