ວັນທີ 19 ພຶດສະພາ 2023 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມຮ່ວມກັບສະພາປະຊາຊົນແຂວງ ແລະ ຂະແໜງການກ່ຽວຂ້ອງຂັ້ນແຂວງ ໂດຍການເປັນປະທານຮ່ວມ ຂອງທ່ານ ພົຕ ປອ ວົງສັກ ພັນທະວົງ ຄະນະປະຈໍາສະພາແຫ່ງຊາດ, ປະທານ ກຳມາທິການປ້ອງກັນຊາດ-ປ້ອງກັນຄວາມສະຫງົບ ແລະ ທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ; ເຂົ້າຮ່ວມມີບັນດາທ່ານ ຄະນະປະຈໍາສະພາປະຊາຊົນແຂວງ, ຕາງໜ້າຈາກ ກອງບັນຊາການທະຫານແຂວງ, ກອງບັນຊາການປ້ອງຄວາມສະຫງົບແຂວງ, ສະຫະພັນນັກຮົບເກົ່າແຂວງ, ອົງການໄອຍະການປະຊາຊົນແຂວງ, ຫ້ອງການຄະນະກຳມະການ ປກຊ-ປກສ ແຂວງ, ຮອງປະທານຄະນະກໍາມະການສະພາປະຊາຊົນແຂວງ, ຮອງເລຂາທິການສະພາປະຊາຊົນແຂວງ ແລະ ພະນັກງານວິຊາການທີ່ກ່ຽວຂ້ອງພາຍໃນສະພາປະຊາຊົນແຂວງເຂົ້າຮ່ວມ.

ໂອກາດທີ່ທາງຄະນະທີມງານ ກຳມາທິການປ້ອງກັນຊາດ ແລະ ປ້ອງກັນຄວາມສະຫງົບ ສະພາແຫ່ງຊາດ ລົງເຄື່ອນໄຫວຕິດຕາມກວດກາຢູ່ແຂວງຜົ້ງສາລີ ທ່ານ ທອງສີ ເສົາສຸລິພົມ ຂຶ້ນກ່າວຕອນຮັບ ແລະ ຂອບໃຈ ເປັນຢ່າງສູງ ຄະນະທີມງານ ທີ່ໃຫ້ຄວາມສໍາຄັນ ແລະ ຍາດເວລາອັນມີຄຸນຄ່າມາເຄື່ອນໄຫວເຮັດວຽກ ຢູ່ແຂວງຜົ້ງສາລີຄັ້ງນີ້, ຊຶ່ງມັນສະແດງເຖິງຄວາມເປັນຫ່ວງ, ເປັນໃຍ ແລະ ທັງເປັນການປຸກລະດົມ ໃຫ້ແກ່ການນໍາສະພາປະຊາຊົນ ແຂວງ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ກໍຄື ຄະນະສະມາຊິກສະພາປະຊາຊົນແຂວງປະຈໍາເມືອງໃນທົ່ວແຂວງຜົ້ງສາລີ. ໂດຍສະເພາະ ການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດ ໃນເຂດເລືອກຕັ້ງ ຂອງຕົນ ໃນການຊຸກຍູ້, ຕິດຕາມກວດກາ ການເຄົາລົບປະຕິບັດລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ ແລະ ມະຕິຂອງກອງປະຊຸມສະພາແຫ່ງຊາດ, ສະພາປະຊາຊົນແຂວງ ໃນທຸກຂົງເຂດວຽກງານ ເພື່ອສະເໜີວິທີການ, ມາດຕະການໃຫ້ອົງການກ່ຽວຂ້ອງໄດ້ຮັບການປັບປຸງ ແລະ ແກ້ໄຂໃຫ້ມີຄວາມໂປ່ງໃສ, ຍຸຕິທໍາ ແລະ ສາມາດກວດສອບໄດ້ ເພື່ອຫັນເຂົ້າສູ່ການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍຢ່າງເຂັ້ມງວດ. ຈາກນັ້ນ, ໄດ້ຮັບຟັງ ທ່ານ ພັທ ຄໍາດາ ໂສລະພົມ ປະທານກຳມະການ ຍຸຕິ​ທຳ ແລະ ປກຊ-ປກສ ສະພາປະຊາຊົນແຂວງ ຂຶ້ນ​​ລາຍ​ງານຜົນການຕິດຕາມກວດກາວຽກງານ ປກຊ-ປກສ ຕິດພັນກັບການຈັດຕັ້ງປະຕິບັດວາລະແຫ່ງຊາດ; ຮັບຟັງທ່ານ ຕາງໜ້າຈາກກອງບັນຊາການທະຫານແຂວງ ຂຶ້ນລາຍງານວຽກງານປ້ອງກັນຊາດ, ຕິດພັນກັບການຈັດຕັ້ງປະຕິບັດວາລະແຫ່ງຊາດ ແລະ ບັນຫາຊາຍແດນລະຫວ່າງປະເທດ ຂອບເຂດແຂວງຮັບຜິດຊອບ; ຮັບຟັງຕາງໜ້າຈາກກອງບັນຊາກປ້ອງກັນຄວາມສະຫງົບແຂວງ ຂຶ້ນລາຍງານ ວຽກງານປ້ອງກັນຄວາມສະຫງົບ, ຕິດພັນກັບການຈັດຕັ້ງປະຕິບັດວາລະແຫ່ງຊາດ ແລະ ການແກ້ໄຂປະກົດການຫຍໍ້ທໍໃນສັງຄົມ; ຮັບຟັງປະທານສະຫະພັນນັກຮົບເກົ່າແຂວງ ຂຶ້ນລາຍງານວຽກງານສະຫະພັນນັກຮົບເກົ່າຂອງແຂວງ; ຮັບຟັງຫົວໜ້າອົງການໄອຍະການປະຊາຊົນແຂວງ ຂຶ້ນລາຍງານວຽກງານອົງການໄອຍະການແຂວງ; ຮັບຟັງຕາງໜ້າຈາກຫ້ອງການຄະນະກຳມະການ ປກຊ-ປກສ ແຂວງ ຂຶ້ນລາຍງານ​ວຽກງານໂດຍສັງລວມກ່ຽວກັບ ປກຊ-ປກສ ພາຍໃນແຂວງ. ຈາກນັ້ນ, ຜູ້ເຂົ້າຮ່ວມກອງປະຊຸມກໍໄດ້ປະກອບຄໍາເຫັນເພີ່ມຕື່ມ ທີ່ເຫັນວ່າຍັງບໍ່ ຮັດກຸມ.

ຕອນບ່າຍຂອງວັນດຽວກັນຄະນະທີມງານກຳມາທິການປ້ອງກັນຊາດ ແລະ ປ້ອງກັນຄວາມສະຫງົບ ສະພາແຫ່ງຊາດ, ສະພາປະຊາຊົນແຂວງ ແລະ ພາກສ່ວນກ່ຽວຂ້ອງ ໄດ້ລົງເຄື່ອນໄຫວເຮັດວຽກຢູ່ ຄ້າຍຄຸມຂັງ-ດັດສ້າງ ເພື່ອຮັບຟັງການລາຍງານຫຍໍ້ກ່ຽວກັບການຈັດຕັ້ງປະຕິບັດວຽກງານຂອງຄ້າຍ ແລະ ກ່ອນໜ້ານັ້ນ, ວັນທີ 18 ພຶດສະພາ 2023 ທີ່ຜ່ານມາ ຄະນະທີມງານກຳມາທິການປ້ອງກັນຊາດ ແລະ ປ້ອງກັນຄວາມສະຫງົບ ສະພາແຫ່ງຊາດ, ສະພາປະຊາຊົນແຂວງ ແລະ ສະມາຊິກສະພາປະຊາຊົນແຂວງ ປະຈໍາເມືອງບຸນໃຕ້ ພ້ອມດ້ວຍຕາງໜ້າຈາກອົງປົກຄອງເມືອງບຸນໃຕ້ ລົງເຄື່ອນໄຫວເຮັດວຽກຢູ່ສູນບໍາບັດປິ່ນປົວຜູ້ຕິດຢ່າເສັບຕິດ ຢູ່ເມືອງບຸນໃຕ້, ແຂວງຜົ້ງສາລີ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ