ຕອນເຊົ້າຂອງວັນຈັນ, ວັນທີ 22 ພຶດສະພາ 2023, ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມຕິດຕາມກວດກາຂົງເຂດວຽກງານ ປ້ອງກັນຊາດ-ປ້ອງກັນຄວາມສະຫງົບ ແລະ ສະຫະພັນນັກຮົບເກົ່າ, ໂດຍການເປັນປະທານຮ່ວມຂອງທ່ານ ພົຕ.ປອ ວົງສັກ ພັນທະວົງ ຄະນະປະຈໍາສະພາແຫ່ງຊາດ, ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ແລະ ທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດາທ່ານໃນຄະນະປະຈໍາສະພາປະຊາຊົນແຂວງ, ຄະນະທິມງານຈາກສະພາແຫ່ງຊາດ, ຜູ້ຕາງຫນ້າຈາກກອງບັນຊາການປ້ອງກັນຊາດ-ປ້ອງກັນຄວາມສະຫງົບແຂວງ, ສະຫະພັນນັກຮົບເກົ່າ, ອົງການໄອຍະການປະຊາຊົນແຂວງ, ຫ້ອງການຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ແລະ ວິຊາການຂະແໜງກ່ຽວຂ້ອງ ພາຍໃນສະພາປະຊາຊົນແຂວງເຂົ້າຮ່ວມ.

   ກອງປະຊຸມ, ທ່ານ ທອງຄານ ວັດສະດາກອນ ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການຍຸຕິທໍາ, ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ, ໄດ້ຜ່ານບົດລາຍງານໂດຍຫຍໍ້ກ່ຽວກັບຜົນການຕິດຕາມກວດກາວຽກງານ ປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ໄດ້ຮັບຟັງການລາຍງານກ່ຽວກັບ ວຽກງານປ້ອງກັນຊາດຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ບັນຫາຊາຍແດນລະຫວ່າງປະເທດພາຍໃນແຂວງ, ການແກ້ໄຂປະກົດການຫຍໍ້ທໍ້ໃນສັງຄົມ, ວຽກງານສະຫະພັນນັກຮົບເກົ່າ, ວຽກງານອົງການໄອຍະການປະຊາຊົນແຂວງ ແລະ ວຽກງານກ່ຽວກັບການປ້ອງກັນຊາດ-ປ້ອງກັນຄວາມສະຫງົບ ຢູ່ແຂວງອຸດົມໄຊ.  ຈຸດປະສົງ, ກໍ່ເພື່ອເປັນການຕິດຕາມກວດກາວຽກງານ ປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະຜ່ານມາວ່າມີຜົນສໍາເລັດຫຍັງແດ່, ມີດ້ານອ່ອນຂໍ້ຄົງຄ້າງແນວໃດ, ຈະຊອກຫາວິທີ່ທາງແກ້ໄຂແນວໃດ ແລະ ມີຄໍາເຫັນສະເໜີຕໍ່ກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ມີອັນໃດແດ່ ແລະ ຫລັງຈາກນັ້ນ ບັນດາທ່ານທີ່ເຂົ້າຮ່ວມກອງປະຊຸມ ໄດ້ມີຄໍາຄິດຄໍາເຫັນແລກປ່ຽນກັນຢ່າງກົງໄປກົງມາ ຕໍ່ກັບການລາຍງານດັ່ງກ່າວ.  ພ້ອມນັ້ນ, ຕອນບ່າຍຂອງວັນດຽວກັນບັນດາທ່ານທີ່ເຂົ້າຮ່ວມກອງປະຊຸມ ຍັງໄດ້ລົງພື້ນທີ່ຕົວຈິງ ທີ່ຄ້າຍຄຸມຂັງ-ດັດສ້າງຂອງແຂວງຕື່ມອີກ.

ພາບ/ຂ່າວ: ແສງພອນ ອິນນະລົງ.