(ສພຊ) ກອງປະຊຸມຕິດຕາມກວດກາຜົນການປະເມີນການຈັດຕັ້ງປະຕິບັດກົດໝາຍຂົງເຂດຍຸຕິທໍາ 4 ສະບັບ ໄດ້ຈັດຂຶ້ນໃນວັນທີ 23 ພຶດສະພາ 2023 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ເຂົ້າຮ່ວມມີບັນດາທ່ານຮອງປະທານກຳມາທິການ, ບັນດາທ່ານຮອງລັດຖະມົນຕີ, ມີຕາງໜ້າຈາກອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ສານທະຫານຂັ້ນສູງ ແລະ ແຂກຖືກເຊີນ.

ທ່ານ ຄຳແພງ ວິລະພັນ ໄດ້ມີຄຳເຫັນກ່າວເປີດກອງປະຊຸມວ່າ: ວຽກງານຕິດຕາມກວດກາ ການປະເມີນຜົນການຈັດຕັ້ງປະຕິບັດ ກົດໝາຍຂົງເຂດຍຸຕິທຳນີ້ ໃນເບື້ອງຕົ້ນ ແມ່ນໄດ້ກຳນົດໃຫ້ລາຍງານຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ໃນທ້າຍປີ 2022 ແຕ່ເມື່ອຜ່ານການຕິດຕາມກວດກາຕົວຈິງ ແລະ ການປະສານສົມທົບກັບພາກສ່ວນທີ່ກ່ຽວຂ້ອງ ໂດຍສະເພາະແມ່ນອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ແລ້ວເຫັນວ່າການປະເມີນຜົນການຈັດຕັ້ງປະຕິບັດກົດໝາຍ 4 ສະບັບດັ່ງກ່າວ ຍັງບໍ່ສາມາດຈັດຕັ້ງການປະເມີນໄດ້ຢ່າງກວ້າງຂວາງເຖິງທ້ອງຖິ່ນ ຈຶ່ງເຮັດໃຫ້ການສັງລວມຂໍ້ມູນຍັງບໍ່ແທດເຖິງຕົວຈິງ; ສະນັ້ນ, ເພື່ອຮັບປະກັນທາງດ້ານເນື້ອໃນໃຫ້ມີປະສິດທິພາບ, ປະສິດທິຜົນ ແລະ ແທດເຖິງຕົວຈິງ ທັງຢູ່ສູນກາງ ແລະ ທ້ອງຖິ່ນ ຄະນະປະຈຳສະພາແຫ່ງຊາດ ຈຶ່ງໄດ້ຕົກລົງໃຫ້ສືບຕໍ່ຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳຕື່ມອີກໄລຍະໜຶ່ງ ແລ້ວນຳມາລາຍງານຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນປີ 2023 ເພື່ອພິຈາລະນາຮັບຮອງ. ກອງປະຊຸມ ຈະໄດ້ປຶກສາຫາລື, ເອກະພາບກັນ ກ່ຽວກັບວຽກງານການປະເມີນການຈັດຕັ້ງປະຕິບັດກົດໝາຍຂົງເຂດຍຸຕິທຳ ເພື່ອເປັນການປັບປຸງແກ້ໄຂບັນຫາທີ່ຍັງເຫັນວ່າບໍ່ທັນສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມແຕ່ລະໄລຍະ; ຄວາມບໍ່ສອດຄ່ອງຂອງນິຕິກຳທີ່ເປັນຊ່ອງວ່າງ ຫຼື ບໍ່ສາມາດຈັດຕັ້ງປະຕິບັດໄດ້ ເຊິ່ງພາໃຫ້ມີຜົນກະທົບຕໍ່ການດຳລົງຊີວິດຂອງປະຊາຊົນໃນສັງຄົມ ໃຫ້ໄດ້ຮັບການປັບປຸງແກ້ໄຂໃຫ້ດີຂຶ້ນກວ່າເກົ່າ ແນໃສ່ຍົກສູງຄຸນນະພາບການດໍາເນີນຄະດີຕາມຂະບວນຍຸຕິທຳ ໃຫ້ມີປະສິດທິພາບ, ປະສິດທິຜົນ ແລະ ຮັບປະກັນຄວາມຍຸຕິທຳ ຕາມກົດໝາຍເທື່ອລະກ້າວ ເຊິ່ງການຈັດຕັ້ງປະຕິບັດບັນດາກົດໝາຍເຫຼົ່ານັ້ນ ລ້ວນແຕ່ເປັນການປະກອບສ່ວນສຳ ຄັນ ໃຫ້ແກ່ການຫັນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ໃຫ້ເປັນໄປຕາມກົດໝາຍເທື່ອລະກ້າວ ຕາມແນວທາງປ່ຽນແປງໃໝ່ຮອບດ້ານ ມີຫຼັກການຂອງພັກ. ສະເໜີໃຫ້ທຸກທ່ານທີ່ເຂົ້າຮ່ວມກອງປະຊຸມຄັ້ງນີ້ ຈົ່ງຕັ້ງໜ້າຮັບຟັງ ແລະ ປະກອບຄວາມເຫັນຕໍ່ເນື້ອໃນຕ່າງໆ ທີ່ຈະໄດ້ນຳມາປຶກສາໃນກອງປະຊຸມຄັ້ງນີ້ ໃຫ້ພາວະວິໄສ, ຕົວຈິງ ແລະ ເລິກເຊິ່ງ ເຮັດໃຫ້ກອງປະຊຸມບັນລຸຜົນສຳເລັດຕາມຈຸດປະສົງຄາດໝາຍທີ່ວາງໄວ້.

ກອງປະຊຸມ ໄດ້ຮັບຟັງລາຍງານຜົນການປະເມີນການຈັັດຕັ້ງປະຕິບັດກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດຳເນີນຄະດີແພ່ງ; ລາຍງານຜົນການປະເມີນການຈັດຕັ້ງປະຕິບັດກົດໝາຍວ່າດ້ວຍ ອົງການໄອຍະການປະຊາຊົນ ແລະ ກົດໝາຍ ການດຳເນີນຄະດີອາຍາ; ລາຍງານຜົນການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ; ການຜ່ານຮ່າງບົດປະກອບຄຳເຫັນຂອງ ຄະນະປະຈຳສະພາແຫ່ງຊາດ ແລະ ຮ່າງມະຕິຮັບຮອງຜົນການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ກໍໄດ້ຄົ້ນຄວ້າປະກອບຄຳຄິດຄຳເຫັນຕໍ່ບົດລາຍງານດັ່ງກ່າວ ເພື່ອເຮັດໃຫ້ເນື້ອໃນສົມບູນຂຶ້ນກວ່າເກົ່າ.

ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ: ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະສະພາປະຊາຊົນແຂວງ (STEPS)